—— ഗ്രാമിണി – നിയോഗം —–4 അവസാന ഭാഗം [Santhosh Nair] 1002

ഇവർ പർവത ആരോഹണത്തിൽ ഏർപ്പെടുമ്പോൾ കാമാസുരൻ എന്താവും ചെയ്‌തു കൂട്ടുന്നതെന്നു നോക്കിയിട്ടു  വരാം.

——- കാമാസുരൻ —

ഓർമ്മകളിൽ മഗ്നനായിരുന്ന കാമാസുരൻ തന്റെ ആരാധനാമൂർത്തിയെ വന്ദിച്ച ശേഷം തന്റെ ദിനപൂജയിലേക്കു കടന്നു.

ആയിരം ചെമ്പരത്തിപ്പൂക്കൾ നേദിച്ചു ശത്രു ദോശ നിവാരണ പൂജ ചെയ്തശേഷം എഴുനേറ്റു.  ഇനി ബലീ പീഠത്തിലേക്കു പോകണം.

മധ്യാഹ്നത്തിന് മുമ്പ് പൂജ നടത്തി ആസുരിക ശക്തി സമ്പാദിച്ചു കാട്ടിൽ എത്തണം.  ഉഗ്രചണ്ഡി പ്രീതി നേടിയാൽ തന്റെ ലക്‌ഷ്യം  അണയാം എന്നാണു പ്രശ്ന വിധി തെളിയുന്നതും, തന്റെ ആരാധനാമൂർത്തി  അരുളിയതും.

കാമാസുരൻ ഗുഹക്കു വെളിയിലുള്ള മൈതാനം ലക്ഷ്യമാക്കി നടന്നു. അവിടെ വലിയ പന്തങ്ങളും തീക്കുണ്ഡങ്ങളും  എരിയുന്നു. അത്യുഗ്രമായ ചൂട്.  മുകളിലെരിയുന്ന സൂര്യനും മോശമല്ല. ശരീരം വിയർക്കാൻ തുടങ്ങി.  താൻ സാധാരണയായി അണിയുന്ന വസ്ത്രങ്ങൾ മാറ്റി അടുത്തിരുന്ന ഓലിയിൽ ഉള്ള വെള്ളത്തിൽ കഴുത്തറ്റം മുങ്ങി നിവർന്ന കാമാസുരൻ തന്റെ സേവകൻ കൊണ്ടുവെച്ച ചുവന്ന പട്ടു ചുറ്റിയ ശേഷം ദേഹമാസകലം ചില കരികൾ ചേർത്ത മരുന്നുകൾ വാരിത്തേച്ചു.

എന്നിട്ടു മൈതാനത്തിനു നടുവിലുള്ള ആഭിചാര പീഠത്തിനടുത്തേക്കു നടന്നു.  അനുസരണയുള്ള വൃകാസുരൻ ബലി നൽകാൻ ഉള്ള നൂറ്റി ഒന്ന് കോഴികളെയും ആടുകളെയും കൊണ്ടുവന്നിരുന്നു.

ചാർത്തിൽ പറഞ്ഞിട്ടുള്ള മരുന്നുകൾ മറ്റു സാധനങ്ങൾ എന്നിവ ഒരിടത്തു വെച്ചിട്ടുണ്ട്.  ആജ്ഞ പ്രകാരം മീശഭൈരവൻ എന്ന കശാപ്പുകാരൻ തന്റെ മൂർച്ചയേറിയ കത്തിയുമായി ഒരിടത്തു  നിൽക്കുന്നുമുണ്ട്. ആ കണ്ണുകളിലെ ചോരക്കൊതി തനിക്കു പുതിയതാണെന്നു കാമാസുരനറിഞ്ഞു.

അഗ്നികുണ്ഡത്തിനു മുൻപിൽ പദ്മാസനത്തിലമർന്ന കാമാസുരൻ തന്റെ ഇഷ്ട ദൈവങ്ങളുടെ മന്ത്രങ്ങൾ ചൊല്ലി, ചാത്തനേയും മറ്റും പ്രസാദിപ്പിച്ചു ചില ദുർമന്ത്രങ്ങളിലേക്കു കടന്നു.

അപ്പോഴേക്കും മറ്റുള്ളവരുടെ കണ്ണുകൾക്ക് കാണാൻ ആകാത്ത ചില ഭീകര സത്വങ്ങൾ (കൂളികൾ മുതലായവ) അവിടെ വന്നു.  രക്ത ദാഹികളായ അവർ കിട്ടാൻ പോകുന്ന സദ്യ പ്രതീക്ഷിച്ചു അവിടെ നാവു നുണഞ്ഞുകൊണ്ടു നിന്നു.

പെട്ടെന്ന് എങ്ങനെയോ കാമാസുരന്റെ വായിൽ നിന്നും ഒരു സ്തോത്രം ഉയർന്നു.

ശുഭേ മംഗള ദശേക്ഷു ശുഭേ മംഗള ചണ്ഡികേ

മംഗളെ മംഗളാർഹേച സർവ മംഗള മംഗളെ

സദാ മംഗളതേ ദേവി സർവേഷാം മംഗളാലയെ

പൂജ്യേ മംഗള വാരേച മംഗളാ ഭീഷ്ട ദേവതേ

പൂജ്യേ മംഗള ഭൂപസ്യ മനുവംശസ്യ സന്തതം

മംഗളാ ധിഷ്ഠാ തൃ ദേവി മംഗളാ നാം ശു മംഗളേ

സംസാര മംഗളാ ധാരേ മോക്ഷ മംഗള ദായിനീ

സാരേശ മംഗളാധാരേ പാരേശ സർവ കർമണാം

പ്രതി മംഗള വാരേച പൂജയേ മംഗള സുഖപ്രദേ

ആദ്യ പാദം ചൊല്ലിയ കാമാസുരൻ പെട്ടെന്ന് ഞെട്ടിയുണർന്നു.  ചെറിയ പ്രായത്തിൽ അമ്മയുടെ കൂടെ ഇരുന്നു ജപിക്കുന്ന മംഗള ചണ്ഡികാ സ്തോത്രം എന്തെ പെട്ടെന്ന് മനസ്സിൽ വരുന്നു. എന്തെ മനസ്സിൽ ലളിതാ സഹസ്രനാമം വരുന്നു?  എന്താണ് തനിക്കു പറ്റുന്നത്?  മൂർത്തികളെ, അടിയനെന്താണ് സംഭവിക്കുന്നത്?

പെട്ടെന്ന് അന്തരീക്ഷത്തിൽ വാളിന്റെയും ചിലമ്പിന്റെയും ശബ്ദം ഉയർന്നു.  ഒരു ഘോര സിംഹത്തിന്റെ അതിഘോര ഗർജനം ദിഗന്തങ്ങൾ പിളർത്തിക്കൊണ്ടുയർന്നു.  ശബ്ദം കേട്ട മീശഭൈരവനും വൃകാസുരനും ബോധമറ്റു നിലത്തു വീണു. അവിടെ നാവു നുണഞ്ഞു നിന്നിരുന്ന ഭീകര സത്വങ്ങളും ജീവനും കൊണ്ട് രക്ഷപ്പെട്ടു. അവിടെയുണ്ടായിരുന്ന കോഴികളും ആടുകളും പെട്ടെന്ന് എങ്ങോട്ടോ ഓടി..