കർമ 11 (THE FINDING’S 2) [Vyshu] 234

അവളെ നോക്കാൻ ശ്രീദേവി അമ്മയേയും ഏല്പിച്ച് അനി ഫോണിൽ ലേഖയെ വിളിച്ചു. നടന്നതെല്ലാം അവളോടും വിശദമാക്കി.

“എന്താടാ അവളുടെ പേര്.”

“ഡ്രൈവിംഗ് ലൈസൻസിൽ റിനി റോസ് എന്നാണ് ഉള്ളത്.”

“എടാ അനി അവളെ നീ നിലവിൽ ആ കേസിന്റെ അന്വേഷണ ചുമതലയുള്ള സാജൻ സാറിന് ഹാൻഡ്ഓവർ ചെയ്യ്. അതാ നല്ലത്.”

“എടി അപ്പോൾ ഇതുവരെയുള്ള എല്ലാ കാര്യങ്ങളും പറയേണ്ടി വരില്ലേ.”

“പിന്നെ നീ എന്ത് ചെയ്യാനാ ഉദ്ദേശം. അവളെ വീട്ടിൽ നിർത്തുന്നത് അപകടം പിടിച്ച പണിയാണ്.
കുറ്റവാളിയെ സംരക്ഷിച്ചതിന് നീയും അകത്താകും.”

“എടി അതെനിക്കറിയാം. ഞാനൊന്ന് ആലോചിക്കട്ടെ.”

“Ok ടാ ബൈ.”

“Ok നാളെ കാണാം. ബൈ…”

“നാളെയോ സമയം എത്ര ആയെന്നാ മോന്റെ വിചാരം???”

അപ്പോഴാണ് അനിക്കും അതേക്കുറിച്ച് ബോധം ഉണ്ടായത്…..

……………………

കണക്ക് കൂട്ടലുകൾ ചെറുതായൊന്ന് പാളിയത് കൊണ്ട് തന്നെ റിനിയോട് തനിച്ച് തിരികെ പോകുവാൻ പറഞ്ഞ നിമിഷത്തെ സ്വയം പഴിച്ച് കൊണ്ട് എരിഞ്ഞോടുങ്ങുന്ന നേരിപ്പൊടിന് മുന്നിൽ ഇരിക്കുകയായിരുന്നു ആ സ്ത്രീ.

ഇടയ്ക്കിടെ അവൾ തന്റെ മിഴികൾ മൊബൈൽ സ്ക്രീനിലേക്ക് നീട്ടുന്നുണ്ട്.

അവിടെ എത്തിയ ശേഷം മെസ്സേജ് അയക്കാം എന്ന് പറഞ്ഞതാണ്. ഇത് വരെയും ഒരു വിവരവും ഇല്ല.