കുഞ്ഞി

Author : അതിഥി

വേലി കടന്ന് ഉമ്മറത്തു എത്തിയപ്പോൾ അയാൾ വിളിച്ചു

“നിങ്ങളിത് എവിടെ പോയി കിടക്കുവായിരുന്നു മനുഷ്യ ,വരുന്നത് വരെ ബാക്കി ഉള്ളവരുടെ ഉള്ളിൽ തീയാ ”
“ഞങ്ങളെ കുറിച്ച് എന്തെങ്കിലും ഒരു വിചാരം ഉണ്ടോ നിങ്ങൾക്ക് ”

ഭർത്താവിനെ കണ്ടതും അവൾ പരാതി കെട്ടഴിക്കാൻ തുടങ്ങി .അവളുടെ സ്നേഹത്തിന്റെ അതാണെന്ന് അയാൾക്കും അറിയാം

“ഹാ ഞാനിങ്ങട്ട് എത്തിയില്ലേ ന്റെ കുഞ്ഞി ”
അയാൾ ചിരിച്ചുകൊണ്ട് അവളുടെ കവിളിൽ ഒന്ന് തലോടി . എന്നാലും പരിഭവത്തിന്റെ നിഴൽ ഇപ്പോഴും മാറിയിട്ടില്ല
അയാൾ അവളെയും ചേർത്ത് പിടിച്ചു അകത്തേക്ക് കയറി .

പണ്ടെങ്ങോ നനഞ്ഞ ഒരു ഓർമയിലെന്ന പോലെ ചിമ്മിനി വിളക്കിലെ തിരി മടിച്ചു മടിച്ചു കത്തുന്നുണ്ട് . അതിന്റെ ഒരു നേരിയ വെളിച്ചം മാത്രം

” മോനെവിടെ കുഞ്ഞി ”
“അവൻ കിടന്നു ”
അവൾ തല താഴ്ത്തി കൊണ്ട് പറഞ്ഞു

“ഇത്ര പെട്ടന്നോ ”

അയാൾ നെറ്റി ചുളിച്ചു കൊണ്ട് ഒന്നുകൂടി ചോദിച്ചു .

മറുപടി പറയാതെ തലയൊന്ന് വെട്ടിച്ചു അടുക്കളയിലേക്ക് പോവാൻ തുടങ്ങിയ അവളെ അയാൾ പിടിച്ചു നിർത്തി .

“എന്താ കുഞ്ഞി ”

“അത് അത് .. ഇന്നവൻ ഒത്തിരി കരഞ്ഞാ ഉറങ്ങിയത് . കള്ളന്റെ മോനാണെന്നും പറഞ്ഞു കൂട്ടുകാരൊക്കെ കളിയാക്കത്രെ

എന്തിനാ അമ്മേ അച്ഛൻ കള്ളനായി എന്നും ചോദിച്ചു കുറെ കരഞ്ഞു പാവം ……വിശപ്പും ക്ഷീണവും കാരണം തളർന്ന് ഉറങ്ങിയതാ ; ”

അതും പറഞ്ഞവൾ അയാളുടെ മാറിലേക്ക് കരഞ്ഞുകൊണ്ട് വീണു

“കുഞ്ഞീ അവനൊന്നും കഴിക്കാതെ കിടന്നതല്ലേ …
കവറിൽ ബ്രഡ് ഇരിപ്പുണ്ട് അവനെ വിളിക്ക് “