ഒരു റൈഡർ ഗേൾ അപാരത അഥവാ RX ബേബി

Author : സുധീഷ് കൈലാസ്

ചെറിയ കഥയാ .. വളരെ ചെറിയ കഥ . കഥ ന്നൊക്കെ പറയാൻ പറ്റുവോ ന്നറിയില്ല ഒരു സംഭവം . 

ഒരു കുറുമ്പി പെണ്ണുണ്ട് . നേരിട്ട് പെങ്ങളല്ലെങ്കിലും പെങ്ങൾ സ്ഥാനം കൊടുത്ത് വച്ചിരിക്ക്യാ . ദർശന ഗോപിനാഥ് ന്നൊക്കെ വല്യ സ്റ്റൈലൻ പേരൊക്കെ ആണ് , കൺമണി അതാണ് വിളിപ്പേര് . ആൾ ഒരു കണ്ണത്തി ആണ് , ഐ മീൻ കണ്ണ് ഡോക്ടർ ( ഒപ്താൽമോളജിസ്റ് അയ്‌നാണ് ) . ചൈനാ ബാനിൽ ചക്ര ശ്വാസം വലിക്കുന്നതുനു മുൻപ് ടിക് ടോക്കിലും , ഇപ്പോ ഇൻസ്റ്റ റീലിസിലും ഒക്കെ ഒരു വൈറൽ സാധനം ഇല്ലേ … ” ഇതും കൂടി കഴിഞ്ഞാൽ വംശനാശം “ ഏതാണ്ട് അതുപോലെ ഒരു സാധനം . പിന്നെ  കണ്ണുഡോക്ടർ ആണ് എന്ന അഹങ്കാരം ഒന്നും ഇല്ല ട്ടോ , ആളൊരു പാവം ഫ്രീക് ആണ് . പിന്നെ ആളൊരു ഡാൻസറും കൂടി ആണ് , തെറ്റിദ്ധരിക്കണ്ട ക്‌ളാസിക്കൽ ഡാൻസുകൾ ആയ ഭാരത നാട്യം , മോഹിനിയാട്ടം എന്നീ കുലകളിൽ വിരിഞ്ഞ കുസുമങ്ങൾ ഒന്നും അല്ല …… മൈക്കിള് ജാക്സന്റെ പോലത്തെ ഡെൻസ് ആണ് കുട്ടിക്ക് ഇഷ്ടം , അതായത് സിൽമാറ്റിക്ക് ഡെൻസ് .

ഇനി കുട്ടിയെ പറ്റി വർണ്ണിക്കുകയാണെങ്കിൽ……

പനങ്കുല പോലെ ഉള്ള നീണ്ട മുടി ഒന്നും ഇല്ല , ചുരുണ്ട ചകിരി പിരിഞ്ഞു കിടക്കുന്ന പോലെ ഉള്ള മുടി  എണ്ണ തേക്കാതെ പാറിക്കളിക്കുന്ന ( ഈ കാര്യത്തിന് അമ്മ സിന്ധു ഗോപിനാഥും അച്ചമ്മ കുസുമലതയും എപ്പോളും ഉടക്കാണ് ) പിന്നെ കണ്ണുകൾ തിങ്കൾ മുതൽ വെള്ളി വരെ നീല , പച്ച , വൈലറ്റ് , പിങ്ക്, സിൽവർ എന്നിങ്ങനെ ലെൻസൊക്കെ വെച്ച് വരും . പരസ്പര വിരുദ്ധമായ ധാരണകൾ ഉണ്ടാക്കുക എന്ന ലക്ഷ്യത്തോടെയാണ് . ( ഗോപിനാഥൻ എന്ന കണ്ണട പീടികകാരന്റെ മകൾ അല്ലെ ലെന്സിനു പൈസചിലവൊന്നും ഇല്ലല്ലോ )