ഇവാ An Angelic Beauty

Author: മാലാഖയുടെ കാമുകൻ

❤️❤️❤️

ഏവർക്കും സുഖമാണെന്ന് വിശ്വസിക്കുന്നു.

എല്ലാവരും ചോദിച്ചിരുന്നു Angelic beauty എന്ന ഈ കഥ. ആദ്യം മുതൽ മാറ്റി എഴുതിയാണ് ഇത് ഇടുന്നത്.. എഴുതിയ അത്രക്കും ഇവിടെ ഇടുന്നു..
വായിച്ചവരും വായിക്കാത്തവർക്കും വേണ്ടി വീണ്ടും..

ഒത്തിരി സ്നേഹത്തോടെ.. ❤️

Eva, An Angelic Beauty

“ഭദ്ര…? നീ വരുന്നില്ലേ..?”

“അഹ് വരുന്നെടീ.. ഒരു നിമിഷം…”

ഭദ്ര ലൈബ്രറിയിൽ നിന്നും ഒരു പുസ്തകം കൂടെ എടുത്തു റജിസ്റ്ററിൽ എഴുതി ബാഗിൽ വച്ചുകൊണ്ടു ശ്യാമയെ നോക്കി ചിരിച്ചു.

“ഇങ്ങനെ ഒരു പുസ്തകപ്രാന്തി.., ഒന്ന് വരുന്നുണ്ടോ..?”

ശ്യാമ തലക്ക് കൈകൊടുത്ത് അവളെ നോക്കി ചിരിച്ചു..

“ഡീ.. വായിച്ചാൽ വളരും.. വായിച്ചില്ലെങ്കിലും വളരും.. വായിച്ചാൽ വിളയും വായിച്ചില്ലേൽ വളയും.. അങ്ങനെ ആണ് നമ്മുടെ…”

“കുഞ്ഞുണ്ണി മാഷ് പറഞ്ഞത് എന്നല്ലേ..? എന്റെ പൊന്നു മോളെ പ്ലീസ് കൊല്ലരുത്.. പാവങ്ങൾ വളഞ്ഞായാലും ജീവിച്ചോട്ടെ.. നീ വന്നേ…”

ശ്യാമ അവളുടെ കൈ പിടിച്ചു വലിച്ചു വലിച്ചു നടന്നു. ബിഎ രണ്ടാം വർഷം വിദ്യാർഥിനികൾ ആണ് ശ്യാമയും ഭദ്രയും. രണ്ടാം വർഷം അവസാനിക്കാനായി. ഏറ്റവും അടുത്ത കൂട്ടുകാരികൾ ആണ് അവർ ഇരുവരും.

അവർ എന്തോ പറഞ്ഞു ചിരിച്ചുകൊണ്ട് കോളേജ് ഗേറ്റിന്റെ അടുത്ത് എത്തിയപ്പോൾ ആണ് ഒരു കറുത്ത സ്പോർട്സ് ബൈക്ക് വലിയ ശബ്ദത്തോടെ അവരുടെ മുൻപിൽ വന്നു നിന്നത്..

അവർ അവിടെ നിന്ന് നോക്കി.

വിവേകും അവന്റെ വാല് പോലെ നടക്കുന്ന ഒരുത്തനും. രണ്ടും പണച്ചാക്കുകൾ ആണ്.
കോളജിൽ ആരും അവരെ എതിർക്കാറില്ല. കുറെ നാളായി ഭദ്രയുടെ പുറകെയാണ് ഇവൻ.