ഇവാ, An Angelic Beauty Part I [മാലാഖയുടെ കാമുകൻ] 2016

“മോനെ.. എന്തേലും കഴിച്ചിട്ട് തുടങ്ങിക്കോ.. “

അയാൾ കുറെയധികം പ്ലേറ്റുകളും പാത്രങ്ങളും കാണിച്ചു കൊടുത്തു.. ഒരുപാട് ഉണ്ട്..

“ഇല്ല ഇക്ക.. എന്റെ ചേച്ചി ഒന്നും കഴിച്ചിട്ടില്ല.. അതുകൊണ്ടു എനിക്കും വേണ്ട..കഴിഞ്ഞിട്ട് മതി..”

അത് പറഞ്ഞു വേഗം പാത്രങ്ങൾ വൃത്തിക്ക് കഴുകുന്ന ചെക്കനെ അയാൾ അത്ഭുതത്തോടെ നോക്കി.. വല്ലാത്തൊരു കുട്ടി എന്ന് അയാൾ മനസ്സിൽ പറഞ്ഞു.
അവൻ കഴിഞ്ഞ ദിവസങ്ങളിൽ വീട്ടുജോലികൾ ചിലതു പഠിച്ചിരുന്നു. അതുകൊണ്ടു തന്നെ അവന് അത്രക്ക് ബുദ്ധിമുട്ട് തോന്നിയില്ല.

പാത്രങ്ങൾ എല്ലാം കഴുകി അവിടെയൊന്ന് വൃത്തിയാക്കി. അപ്പോഴേക്കും ഉച്ച കഴിഞ്ഞു മൂന്ന് മണി ആയിരുന്നു.. സമയം പോയത് അറിഞ്ഞില്ല..

“നിന്നെ ഇക്ക വിളിക്കുന്നു..”

ഒരാൾ വന്നു പറഞ്ഞപ്പോൾ അവൻ കയ്യും മുഖവും കഴുകി വേഗം റിസപ്ഷൻ ഭാഗത്തേക്ക് ചെന്നു..

“ഇന്ന് മതി.. നിനക്ക് പറ്റുമെങ്കിൽ നീ നാളെയും വാ മോനെ.. പക്ഷെ ഇതുപോലെ നേരത്തെ പോകാൻ ആകില്ല.. രാവിലെ 8 മുതൽക്ക് വൈകീട്ട് വരെ നിൽക്കണം.. ഇതാ ഇത് വച്ചോ..”

അയാൾ 200 രൂപ എടുത്തു അവന് കൊടുത്തു. ഒപ്പം രണ്ടു പൊതിച്ചോറും.. അവന്റെ കണ്ണ് നിറഞ്ഞു തുളുമ്പി.. ആദ്യ കൂലിയാണ്.

“നന്ദി ഇക്ക.. ഞാൻ നാളെ രാവിലെ വരാം..”

അതും പറഞ്ഞു അവൻ ഓടി.. വിശന്നിട്ട് അവൻ വീഴാൻ പോകുകയായിരുന്നു.. അവന്റെ കാലുകൾ വിറച്ചു.
എന്നാലും അവൻ ഓടി വീട്ടിൽ എത്തി..

“ചേച്ചി…?”

ഓടി അകത്ത് ചെന്നപ്പോൾ ഭദ്ര തളർന്നു വാടി കിടക്കുകയായിരുന്നു..
അവൾക്ക് എഴുനേൽക്കാൻ പോലും കഴിയുന്നുണ്ടായിരുന്നില്ല..

അവൻ അവളെ എഴുന്നേൽപ്പിച്ചു. ആദ്യം കുറച്ചു വെള്ളം കൊടുത്തു.. അതിന് ശേഷം പാക്കറ്റ് തുറന്നു ചോറ് സാമ്പാർ കൂട്ടി അവളുടെ വായിൽ വച്ച് കൊടുത്തു..