ഇവാ, An Angelic Beauty Part I [മാലാഖയുടെ കാമുകൻ] 2023

***

തിരക്കിട്ട പണികളിൽ ആയിരുന്നു റോക്ക്.. ഓട്ടോക്കാരൻ രാഘവൻ അവിടേക്ക് വന്നു.. അയാൾ അവരുടെ വീടിന്റെ അടുത്തുള്ളത് ആണ്

“ഡാ മോനെ നീ വീട്ടിലേക്ക് ഒന്ന് വാ…”

അയാൾ വണ്ടി നിർത്തി അവനോടു പറഞ്ഞപ്പോൾ അവൻ ഒന്ന് പകച്ചു.. പിന്നെ ഓടി വണ്ടിയിൽ കയറി. രാഘവൻ ഒന്നും മിണ്ടാതെ വണ്ടിയെടുത്തു വേഗത്തിൽ പായിച്ചു..

എന്തോ വല്ലാത്ത ഭയം റോക്കിനെ പൊതിഞ്ഞു.. അവൻ അകമഴിഞ്ഞ് പ്രാർത്ഥിച്ചു..

പെട്ടെന്ന് തന്നെ വണ്ടി വീട്ടിൽ എത്തി..

അവൻ ചാടി ഇറങ്ങി ഗേറ്റിന്റെ അവിടെ എത്തിയപ്പോൾ ഉമ്മറത്ത് മഴുത്തായ കുത്തി വല്ലാത്തൊരു ഭാവത്തോടെ ഇരിക്കുന്ന ഭദ്രയെ ആണ് കണ്ടത്..

മിറ്റത്ത് ബോധമില്ലാതെ കിടക്കുന്ന വിവേക്.. അവന് കാര്യങ്ങൾ മനസിലായി.. അവൻ ഓടിച്ചെന്നു ഭദ്രയുടെ കയ്യിൽ നിന്നും തായ വാങ്ങി എറിഞ്ഞ ശേഷം അവളെ നെഞ്ചോടു ചേർത്ത് പിടിച്ചു..

അവളെ ഒറ്റക്ക് ആക്കി പോകാൻ തോന്നിയ നിമിഷത്തെ അവൻ ശപിച്ചു.. അവളെ ചേർത്ത് പിടിച്ചു അവൻ അവിടെ ഇരുന്നു. അവൾ മുഖം അവന്റെ നെഞ്ചിലേക്ക് അമർത്തി വച്ച് ഇരുന്നു.. അവളെ വിറക്കുന്നുണ്ടായിരുന്നു.

രാഘവനും മറ്റുള്ളവരും ചേർന്ന് രണ്ടുപേരെയും ഓട്ടോയിൽ കയറ്റി കൊണ്ടുപോയി..

വിവേകിന്റെ കാലുകൾ നനഞ്ഞ തുണി പോലെ കിടന്ന് ആടുന്നത് കണ്ടപ്പോൾ റോക്കിന്റെ ബോധം മറഞ്ഞില്ല എന്നേയുള്ളു.. എല്ലുകൾ ഒക്കെ പൊട്ടി ചിതറിയിരുന്നു.

ആളുകൾ മെല്ലെ പിരിഞ്ഞു.. പലർക്കും പല അഭിപ്രായം ആയിരുന്നു..

റോക്ക് അവന്റെ ചേച്ചിയെ ചേർത്തുപിടിച്ചു ഇരുന്നു..

***

രാവിലെ റോക്ക് ഉമ്മറത്ത് തന്നെ ഉണ്ടായിരുന്നു.. ഭദ്ര കിടക്കണം എന്ന് പറഞ്ഞു അകത്തേക്ക് പോയിരുന്നു.. അപ്പോഴാണ് ഒരു പോലീസ് ജീപ്പ് വന്നു നിന്നത്..