ഇവാ, An Angelic Beauty Part I [മാലാഖയുടെ കാമുകൻ] 2023

“നോക്കാൻ എന്താണ്..? എന്നെ അറിയാത്തവൾ അല്ലല്ലോ ഭദ്ര.. അല്ലെ ആന്റി..?

നല്ല പരിചയമുള്ള ഒരു സ്വരം കേട്ടപ്പോൾ ഭദ്ര പെട്ടെന്ന് തലപൊക്കി നോക്കി.

ഞെട്ടലോടെ അവളുടെ കയ്യിൽ നിന്നും ട്രെയ്‌ താഴെ വീണു ചിതറി..

അവളെ നോക്കി വൃത്തികെട്ട ഒരു ചിരിയോടെ ഇരിക്കുന്ന വിവേക്…

ഭദ്രക്ക് അപ്പോഴാണ് ബോധം വന്നത്.. ആന്റി അവളുടെ അടുത്ത് കാണിച്ച സ്നേഹത്തിൽ ഒരു നിമിഷം എങ്കിലും അവൾ എല്ലാം മറന്നിരുന്നു..

മമ്മയും പപ്പയും പോയതിന്റെ സങ്കടം മാറാത്തവൾക്ക് അൽപ നേരമെങ്കിലും കിട്ടിയ സ്നേഹത്തിൽ എല്ലാം മറന്നു പോയതാണ്.. ഭദ്ര ഭദ്രായല്ലാതെ ആയി മാറിയിരുന്നു..

“ഒത്തിട്ടുള്ള കളി ആയിരുന്നു അല്ലെ..?”

അവൾ നിർവികാരതയോടെ ആരോട് എന്നൊന്നും ഇല്ലാതെ ചോദിച്ചു.. അത് കേട്ട് എല്ലാവരും ചിരിച്ചു..

“എന്താ മോളെ ഇത്..? അഹ് സാരമില്ല.. പിന്നെ വിവേകിനെ മോൾ അറിയുമല്ലോ.. മോളെ പൊന്നുപോലെ നോക്കും.. അല്ലെ വിവേക്..?”

ശിവരഞ്ജിനി ചിരിയോടെ വിവേകിനെ നോക്കി..

ഭദ്ര അവളെ നോക്കിയപ്പോൾ മുഖത്തു നിന്നും ഈ കച്ചവടത്തിന്റെ ലാഭത്തിന്റെ സന്തോഷം കാണാൻ കഴിഞ്ഞു..

“പൊന്നു പോലെ നോക്കും ഞാൻ അവളെ, ആന്റി.. അല്ലേടാ..”

വിവേക് ചിരിയോടെ മുൻപിൽ ഇരുന്നവരെ നോക്കി. രണ്ടു പേരുണ്ട്. അവന്റെ വീട്ടുകാർ ഒന്നുമല്ല.. കൂട്ടുകാർ ആയിരിക്കും.
ഭദ്ര ഒരുനിമിഷം കണ്ണടച്ച് നിന്നു..

“മോളെ.. അഭിമാനം ആണ് എല്ലാം. അതില്ലെങ്കിൽ ജീവിച്ചിട്ട് കാര്യമില്ല..”

അവളുടെ പപ്പയുടെ വാക്കുകൾ ചെവിയിൽ മുഴങ്ങിയതും അവൾ കണ്ണ് തുറന്നു.

അവൾ മുൻപോട്ട് ചെന്നു..

വിവേകിന്റെ കയ്യിൽ ഇരുന്ന ചായ ഗ്ലാസ് പിടിച്ചു വാങ്ങലും അവൾ ആ ചൂടുള്ള ചായ അവന്റെ മുഖത്തേക്ക് ഒഴിച്ചതും ഒരുമിച്ചു ആയിരുന്നു.