ആനക്കാരൻ

Author : Appu

 

പതിവുപോലെ നല്ലൊരു ജോലിയുടെ ഇന്റർവ്യൂ കഴിഞ്ഞ് അതും കിട്ടാതെ ആകെ നടന്ന് തളർന്നാണ് വീട്ടിൽ എത്തിയത്… അപേക്ഷിക്കുന്ന കമ്പനികളിൽ ജോലിക്കെടുക്കുംമുന്നേ ഒരേയൊരു ചോദ്യം.. എക്സ്പീരിയൻസ് ഉണ്ടോ… ഇല്ല എന്നൊരു ഉത്തരം കിട്ടിയാൽ ബാക്കിയൊന്നും പിന്നെ കാര്യമല്ല… കാരണം എക്സ്പീരിയൻസ് ഉള്ള ആളുകൾ പുറത്തുണ്ടാവും അവർ ക്യൂ നിൽക്കുമ്പോൾ എന്നെപ്പോലുള്ളവരെ പഠിപ്പിച്ചെടുക്കേണ്ട ചിലവ് അവർ എന്തിന് ഏറ്റെടുക്കണം… പക്ഷെ ഞാനിനി എവിടന്നാണ് കാര്യങ്ങൾ പഠിക്കാൻ പോവുന്നതെന്ന് എനിക്കറിയില്ലായിരുന്നു…

 

വീട്ടിൽ ചെന്ന് കയറിയതും ശേഖരമ്മാമ എന്നെയും കാത്തെന്നപോലെ വരാന്തയിൽ ഇരിപ്പുണ്ടായിരുന്നു…

 

“എന്തായി മോനെ ജോലി….??”

 

“എന്താവാനാ എന്നത്തെയും പോലെ തന്നെയായി… കിട്ടിയില്ല…!!”

 

അതും പറഞ്ഞ് അകത്തേക്ക്‌ കയറിയപ്പോൾ ശേഖരമ്മാമ അച്ഛനെ നോക്കുന്നത് കണ്ടു… അച്ഛൻ കുറച്ച് വർഷങ്ങളായി തളർന്നുകിടപ്പാണ്…. അച്ഛൻ എന്നോട് എന്തോ പറയാൻ ശേഖരമ്മമായെ നിർബന്ധിക്കുന്നത് പോലെ തോന്നി…

 

“മോനെ ടാ….!!” പുള്ളി അകത്തേക്ക്‌ നീട്ടി വിളിച്ചു…

 

ഞാൻ ഒന്നും മിണ്ടാതെ പാന്റ് ഒക്കെ മാറിയിട്ട് ഒരു കൈലിയും ഉടുത്ത് വരാന്തയിലെ അരമതിലിൽ വന്നിരുന്നു… ശേഖരമ്മാമയും ഞാനും മുഖമുഖം ഇരുന്നാൽ കാലുകൾ തമ്മിൽ മുട്ടുന്നത്ര ഇടമേ അവിടെയുള്ളു…

 

“എടാ ഞാൻ പറയുമ്പോ നീ എടുത്തുചാടി ഒന്നും പറയരുത്… നല്ലോണം ആലോചിച്ചിട്ട് പറയണം…!!”.. ശേഖരമ്മാമ അച്ചനെയും എന്നെയും മാറിമാറി നോക്കികൊണ്ട് പറഞ്ഞു…

 

ഞാനും അവരെ രണ്ടുപേരെയും നോക്കി… പക്ഷെ ഒന്നും പറഞ്ഞില്ല…

 

“ടാ അച്ഛനിപ്പോ ആനപ്പുറത്ത് നിന്ന് വീണ് കിടപ്പായിട്ട് വർഷങ്ങളായില്ലേ…?? നീയും കുറെയായി ജോലി നോക്കി നടക്കുന്നു… ഇപ്പോഴത്തെ ലൊട്ടുലൊടുക്ക് ജോലികളൊക്കെ ചെയ്ത് എത്ര നാളാ നിങ്ങള് കഴിയാ…?? അതോണ്ട്…!!”

 

“അതോണ്ട്…??”

 

“അതോണ്ട് നീ നമ്മടെ കുലത്തൊഴിൽ ഏറ്റെടുക്കണം…. എടാ ആനപ്പണി അത്ര മോശം പണിയൊന്നുമല്ല… പണ്ട് നാടുവാഴി നമ്മുടെ കാരണവന്മാർക്ക് അംഗീകാരത്തോടെ നൽകിയ തൊഴിലാണ്….!!”

 

“അമ്മാമേ നമ്മളിത് ഒരുപാട് സംസാരിച്ചതല്ലേ…. ആനപ്പണിക്ക് എന്നെ കിട്ടൂല… ദേ കിടക്കുന്നു ആനപ്പണിയിലെ ആഗ്രകണ്യൻ മോഹനൻ ആശാൻ… ആനയും കൊണ്ട് നടക്കുമ്പോ അന്വേഷിക്കാനും ഊട്ടാനും കൂടെ നടക്കാനും ഒത്തിരി ആൾക്കാരുണ്ടായിരുന്ന മനുഷ്യനല്ലേ… ന്നിട്ട് ഒന്ന് വീണ് നടുതളർന്ന് കിടന്നിട്ട് ആരുണ്ടായി തിരിഞ്ഞ് നോക്കാൻ…??.. എനിക്കും കൂടി എന്തേലും ആയാ രണ്ടും കൂടി പുഴുത്ത് ചാവേയുള്ളു..”

 

“എടാ ഞാൻ മുൻപ് പറഞ്ഞിട്ടുള്ളതുപോലെയല്ല നിന്റെ ജീവിതം രക്ഷപെടും…!!”

 

“എങ്ങനെ…??”

 

“നീ പൂമനക്കൽ തറവാടെന്ന് കേട്ടിട്ടില്ലേ… അവിടൊരു ആനയുണ്ട് നിന്റച്ഛൻ കൊണ്ടുനടന്നതാ പണ്ട്… ആ ആനക്ക് ഇപ്പൊ അവര് പാപ്പാനെ അന്വേഷിക്കുന്നുണ്ട്…!!”

 

“അവിടെ ഒന്നല്ലല്ലോ മൂന്നോ നാലോ ആനയില്ലേ…!!”

 

“ആ ഉണ്ട്‌ അവർക്കതനുസരിച്ച് പണവും ഉണ്ടല്ലോ…!!”

 

“അതില് ഏത് ആനക്കാണ് അച്ഛന് എല്ലാ ആനയിലും ചട്ടം ഉണ്ടാരുന്നല്ലോ….!!”

 

“അതില്…..!!”

 

“അതില്…??”

 

“ദേവീദാസൻ….”

 

“അമ്മാമക്ക് ഞാൻ ജീവനോടിരിക്കുന്നത് കൊണ്ട് എന്തേലും പ്രശ്നമുണ്ടോ….?? നാലാളെ കൊന്ന ആനേടെ അടുത്തോട്ട് തന്നെ വിടണം….!!” ഞാൻ ഒച്ചവെച്ചു…

 

“എടാ അതൊക്കെ ശെരിയാണ് പക്ഷെ അവനെ അനുസരണയുള്ള കുട്ടിയെപ്പോലെ കൊണ്ടുനടന്ന ഒരാളും ഉണ്ടായിരുന്നു… നിനക്കറിയാല്ലോ…!!”

 

ഞാൻ അച്ഛനെ നോക്കി…. ശെരിയാണ് അച്ഛന്റെയടുത്ത് അവനൊരു മിണ്ടാപ്പൂച്ചയായിരുന്നു…

 

“ആനയെ ഇങ്ങനെ നിർത്തിയിരിക്കുന്നൂന്ന് പറഞ്ഞ് വനംവകുപ്പില് ആരാണ്ട് പരാതി കൊടുത്തിട്ടുണ്ട്… ഇനിയും പാപ്പാനില്ലാതെ ആന ഈ നിൽപ്പ് നിന്നാൽ അവരവനെ കൊണ്ടുപോകും… ദേവീദാസനെ അവര് അങ്ങനങ്ങു വിട്ടുകൊടുക്കൂന്ന് നിനക്ക് തോന്നണുണ്ടോ…??”

 

“അമ്മാമ എന്താ പറഞ്ഞ് വരണത്..??”

 

“എടാ ആനയെ അഴിച്ച് കൊണ്ടുനടക്കണ്ട അതിന്റെ കാര്യങ്ങളൊക്കെ നോക്കാൻ പറ്റുന്ന ഒരാളെക്കിട്ടിയാമതി അവർക്ക്…. നീ ചോദിക്കുന്നത് തരും..!!”

 

“അമ്മാമ ഇതുംകൂടി ഒന്ന് പറ… എങ്ങാനും ആന എന്നെ അവിടിട്ട് ചവിട്ടിത്തേച്ചാൽ അവര് നോക്കുവോ അച്ഛനെ… പോട്ടെ അമ്മാമ നോക്കുവോ…??”

 

“എന്നാ പിന്നെ അച്ഛനും മോനും കൂടി അങ്ങോട്ടും ഇങ്ങോട്ടും നോക്കിയിരി അല്ലപിന്നെ…. എടാ രക്ഷപ്പെടാനുള്ളൊരു വഴിയാണിത്… അവിടെ നിന്നിട്ടായാലും നിനക്ക് ജോലി നോക്കാല്ലോ… കിട്ടിയാൽ ആനയിൽ നിന്നിറങ്ങിക്കോ….!! പിന്നെ പേടി.. അച്ഛന്റെയൊപ്പം നീയും ചെറുപ്പത്തില് അവന്റൊപ്പം നടന്നിട്ടുള്ളതല്ലേ… ആന അങ്ങനിങ്ങനൊന്നും മറക്കില്ലടാ മോനെ..!! അത് സ്നേഹമായാലും പകയായാലും….!!”

 

പിന്നെ എനിക്കൊന്നും പറയാനില്ലായിരുന്നു… ഒന്നുകിൽ ചത്ത് പണിയെടുത്ത് അച്ഛനെ നോക്കി ജീവിക്കണം… അല്ലെങ്കിൽ ശരീരികമായി വല്യ കഷ്ടപ്പാടില്ലാത്ത മരണപ്പണിക്ക് ഇറങ്ങണം… സത്യം പറഞ്ഞാ മതിയായി… കിട്ടുന്ന കൂലിപ്പണിയെടുത്ത് ശരീരം മുഴുവൻ വേദനയായി കേറിവരുമ്പോ ഒന്ന് വെള്ളം ചൂടാക്കാനോ സംസാരിക്കാനോ ആരുമില്ല… ഇനിയും എത്രനാളാ ഇങ്ങനെ… പക്ഷെ ഒരു കൊലയാളി ആന….

 

രാത്രി രണ്ട് മനസ്സുമായി അച്ഛന്റെയടുത്ത് ചെന്നിരുന്നു…. ആ ഇരിപ്പിൽ പണ്ട് പാതിപഠിച്ച ആനപ്പണിയുടെ പാഠങ്ങൾ ഞാൻ പൂർത്തിയാക്കുകയായിരുന്നു… ഒരേയൊരു മനസ്സോടെ….