ആശുദ്ധി 

Author : മണവാളൻ 

“ഓസോൺ പാളിയിൽ വിള്ളലുകൾ: കനത്ത ചൂടിനും വരൾച്ചയ്ക്കും സാധ്യത

ഉമ്മറത്തെ ചാരുകസേരയിൽ ഇരുന്ന് മുത്തച്ഛൻ ഉറക്കെ പത്രം വായിക്കുന്നുണ്ടായിരുന്നു.

“വെറുതെയാണോ തൊടിയിലെ സർവ്വതും
കരിഞ്ഞുണങ്ങിയിരിക്കുന്നു ”

മുറ്റത്ത് തളിർത്തു നിന്ന ഒരു തുളസിക്കതിരിന്റെ ഞെട്ടൊടിച്ചു ഞാൻ എന്റെ മുടിയിഴയിലേക്ക് ചാർത്തി.

പെട്ടെന്നാണ് മുത്തശ്ശി വന്ന് ചെവിക്ക്
പിടിച്ച് തിരിച്ചത്.

“മാസമുറ വന്നിരിക്കുന്ന കുട്ടിയല്ലേ നീ
ഈ തുളസിക്കതിർ കൂടി തൊട്ട് അശുദ്ധി
വരുത്താനാണോ നിന്റെ ഭാവം?”

അത്തരം ചോദ്യങ്ങൾക്ക് മുമ്പിൽ
അങ്ങനെ പാതറിപോകുന്ന ഒരു പെൺകുട്ടിയായിരുന്നില്ല ഞാൻ.
കോലായിൽ ചാഞ്ഞു കിടന്ന
മുത്തച്ഛനോട് ഞാൻ ഞാനാവശ്യപ്പെട്ടു.

“മുത്തച്ഛ ആ തലക്കെട്ട് ഒന്നുകൂടി വായിച്ചെ.”

“ഓസോൺ പാളിയിൽ വിള്ളലുകൾ:
കനത്ത ചൂടിനും വരൾച്ചയ്ക്കും
സാധ്യത”

“മുത്തശ്ശി കേട്ടല്ലോ…

ഇതൊക്കെ ഉണങ്ങി കരിഞ്ഞത്
ഞാനൊന്ന് തൊട്ടിട്ടല്ല, അന്ധവിശ്വാസം
മാത്രം പോര കുറച്ച് ശാസ്ത്രമൊക്കേയും
അറിഞ്ഞിരിക്കുന്നത് നല്ലതാ…!”

അപ്പുറത്ത് കളിച്ചു കൊണ്ടിരുന്ന പിള്ളേര്
സെറ്റെല്ലാം ഇതു കേട്ട് ചിരിക്കാൻ തുടങ്ങി.
മുത്തശ്ശിയുടെ മുഖം വീർത്തുകെട്ടി.
എന്തോ പിറുപിറുത്ത് കൊണ്ട്
അടുക്കളയിലേയ്ക്ക്.

“ഞാൻ അന്നേ പറഞ്ഞതല്ലേ സുഭദ്രെ
അമ്മുവിനെ പുറത്തേയ്ക്കൊന്നും പഠിക്കാൻ വിടേണ്ട എന്ന് ഇപ്പൊ മൂത്തോരോട് എങ്ങനെ പെരുമാറണമെന്ന് പോലും നിന്റെ കുട്ടിക്ക് അറിയില്ല”

“അതിനും വേണ്ടി ഇവിടെ എന്താ
ഉണ്ടായേ…?”