അപരാജിതൻ 54 5341

എല്ലാവരും അതുകേട്ടു ആശ്‌ചര്യപ്പെട്ടു.

ഇങ്ങനെയൊരു ശാസനം ആദ്യമായാണ്.

“അയ്യോ ,,അതെന്തിനാ അവരെ  കണ്ടു കെട്ടുന്നത്?’ പാർവ്വതി നടുക്കത്തോടെ ചോദിച്ചു.

“ഓ ,,,അത് ,,,കലിംഗത്തിൽ നിന്നോ മറ്റോ ആ മാനവേന്ദ്ര൯ തമ്പുരാന്റെ കൂട്ടുകാർ വന്നിട്ടുണ്ട്, അവർക്ക് എന്തോ പൂജയുണ്ട്,,അതിൽ ചണ്ടാലപെണ്ണുങ്ങൾ വേണമത്രേ,,അതും ശിവശൈലത്തെ..അവർ കൊട്ടാരത്തിലേക്ക് പോരാളികളെ സമ്മാനിക്കാം എന്ന് ഉറപ്പു നൽകിയിട്ടുണ്ട്, അതിനാൽ അവർക്കു വേണ്ടിയാണ് ആ പെണ്ണുങ്ങളെ കണ്ടു കെട്ടി സമ്മാനിക്കുന്നത്”

“അയ്യോ ,,ആ പാവങ്ങളെ,,,,” പാർവതിക്ക് ആകെ ഭയമായി.

“അവരെ അങ്ങനെയൊന്നും ചെയ്യല്ലേ ,,അവരെന്റെ ,,,” അവൾക്ക് വാക്കുകൾ കിട്ടിയില്ല.

“അവർ നിന്റെയാരാ,,,ശിവശൈലത്തെ  ചണ്ടാളത്തിമാർക്ക് വേണ്ടി വാദിക്കുന്നോ, നീയ് ” ദേഷ്യത്തോടെ ഭുവനേശ്വരി ദേവി ചോദിച്ചു.

“മോളെ ,,നീ മിണ്ടാതിരിക്ക് ,,,” മാലിനി അവളെ വിലക്കി.

രാമഭദ്രൻ തുടർന്നു.

“അങ്ങോട്ടേക്ക് പടയുമായി പോയിട്ടുണ്ട് ,,മാനവേന്ദ്രൻ തമ്പുരാനാണ് പടയ്ക്ക് മുന്നിൽ,, രാജശാസനം അനുസരിച്ചേ  അവർക്ക് മതിയാകൂ,,, ഇന്ന് തന്നെ ആ പെണ്ണുങ്ങളെ കലിംഗത്തിലേക്ക് കയറ്റി അയക്കുമെന്നാ കേട്ടത്’

“എന്താ അവരെ കൊണ്ട് പൂജ ?” ഭുവനേശ്വരി ദേവി തിരക്കി.

“എന്തോ നരബലി നടത്താനോ മറ്റോ ആണെന്നാണ് അറിവ് ,,” രാമഭദ്രൻ മറുപടി പറഞ്ഞു.

“അയ്യോ ,,നരബലിയോ ,,, ആ പാവങ്ങളെയോ” പാർവ്വതി വീണ്ടും നടുങ്ങി.

“മോളെ ,,ഇത് കൊട്ടാരത്തിന്റെ ഉത്തരവാണ് , നമുക്കൊന്നും പറയാൻ സാധിക്കില്ല,,ആവശ്യമില്ലാത്ത കാര്യത്തിൽ സംസാരം വേണ്ടാ ,,” രംഗരാജൻ അവളെ ഉപദേശിച്ചു.

പാർവ്വതിയുടെ ഉള്ളിൽ ഭയം തിങ്ങി നിറഞ്ഞു.

ശിവശൈലത്തെ തന്റെ പ്രിയപെട്ടവർക്ക് എന്തെങ്കിലും ആകുമോ എന്നവൾ ഒരുപാട് ഭയന്നു.

അവൾ ശ്യാമിനെ നോക്കി

“ഏട്ടാ ,,,എന്താ ഇപ്പോ ചെയ്യാ , അവരെ ആരാ സഹായിക്കാൻ,,?”

ശ്യാം കൈമലർത്തി.

അന്നേരമാണ്

വേലക്കാരി ആനന്ദവല്ലി എല്ലാവർക്കുമുള്ള മധുരവെള്ളവുമായി അങ്ങോട്ടേക്ക് വന്നത്.