സുറുമഎഴുതിയ മിഴികളിൽ [Shana] 137

എന്തുമാറ്റമാണ് പെണ്ണിന് വന്നേക്കുന്നത്.. പണ്ട് ഒന്നു മിണ്ടാന്‍ പ്രയാസമായിരുന്നു ഇന്നിപ്പോള്‍ വായനിറച്ചു മിണ്ടുന്നു…

“സുഖമാണോ നിനക്ക്..”

“ഓഹ് നീ വായ തുറന്നല്ലോ.. ഞാന്‍ കരുതി പണ്ടത്തെ പോലെ തന്നെ ആണ് നീ എന്ന്.” ചെറിയ മാറ്റം വന്നിട്ടുണ്ട് അതും പറഞ്ഞവള്‍ ചിരിച്ചു….

“സുഖം ടാ..”

“ഹസ്ബന്‍ഡ് മക്കള്‍ ഒക്കെ..”

“അവരും സുഖമായിരിക്കുന്നു.”

“നീ തനിച്ചാണോ വന്നത്.”

“അല്ലടാ ഇക്ക കൊണ്ടുവന്നാക്കി ഇപ്പോ മക്കളെയും കൊണ്ട് എന്റെ വീട്ടിലേക്ക് പോയി. ഇനി ഇതുകഴിയുമ്പോള്‍ വരും.”

പിന്നെ എന്തൊക്കയോ സംസാരിച്ചു അവളുടെ മക്കളുടെ ഫോട്ടോ കാണിച്ചുതന്നു… അവളെപോലെ സുന്ദരികളായ രണ്ടു കുറുമ്പികള്‍… അവളെ എങ്ങനെ അഭിമുഖീകരിക്കുമെന്ന ടെന്‍ഷന്‍ എവിടെയോ പോയിമറഞ്ഞു… ഇത്രയും നാളും അവളുടെ ജീവിതം എങ്ങനെ ആയിരിക്കുമെന്നോര്‍ത്ത് ഉള്ളില്‍ ഒരു നോവ് ആയിരുന്നു… പക്ഷേ ഇപ്പോ എന്റെ കൂടെ കഴിയുന്നതിലും സന്തോഷം അവളുടെ മുഖത്തു നിന്ന് വായിച്ചെടുക്കാം… നഷ്ടം ഇപ്പോള്‍ തനിക്ക് മാത്രമാണ്… അറിഞ്ഞുവെച്ചുകൊണ്ട് കൈവിട്ടുകളഞ്ഞ നഷ്ടം

പിന്നെ മീറ്റിങ്ങും കഴിഞ്ഞു പഴയപോലെ ക്ലാസ്മുറിയില്‍ ഇരുന്നും മരച്ചുവട്ടില്‍ ചുറ്റിനടന്നും പലതും ഓര്‍ത്തെടുക്കുകയായിരുന്നു എല്ലാവരും… കോളേജില്‍ പഠിച്ചിരുന്ന സമയത്തെ പല കൊടികുത്തിയ പ്രണയങ്ങളും ഇപ്പോ പല ചില്ലകളില്‍ ചേക്കേറി… ഇന്നിപ്പോ ഓര്‍മകളില്‍ പലതും പറഞ്ഞു ചിരിക്കുവാണ് എല്ലാവരും…. പഴയ ഓര്‍മകളില്‍ കുറച്ചുസമയത്തേക്കെങ്കിലും ജീവിക്കാന്‍ കഴിഞ്ഞതില്‍ ഒത്തിരി സന്തോഷം തോന്നി… വരാതിരുന്നെങ്കില്‍ വലിയ നഷ്ടമായിരുന്നേനെ… ഇന്നിപ്പോള്‍ അവളെ കണ്ടു സംസാരിച്ചപ്പോള്‍ മനസ്സില്‍ എന്തോ ശാന്തത കൈവന്നിട്ടുണ്ട് ഉള്ളിലെ വിങ്ങലുകള്‍ക്ക് ഒരാശ്വാസം കണ്ടെത്താന്‍ പറ്റിയിട്ടുണ്ട്… അല്ലേലും അവള്‍ സന്തോഷത്തിലാണല്ലോ..അപ്പോൾ പിന്നെ തനിക്കും സന്തോഷം തന്നെ…

പഴയ പോലെ ഒരുമിച്ചിരുന്നു കയ്യിട്ടുവാരി ഭക്ഷണം കഴിച്ചു….ഓര്‍ത്തുവെക്കാന്‍ കുറെയേറെ നല്ലനിമിഷങ്ങള്‍ സമ്മാനിച്ചുകൊണ്ട് സമയം പോയ് മറഞ്ഞപ്പോള്‍ പിരിയാന്‍ എല്ലാവര്‍ക്കും വിഷമമായിരുന്നു.

കുറച്ചു നേരത്തേക്കെങ്കിലും ആ പഴയ പത്തൊന്‍പതുകാരിലേക്ക് എത്തിയിരുന്നു എല്ലാവരും…. കുറേ അധികം ഫോട്ടോ എടുത്തു കൂട്ടി… വീണ്ടും ഒരു ഒത്തുചേരല്‍ ഓര്‍മപ്പെടുത്തി കൈ കൊടുത്തു പിരിഞ്ഞപ്പോള്‍ ഉള്ളില്‍ വല്ലാത്തൊരു നീറ്റല്‍ ആയിരുന്നു….

“മനു…”

അര്‍ച്ചനക്കൊപ്പം കാറിനടുത്തേക്ക് നടന്നപ്പോഴാണ് താന്‍ ഒന്നുകൂടി കേള്‍ക്കാന്‍ ആഗ്രഹിച്ച ശബ്ദം പുറകില്‍ നിന്നും വിളിക്കുന്നത്… തിരിഞ്ഞു അവളെ നോക്കുമ്പോള്‍ അവളുടെ ഹസ്ബന്റിനെയും കൂട്ടി തങ്ങളുടെ അടുത്തേക്ക് നടന്നു വന്നു…