സുറുമഎഴുതിയ മിഴികളിൽ [Shana] 137

“കിളവിയേ ദേ ഇപ്പൊ വരാം ”

വിളിക്കു മറുപടി കൊടുത്തുകൊണ്ട് അവന്‍ കണ്ണാടിക്കു മുന്നില്‍ നിന്നു. ഇനിയിപ്പോ പോകാതെ രക്ഷയില്ല. അവള്‍ പിടിച്ചപിടിയാലേ കൂട്ടിക്കൊണ്ടുപോകാന്‍ വന്നതാണ്. കണ്ണാടിയില്‍ ഒന്നുകൂടി നോക്കി മൊത്തത്തില്‍ ഒക്കെ ആണ് പ്രായത്തിന്റെ മാറ്റങ്ങള്‍ വന്നിട്ടുണ്ടെന്നല്ലാതെ താനിന്നും ആ പത്തൊന്പതുകാരന്‍ പയ്യന്‍ തന്നെയല്ലേ. അതുകൊണ്ടല്ലേ ഇന്നും പഴയ ഓര്‍മകളില്‍ ചേക്കേറി ജീവിക്കുന്നത്. മുടി മടിയൊതുക്കികൊണ്ട് അവന്‍ മുറിക്കു പുറത്തേക്കിറങ്ങി

“ഓഹ് മണവാളന്‍ പുറത്തേക്കിറങ്ങിയോ, ഞാന്‍ കരുതി അവിടെ വന്നു ആനയിച്ചു കൊണ്ടുപോകേണ്ടി വരുമെന്ന് ”
അര്‍ച്ചന അവനെ നോക്കി കളിയാക്കി

“മതിയടി ചൊറിയന്‍ ചേനെ”..
അവള്‍ അതുകേട്ടു കണ്ണുരുട്ടി.

“എന്നാലും ടി, എനിക്കിപ്പോഴും ഒരു ഡൗട്ട് വരണമോയെന്നു. അതാണ് അല്ലാതെ നിന്നെപ്പോലെ ചായംപൂശാന്‍ നിന്നിട്ടല്ല ”

അവളുടെ തലക്ക് കൊട്ടിക്കൊണ്ട് അവന്‍ മറുപടി പറഞ്ഞു.

“ദേ മനു , പണ്ടാരക്കാലാ നിന്നയുണ്ടല്ലോ. പണ്ടേ പറഞ്ഞിട്ടുള്ളതാ എന്നെ ചേനയെന്നു വിളിക്കരുതെന്ന് ഞാന്‍ നിന്റെ മറ്റേ പേര് വിളിക്കട്ടെ ”

അത് കേട്ടതും മനു പെട്ടന്ന് മൗനം പൂണ്ടു.

“ടാ പൊട്ടാ ഞാന്‍ ചുമ്മാ പറഞ്ഞതാ ഇനി നീ അതുമാലോചിച്ചു നില്‍ക്കണ്ട , വന്നേ ഇപ്പോ തന്നെ ലേറ്റ് ആയി, എല്ലാരും എത്തിയിട്ടുണ്ടാകും വാ പോകാം. ”

അവനു വിഷമം ആകുമെന്ന് കരുതി അര്‍ച്ചന വിഷയം മാറ്റാനെന്ന പോലെ പറഞ്ഞു

അമ്മയോട് യാത്രപറഞ്ഞു അവര്‍ ഇറങ്ങി

“ടാ കാര്‍ നീ എടുക്ക്..”
താക്കോല്‍ അവന്റെ നേരെ എറിഞ്ഞുകൊണ്ട് അവള്‍ പറഞ്ഞു

അവള്‍ക്കൊപ്പം കാറില്‍ കയറുമ്പോള്‍ മനസ്സ് ചിന്തകളില്‍ കുരുങ്ങികിടക്കാതിരിക്കാന്‍ അവന്‍ ശ്രദ്ധിച്ചു

“ടാ നീയെന്താ ഒന്നും മിണ്ടാത്തെ….. നിന്റെ നാക്ക് ആരെങ്കിലും പിഴുതെടുത്തോ”

“ഒന്നുമില്ലടി നീ പറയ് . അല്ലടി ഞാന്‍ കരുതി നീ വിധുവിന്റെ കൂടെ ആയിരിക്കും വരുന്നതെന്ന്.”മനു അവളെ നോക്കി.

“ഒന്നു പോയെടാ ഇപ്പോ ഈ ഒരു കൂടിക്കാഴ്ച തന്നെ നമ്മള്‍ മാത്രമുള്ളൊരു പഴയ നിമിഷങ്ങള്‍ ഒന്നുകൂടി ഓര്‍മപ്പെടുത്താന്‍ വേണ്ടിയാണ് അവിടെ ഭര്‍ത്താവും മക്കളും ഒന്നും വേണ്ട. ആ പഴയ റോള്‍ നമ്പര്‍ 18.പി. മനുദേവും പിന്നെ അതുപോലെ കുറച്ചു റോള്‍ നമ്പറുകളുംമാത്രം മതി… അതുകൊണ്ട് എല്ലാവരോടും അങ്ങനെ ആണ് വരാന്‍ പറഞ്ഞിരിക്കുന്നത് .. നിനക്കുപിന്നെ അതൊന്നുമില്ലല്ലോ..”
പറഞ്ഞുകഴിഞ്ഞു അവന്റെ മുഖം കണ്ടപ്പോഴാണ് അത് വേണ്ടായിരുന്നെന്ന് അവള്‍ക്ക് തോന്നിയത്….

“ടാ ഞാന്‍ വേറൊരര്‍ത്ഥത്തിലല്ല പറഞ്ഞത് നിന്റെ മുഖം മാറണ്ട …. ഇനി അതും ആലോചിച്ചു കേറ്റിപ്പിടിച്ചിരുന്നാലുണ്ടല്ലോ.” ഒരു ശാസന പോലെ അവള്‍ പറഞ്ഞു

“ഇല്ലടി…. ഞാന്‍ ഒന്നും കരുതിയില്ല… ”