ശിവശക്തി 6 [പ്രണയരാജ] 277

ആരൂഡം മറഞ്ഞിരിക്കുകയാ.. എനിക്കു മറികടക്കാനാവാത്ത ഒരു ശക്തി അതിനെ വിലക്കുന്നു.

തിരുമേനി…

ഭയപ്പെടേണ്ട, ഞാൻ ഉപാസനാ മൂർത്തിയെ ഒന്നു പുജിക്കുന്ന സമയം വരെ കാത്തിരിക്കണം.

തീർച്ചയായും, എന്നാൽ ഞാൻ പുറത്തിരിക്കാം

അരുത് നിങ്ങൾ ഇവിടെ ഇരിക്കണം, കാരണം നിങ്ങൾ ഈ ഇല്ലത്ത് എവിടെയാണോ അവിടെയാണ് എൻ്റെ ഉപാസനാ… മൂർത്തി അതിൻ്റെ കാരണം നമുക്കുമറിയില്ല.

ശരി തിരുമേനി, ഞാനിവിടെ ഇരിക്കാം.

ഹരി നാരായണൻ പുറം തിരിഞ്ഞിരുന്നു. ഒരാൾ വലുപ്പമുള്ള കൽവിഗ്രഹത്തിനു മുന്നിൽ വലിയ നിലവിളക്കിൽ തിരി കൊളുത്തി,മന്ത്രോച്ഛാരണം ഉയർന്നു. ഒപ്പം തെച്ചിയും, തുളസിയും താമരപ്പുവും ചേർന്നു കിടന്ന പുഷ്പങ്ങളുടെ കൂടയിൽ നിന്നും പുഷ്പങ്ങൾ ദേവിക്ക് സമർപ്പിച്ചു തുടങ്ങി.

സമയം പതിയെ ചലിച്ചു തുടങ്ങി. മന്ത്രോച്ചാരണം നിലച്ചു. അദ്ദേഹം ധ്യാനത്തിൽ മുഴുകി നിന്നു.

അമ്മേ… മഹാ….മായേ….

ശക്തി, തരൂ….

ഈ പൈതലിനു ശക്തി തരൂ…..

ഭയചകിതയായി കാർത്തുമ്പിയുടെ അമ്മ അതെല്ലാം നോക്കി നിന്നു. ഈ സമയം ഹരിനാരായണൻ്റെ കാതിൽ ഒരു അശരീരി മുഴങ്ങാൻ തുടങ്ങി.

ദൈവരഹസ്യം അറിയാനാണ് നീ ശ്രമിക്കുന്നത്.

അതിൻ്റെ ഫലം വിനാശമാവാം….

അതു കേട്ടതും ഒന്നു കൂടെ ധ്യാനത്തിലിരുന്ന ശേഷം ഹരിനാരായണൻ വീണ്ടും മൊഴിഞ്ഞു.

വാക്കു കൊടുത്തു പോയി അമ്മേ….

ശക്തി തരൂ…….

അമ്മേ….. മഹാ…. മായേ……

വീണ്ടും  ധ്യാനത്തിൽ മുഴുകിയിരുന്ന ഹരിനാരായണൻ്റെ കാതുകൾ തേടി…. അശരീരി വന്നടുത്തു.

തലക്കുറിയ്ക്ക് കമല പുഷ്പദളങ്ങളാലും, ഭസ്മത്താലും അർച്ചന നടത്തുക…….

തുളസി മാല സമർപ്പിച്ച ശേഷം

കിഴക്ക് സൂര്യനെ വണങ്ങി വിനായക പ്രതിക്ഷ്ഠ വെക്കുക….

നാരായണപ്രസാദത്തിനായി ഗരുഡ മന്ത്രം ഉരുവിട്ട ശേഷം നിമിത്തത്തിനായി കാത്തിരിക്കുക

തുടർന്ന് നമ്മെ തൊഴുത് തലക്കുറി ശിരസിൽ തൊട്ട് ധ്യാനിച്ചാൽ നിനക്കു ചിലത് കാണാം . പിന്നെ നിനക്ക് ഗണിക്കാനാവും.

ഹരിനാരായണാ….. ദൈവരഹസ്യം ഈ മുറിക്ക് വെളിയിൽ പോയാ… നിൻ്റെ കുലം മുടിയും, പുറത്ത് പറയുന്ന ആൾ രക്തം ശർദ്ദിച്ച് മരണമടയും ഈരേഴുലകത്തിലും ശാന്തി ലഭിക്കാതെ അലയും

വിനാശം അതാണ് നീ ഗണിക്കാൻ തുനിയുന്നത്….

ഓർക്കുക വിനാശം……

ഹരിനാരായണൻ തൻ്റെ മിഴികൾ തുറന്നു. പിന്നെ തിരിഞ്ഞു രാശി പലകയ്ക്കു നേരെ ഇരുന്നു. കാർത്തുമ്പിയുടെ അമ്മയെ നോക്കി.

നാം ഒരു കാര്യം പറഞ്ഞാൽ അനുസരിക്കാമെങ്കിൽ മാത്രം. ഈ തലക്കുറി ഞാൻ ഗണിക്കാം