രാക്ഷസൻ 10 [FÜHRER] 460

അലോക് നടന്ന് ഇരുവരുടെയും അടുത്തെത്തിയതും രണ്ടു വാഹനങ്ങള്‍ അതിവേഗത്തില്‍ കോമ്പൗണ്ടിലേക്ക് ഇരച്ചുകയറി..

രണ്ടു വാഹനങ്ങളിലായെത്തിയ അമറുള്‍പ്പടെയുള്ളവര്‍ അവടിടേക്കുവന്നു. അവരെ കണ്ടതും അലോക് ഭദ്രയെ സൂക്ഷിച്ചു നോക്കി. എന്നാല്‍ ഭദ്ര സോഫയില്‍ തലകുമ്പിട്ടിരുന്നു കരയുകയാണ്.

അവിടേക്കുവന്ന അയ്യപ്പന്‍ എന്തോ പറയാന്‍ തുടങ്ങിയതും അലോക് വിരല്‍ ചുണ്ടിനോടു ചേര്‍ത്ത് അവനോടു മിണ്ടെരുതെന്നു കാട്ടി എല്ലാവരോടുമായി തിരിഞ്ഞു നില്‍ക്കാന്‍ ആവശ്യപ്പെട്ടു. അതുകണ്ട് അവുടെ മുഖത്തു ചിരിപടര്‍ന്നു.

അലോക് ഭദ്രയുടെ മുന്നില്‍ മുട്ടുകുത്തിയിരുന്നു.. മുഖം പൊത്തി കരയുന്ന അവളുടെ കൈയ്കള്‍ അവന്‍ ബലമായി മാറ്റി.

അതോടെ ഭദ്ര തന്റെ കണ്ണുകള്‍ ഇറുക്കിയടച്ചു.. അലോക് അവളുടെ നെറ്റിയിലേക്കു തന്റെ തലചേര്‍ത്തു മുന്നോട്ടു തള്ളി.

ഭദ്ര പതിയെ കണ്ണുതുറന്നു അവനെ നോക്കി. പരിഭവം കലര്‍ന്ന നോട്ടം കണ്ട് അലോക് ഒന്നുകൂടി ബലത്തില്‍ തന്റെ നെറ്റികൊണ്ട് അവളുടെ നെറ്റിയിലേക്ക് വീണ്ടും ആഞ്ഞു തള്ളി.

എന്നാല്‍, ഭദ്രയാകട്ടെ അതിനെ പ്രതിരോധിക്കാനെന്നവണ്ണം തന്റെ തല ബലമായിപിടിച്ചു. അതോടെ അലോക് വന്യമായി അവളെ നോക്കി. ഭദ്രയും തന്റെ പരിഭവങ്ങള്‍ മറന്ന് അവന്റെ കണ്ണിലേക്കു തന്നെ നോക്കി.

 ഇരുവരും തങ്ങളുടെ പരിഭവവും സ്‌നേഹവും നോട്ടംകൊണ്ടും പരസ്പരം ശിരസുകൊണ്ടുള്ള തലോടല്‍കൊണ്ടും പറഞ്ഞു തീര്‍ത്തു.. ഒടുവില്‍ അവളെ തന്റെ നെഞ്ചിലേക്കു ചേര്‍ത്തു കോരിയെടുത്തുകൊണ്ടു അലോക് മുകളിലേക്കു പോയി.

ഹാളില്‍ അലോകുള്‍പ്പടെ എല്ലാവരും ഇരുപ്പുണ്ട്. ആരാ ബോക്‌സ് കൊടുത്തുവിട്ടതെന്നു നിനക്കു മനസിലായോ.. അഖില്‍ അലോകിനെ നോക്കി ചോദിച്ചു..

അതോടെ എല്ലാവരുടെയും ശ്രദ്ധാ കേന്ദ്രം അലോകിന്‍മേലായി.

ഞാന്‍ എന്തിനാടാ അതേക്കുറിച്ച് ആലോചിക്കുന്നത്.. എന്നെ തേടി പുറപ്പെട്ടവന്‍ എന്റെ മുന്നില്‍ തന്നെയെത്തും.

അതിനായി ഞാന്‍ കാത്തിരിക്കും. അലോക് ചെറു ചിരിയോടെ പറഞ്ഞു.

ഡാ നമുക്കിട്ടു പണിയാന്‍ ഒരുത്തന്‍ ദൈര്യം കാണിച്ചിട്ടുണ്ടെങ്കില്‍ അവന്‍ നിസാരക്കാരനായിരിക്കില്ല, സൂക്ഷിക്കണം. അമര്‍ ഗൗരവത്തോടെ പറഞ്ഞു.

നമ്മള്‍ എവിടെയോ വിട്ടുവെച്ചിന്റെ ബാക്കി പത്രമാണു നമ്മളെ തേടി വരുന്നത്. പകയാണ് അവന്റെ ശക്തി.