The Mythic Murders ?️Part:1 Chapter :1(Vishnu) 340

മെയിൻ റോഡില്‍ നിന്ന് വെറും മുപ്പത് മീറ്റർ മാറിയാണ് അഭിയുടെ തരക്കേടില്ലാത്ത രണ്ട് നില വീട്.

ധ്യാന്‍ നടന്ന് ഗേറ്റും തുറന്ന് അകത്ത് കേറി…

മുറ്റത്ത് രണ്ട് വശങ്ങളിലായി നില്‍ക്കുന്ന ചെടികള്‍ക്ക്‌ ഹോസിൽ നിന്നും വെള്ളം ഒഴിച്ചു കൊണ്ടിരുന്ന നന്ദന ഗേറ്റ് തുറന്ന ശബ്ദം കേട്ട് തിരിഞ്ഞ് നോക്കി.

ധ്യാന്‍ ആണെന്ന് കണ്ടതും ചിരിച്ചുകൊണ്ട് അവൾ ഹോസ് കുത്തിയിരുന്ന പൈപ്പ് അടച്ചിട്ട് അവന്റടുത്ത് ഓടിയെത്തി…

“മാസങ്ങൾ എത്ര ആയടാ നിന്നെ കണ്ടിട്ട്….! നിന്റെ അച്ഛനോട് തല്ലു കൂടിയിട്ടാണെങ്കിലും അവസാനം ഇങ്ങോട്ട് വരാൻ തോന്നിയല്ലോ…”

അവന്റെ തോളില്‍ വലിച്ചൊരു അടിയും കൊടുത്തിട്ട്, അവന്റെ തോളില്‍ കിടന്ന ബാഗ് പിടിച്ചു പറിക്കുന്നതിനിടെ അവള്‍ പറഞ്ഞു.

“നി പോടി… നിനക്കെന്ത് നോക്കണം. നിന്റെ സ്വപ്നം അഭി ആയിരുന്നു – അവനെ നിനക്ക് കിട്ടി…! അഭിയുടെ സ്വപ്നം സോഫ്റ്റ്‌വെയര്‍ എഞ്ചിനീയര്‍ ആയിരുന്നു – അവന്റെ സ്വപ്നവും ഫലിച്ചു. പക്ഷേ എന്റെ സ്വപ്നം ഇത്രയും കാലം വെറും സ്വപ്നം മാത്രമായിരുനല്ലൊ… അവസാനം അച്ഛനോട് തല്ലു കൂടിയിട്ടാണെങ്കിലും ഞാൻ അത് ആകാൻ പോകുവാണ് നന്ദു….” അവന്‍ വെളുക്കെ ചിരിച്ചു.