പ്രിയപ്പെട്ട കൂട്ടുകാരേ,

എല്ലാവർക്കും ഐശ്വര്യത്തിന്റെയും സമ്പൽസമൃദ്ധിയുടെയും ഒരായിരം പൊന്നോണാശംസകൾ ????????? അപ്പോ തുടങ്ങാം….

?സ്നേഹപൂർവം?

ആദിദേവ്

മാവേലി ഇൻ ക്വാറന്റൈൻ

Maveli In Quarantine | Author : Aadhidev

ചിങ്ങത്തിലെ അത്തപ്പുലരി പിറന്നു. മാവേലി മന്നൻ കേരളക്കരയിലേക്ക് യാത്ര പുറപ്പെടാൻ തയാറായി. പാതാളലോകത്ത് മന്നന് യാതൊരു ബുദ്ധിമുട്ടുകളുമുണ്ടായിരുന്നില്ല. തന്നെയുമല്ല, ഉപരിതലത്തിലുള്ള യാതൊരുവിധ പ്രശ്നങ്ങളും യമലോകത്തില്ലായിരുന്നു. ഇതുവരെ ഒരു കോവിഡ് പോസിറ്റീവ് കേസ് പോലും അവിടെ റിപ്പോർട്ട് ചെയ്തിട്ടില്ല.

“ഭായിയോം ഔർ ബഹനോം…. പാതാൾ ലോക് ആപ് സബ്‌കേലിയെ ബിൽകുൽ സെയ്ഫ് ഹെയ്…” യമാരാജൻ മൻ കീ ബാത്തിലൂടെ തന്റെ പ്രിയജനങ്ങളെ അറിയിച്ചു.

കൊറോണ പേരിനുപോലും ഇല്ലാത്തതിനാൽ യാതൊരു വിധ നിയന്ത്രണങ്ങളും പാതാളത്തിൽ ഇല്ല. അതുകൊണ്ടുതന്നെ കൊറോണ വരാതിരിക്കാൻ വേണ്ട മുന്കരുത്തലുകളെക്കുറിച്ച് പാതാളവാസികൾ ബോധവാന്മാരല്ല. അങ്ങനെ നമ്മുടെ മാവേലി തമ്പുരാൻ ഇത്തവണയും തന്റെ പ്രിയപ്പെട്ട പ്രജകളെ കാണാനായി തീരുമാനിച്ചു. കഴിഞ്ഞ രണ്ടുതവണത്തെ ദുരനുഭവം മനസ്സിലുണ്ടെങ്കിലും ഇത്തവണ പ്രശ്നമൊന്നും കാണില്ലെന്ന് മന്നൻ വിശ്വസിച്ചു. കഴിഞ്ഞ തവണ കേരളാ- പാതാൾ ഹൈവേയിലൂടെ കേരളത്തിലേക്ക് കേറിയ മാവേലി പിന്നീട് ഫൈബർ ബോട്ടിൽ നനഞ്ഞ് കുളിച്ചാണ് യാത്ര ചെയ്തത്.

ഓണം ഓൺലൈനായി വരെ ആഘോഷിക്കുന്ന മലയാളി തന്റെ ഈ പഴഞ്ചൻ കോലം ഔട്ട്ഡേറ്റഡ് ആയി കാണും എന്ന് മനസ്സിലാക്കിയ മഹാബലിത്തമ്പുരാൻ അടിമുടി ഒന്നു മാറി. കാലത്തിനൊപ്പം കോലവും മാറിയ നമ്മുടെ മന്നൻ തന്റെ ഹാർലി ഡേവിഡ്സൺ ബൈക്കിലാണ് ഇത്തവണ കേരള സന്ദർശനത്തിന് പുറപ്പെട്ടത്.

ഒരു ജോഡി മഴക്കോട്ടും ഒരു സ്പെയർ കുടയും കയ്യിൽ കരുതാൻ മൂപ്പർ മറന്നില്ല. അങ്ങനെ മലബാർ മേഖലയിലാണ് പുള്ളി ആദ്യം സന്ദർശനത്തിനെത്തിയത്. വലിയ ആഘോഷങ്ങളോ ആർഭാടങ്ങളോ എങ്ങുംതന്നെ കാണാൻ മന്നന് സാധിച്ചില്ല. ഇത്തവണ കേരളക്കരയിൽ ഓണം കൊണ്ടാടുന്നില്ലേ എന്നുപോലും പുള്ളി ഒരുവേള ശങ്കിച്ചു.

എങ്കിലും പ്രത്യാശ കൈവിടാതെ മാവേലി തമ്പുരാൻ ഓണപ്പാട്ടുകളും പൂക്കളവും ആഘോഷങ്ങളും ഉള്ളയിടങ്ങൾ പരതി നടന്നു. എങ്ങും വലിയൊരഘോഷമോ മറ്റോ കാണാൻ കഴിയാതെ പുള്ളി നിരാശനായി. അങ്ങിങ്ങായി കണ്ട കുട്ടികളുടെ ആഘോഷവും മറ്റും കൊണ്ട് തൃപ്തിപ്പെട്ട അദ്ദേഹം അടുത്ത ഭാഗത്തേക്ക് നീങ്ങി.