അങ്ങനെ മഴയൊക്കെ കണ്ട് ഇരിക്കുമ്പോളാണ് അല്പം വിജ്ഞാനം വിളമ്പിയാൽ എന്ത് എന്ന് തോന്നിയത്….!! എന്നാൽ പിന്നെ ഒരു കഥതന്നെയായാലെന്ത് , ഒരു അനുഭവ കഥതന്നെയായിക്കളയാം.. 

അങ്ങനെ എന്തെഴുതും എന്നോർത്തിരുന്നപ്പോൾ പെട്ടന്ന് മനസിൽ വന്നത് ഇന്നത്തെ ഓണ്‍ലൈന്‍ സമൂഹ മാധ്യമങ്ങളിൽ നിറസാന്നിധ്യമായി നിലകൊള്ളുന്ന ഒരു വിഭാഗം ആൾക്കാരെ പറ്റിയാണ്… അതേ സൂർത്തുക്കളെ സദാചാര പോലീസ് യുഗത്തിനും കലിപ്പന്റെ കാന്താരി യുഗത്തിനും ശേഷം ഇപ്പോൾ ഓണ്‍ലൈന്‍ ആങ്ങള’ യുഗം ആരംഭിച്ചു കഴിഞ്ഞു.

 

ഞാനെന്ത് തേങ്ങയാ ഈ പറയുന്നെ എന്നല്ലേ നിങ്ങളിപ്പോ ആലോചിച്ചേ…!! പറഞ്ഞല്ലോ,  ഇതൊരു അനുഭവ കഥയാണ്…!!

മുകളിലെ ഡയലോഗ് എന്റെ ആത്മ മിത്രം എന്നോട് പറഞ്ഞതാണ്..എന്റെ സൃഷ്ടിയല്ല ഭാവന ഒട്ടുമില്ല..!! ഇവിടെ അനുഭവസ്ഥനെന്നു പറഞ്ഞത് , ഈ ഞാൻ തന്നെയാണാള്..

വ്യക്തി സുരക്ഷയെ കരുതി ഞാൻ എന്റെ പേര് പറയുന്നില്ല..’ഞാൻ’ എന്നു തുടരാം..!!

 

കൊറോണ , ലോക്ക്ഡൌണ്‍ , തൊഴിലില്ലായ്മ , പേമാരി , കൊതുക് എല്ലാം കൂടി ഒരു ദുരിതപൂർണമായ ജീവിതം നയിക്കുന്ന നിങ്ങളെ പോലൊരു മലയാളിയാണ് ഞാനും..സമാധാനത്തിന്റെ ഓസ്കാർ അവാർഡ് ഇന്നല്ലേൽ നാളെ കിട്ടും എന്നൊരു പ്രതീക്ഷ നിങ്ങളെ പോലെ എനിക്കുമുണ്ട് , ഇത്രേം പച്ചപാവമായ ഈയുള്ളവന്റെ ജീവിതത്തിൽ ഈ അടുത്തിടെ നടന്ന ഒരു ദുരന്ത സംഭവമാണ് ഇവിടെ പറയാൻ പോകുന്നത്..

ഓണമൊക്കെ ആഘോഷിച്ച് , സമൂഹ മാധ്യമങ്ങളിൽ ഒക്കെ കേറി നിരങ്ങിയിരിക്കുമ്പോളാണ് പ്രസ്തുത സംഭവം അരങ്ങേറിയത്. സംഗതി വേറൊന്നുമല്ല പഴയൊരു സ്നേഹിതയുടെയൊരു പോസ്റ്റ് അവിചാരിതമായി നമ്മുടെ ‘വിശ്വവിജ്ഞാനകോശങ്ങൾ’  ഗ്രൂപ്പിൽ  കണ്ടു..ആളൊരു സുന്ദരിയാണ് കേട്ടോ..! നമ്മൾ പിന്നെ അല്പസ്വല്പം വായിനോട്ടവും കലാപരിപാടികളുമെല്ലാം ഉണ്ടായിരുന്നതുകൊണ്ട് പെമ്പിള്ളേർക്കെല്ലാം നമ്മളെ അറിയാം..ഇവക്കും അറിയാം..പക്ഷെ ഇതു കേട്ട് ഞാനൊരു തിത്തരികിടയാണെന്നൊന്നും നിങ്ങൾ കരുതല്ലു കേട്ടോ..അമ്മയും പെങ്ങളുമൊക്കെ ഉള്ള, അവരെ തിരിച്ചറിയാൻ കുഴപ്പമൊന്നുമില്ലാത്ത ഒരു സാധു തന്നെ..!

 

അപ്പൊ  ഈ സ്നേഹിതയോടൊന്ന് പരിചയം പുതുക്കിയേക്കാം എന്നുള്ള ധാരണയിൽ ഈയുള്ളവൻ പ്രസ്തുത പോസ്റ്റിൽ ഒരു കമെന്റങ്ങു കാച്ചി..കമെന്റും എഴുതി സെന്റ് ബട്ടനും ഞെക്കി വടക്കൻ സെൽഫീലെ ഉമേഷിനെ പോലെ മന്ദസ്മിതം തൂകാൻ തുടങ്ങിയതെ ഉള്ളു , ഉടനെ റീപ്ലൈ നോട്ടിഫിക്കേഷൻ വന്നു..ആഹാ..!! പിന്നേം വന്നു , ചറപറ വന്നുകൊണ്ടേയിരുന്നു  ..