ഇരട്ടപ്പഴം [Hyder Marakkar] 522

“””വല്യമ്മായി അമ്മു എന്തിയെ??”””
ഒരു റൗണ്ട് വീട് മൊത്തം അരിച്ചു പെറുക്കിയിട്ടും പെണ്ണിനെ അവിടെ എങ്ങും കാണാത്തതുകൊണ്ട് ഒടുക്കം അടുക്കളയിൽ പാത്രം കഴുക്കികൊണ്ടിരുന്ന വല്യമ്മായിയോട് തന്നെ ചോദിക്കേണ്ട വന്നു…..

“””ആ കിച്ചുവോ….. എന്താടാ എന്ത് പറ്റി??”””
നട്ടുച്ചയ്ക്ക് ഓടി കിതച്ചു വന്ന എന്റെ കോലം കണ്ടിട്ടാവണം എന്റെ ചോദ്യത്തിനുള്ള മറുപടിക്ക് പകരം അമ്മായി അത് ചോദിച്ചത്…

“””ഏയ് ഒന്നൂല്ല…… അമ്മു എവിടെ??””
എന്നോടാ കളി… മറുചോദ്യത്തിനുള്ള ഉത്തരം കൊടുക്കാതെ ഞാൻ എന്റെ ചോദ്യം ആവർത്തിച്ചു…..

“””അവൾ വടക്കേപറമ്പില് കാണും, ആ ഊഞ്ഞാല് കെട്ടികൊടുത്തതിന് ശേഷം പെണ്ണ് ഇരുവത്തിനാല് മണിക്കൂറും അതിന്റെ മേലെയാണ്”””
നട്ടുച്ച നേരത്തെ പെണ്ണിന്റെ ഊഞ്ഞാൽ ആട്ടത്തെ കുറിച്ചോർത് അല്പം അരിശത്തോടെയാണ് അമ്മായി അത് പറഞ്ഞത്… എന്തായാലും എനിക്ക് വേണ്ട മറുപടി കിട്ടിയ സ്ഥിതിക്ക് “”ഞാൻ പോട്ടെ വല്യമ്മായി”” എന്നും പറഞ്ഞുകൊണ്ട് ഞാൻ വടക്കേപറമ്പിലേക്ക് ഓടി….

“”ഡാ കിച്ചൂ…….. ഈ പാത്രം കൊണ്ടുപോടാ……… അവിടത്തെയാ”””

“”പിന്നെ എടുക്കാ വല്യമ്മായി…….”””
പിന്നിൽ നിന്ന് അമ്മായി പറഞ്ഞത് കേട്ട് തിരഞ്ഞു നോക്കാതെ അതെ ഈണതിൽ മറുപടി കൊടുത്തുകൊണ്ട് ഞാൻ ഓടി….. ആന കാര്യത്തിന്റെ ഇടയിലാണ് ഒരു ചേന കാര്യം….
***

*അമ്മു*…… വല്യമ്മാമയുടെ രണ്ടാമത്തെ സന്തതി, എന്റെ മുറപ്പെണ്ണ്….. പണ്ട് കളിവീടുണ്ടാക്കി അച്ഛനും അമ്മയും കളിച്ചിരുന്ന പ്രായം തൊട്ട് അവൾ എന്റെ പെണ്ണാണെന്ന് ഞാൻ മനസ്സിലാക്കിയിരുന്നു, അവളും…..
പണ്ടെന്ന് പറയുമ്പോൾ അധികം ഒന്നും ആയിട്ടില്ല കേട്ടോ, ഞാൻ അച്ഛനും അമ്മയും കളിയിൽ നിന്നും വിരമിച്ച് വയലിൽ ചേട്ടന്മാരുടെ കൂടെ പന്ത് കളിക്കാൻ തുടങ്ങിയിട്ട് ഇപ്പോ ഏകദേശം രണ്ട് വർഷം ആയി കാണും……
***