ചിങ്കാരി 5 [Shana] 421

പിന്നെ അച്ചുവിന്റെ ഫോട്ടോ എടുത്തു മാധ്യമപ്രവർത്തകർ… കൂട്ടത്തിൽ അവളെ അഭിനന്ദിക്കാനും മറന്നില്ല അറസ്റ്റിന്റ ബാക്കി വിവരങ്ങളും ശേഖരിച്ച ശേഷം അവർ തിരിച്ചു പോയി
ഈ സമയമൊക്കെയും അജിയെ അച്ചു ശ്രദ്ധിച്ചതേ ഇല്ല അവളുടെ ആ പ്രവർത്തിയിൽ അജി ആകെ ദുഃഖത്തിൽ ആയി….

” എന്നാലും എൻ്റെ അജീ നമ്മുടെ അച്ചുവിന് ഇത്ര ദൈര്യമോ..ടാ അവളെ പിണക്കാതെ ഇരുന്നെങ്കിൽ നിനക്കും അവളുടെ ഒപ്പം ടിവിയിലും പത്രത്തിലുമൊക്കെ വരായിരുന്നു , എന്നാലും ഇത്രയും നാളും ഒപ്പം നീ നിന്നിട്ട് അവസാനം നിന്നെ അവൾ ചവിട്ടി പുറത്താക്കിയല്ലോ അജി.. നിനക്ക് അങ്ങനെ വേണം ” അനു അവനെ കളിയാക്കി

” ദേ പരട്ട ചേച്ചീ മിണ്ടാതെ ഇരുന്നോണം അല്ലേൽ തന്നെ അവളുടെ ഉടക്ക് കാരണം പ്രാന്തുപിടിച്ചിരിക്കുവാ ” അജി ദേഷ്യത്തോടെ പറഞ്ഞു…അതോടെ അനു വായ പൂട്ടി

” നിങ്ങൾ വീട്ടിലേക്ക് പൊയ്ക്കോ , ഇനി ഞാൻ വിളിപ്പിക്കുമ്പോൾ വന്നാൽ മതി സാധങ്ങൾ കൈ പറ്റാൻ, അച്ചു മിടുക്കിയായി പഠിക്കണം കേട്ടോ ” എസ് ഐ പറഞ്ഞുനിർത്തി

” സർ, എനിക്കൊരു ഹെല്പ് വേണം , എനിക്കും സാറിനെ പോലെ പോലീസ് ആകണം , ഇനി എന്തൊക്കെയാ ചെയ്യേണ്ടതെന്ന് പറഞ്ഞു തരുമോ ” കുറേ നേരമായി ഒരവസരം നോക്കി നിന്ന അച്ചു അയാളോട് പറഞ്ഞു

” അതിനെന്താ തീർച്ചയായും പറഞ്ഞു താരാല്ലോ , ഇപ്പോ എന്തായാലും അച്ചു വീട്ടിലേക്ക് പൊയ്ക്കൊ കുറച്ചു തിരക്കുണ്ട് , ഞാൻ വീട്ടിലേക്ക് വിളിക്കാം മോളെ എന്നിട്ട് എല്ലാം പറഞ്ഞു തരാം ”

അച്ചു സന്തോഷത്തോടെ തലയാട്ടി പിന്നെ എസ് ഐ ക്ക് ഷേക്ക്‌ ഹാൻഡും കൊടുത്തു പുറത്തേക്കിറങ്ങി വീട്ടിലേക്ക് എല്ലാരും തിരിച്ചു പോയി … പോകുന്ന വഴിയിൽ വെച്ചൊന്നും അവൾ ആരോടും മിണ്ടിയില്ല ആർക്കും മുഖം കൊടുത്തുമില്ല അവളോട്‌ എല്ലാവരും ചെയ്ത പ്രവർത്തി അവളുടെ മനസ്സിനെ വല്ലാതെ നൊമ്പരപ്പെടുത്തിയിരുന്നു അജിയോടായിരുന്നു കൂടുതലും ദേഷ്യവും സങ്കടവും എല്ലാരും കളിയാക്കിയപ്പോഴും അവൻ കൂടെ ഉണ്ടാകുമെന്ന് അവൾ പ്രതീക്ഷിച്ചിരുന്നു അവനും അവരുടെ കൂടെ കൂടുമെന്ന് അവൾ കരുതിയില്ല അത് അവളുടെ മനസ്സിൽ വല്ലാത്ത സങ്കടമായി മാറി.