ചിങ്കാരി 1 [Shana] 224

“എന്താ രാധുവേച്ചി ബഹളം , എന്തിനാ അവളെ ഓടിക്കുന്നത് ” ബഹളം കേട്ട് ഓടിയെത്തിയ അപ്പുറത്തെ വീട്ടിലെ ലത മതിലിൻ്റെ അരികിൽ നിന്നു ചോദിച്ചു.

“എൻ്റെ ലതേ ഇവളെ ഞാനിനി എന്തു ചെയ്യും എനിക്കു വയ്യ , ഇത്ര തലതെറിച്ചതിനെയാണെല്ലോ ഞാൻ പെറ്റിട്ടത്”

“എന്തു പറ്റി ചേച്ചീ ഇങ്ങനെയൊക്കെ പറയാൻ”

” തലവേദന സഹിക്കാൻ വയ്യാതെ ഒന്നു കിടന്നതാ ,മയങ്ങി വരുമ്പോഴാ മുറ്റത്ത് എന്തോ വീഴുന്ന ശബ്ദം… ഓടി വന്നു നോക്കുമ്പോൾ അവളും അജിയും കൂടി പാരപ്പറ്റിൽ നിന്ന് താഴേക്കു ചാടിയിരിക്കുന്നു , വല്ലതും പറ്റിയെങ്കിലോ. മൂത്തതുങ്ങളെ കൊണ്ട് ഒരു പാടുമില്ല ഇവളെ എന്തു ചെയ്യാനാ ,പ്ലസ് റ്റു ആയി ഇനിയെങ്കിലും അടങ്ങി ഇരുന്നു കൂടെ ഇങ്ങനെ തലതെറിച്ചു നടക്കാതെ ” രാധിക ദേഷ്യത്തോടെ പറഞ്ഞു.

” ചേച്ചീ ഇക്കാര്യത്തിൽ അവളെ മാത്രം കുറ്റം പറയല്ലേ. അവൻ്റെ കൂടെ കൂട്ടുകൂടിയിട്ടാ ഇങ്ങനെയൊക്കെ , അവനോട് വരരുതെന്ന് പറയ് പകുതി ആശ്വാസം ആകും ”

“ആ ചെക്കനുള്ളതാ എൻ്റെ സമാധാനം ,അവനാകുമ്പോൾ പേടിക്കണ്ട എൻ്റെ ആങ്ങളയുടെ മോനല്ലേ വേറെ വല്ലവരുമാണെങ്കിലോ…അവളുടെ കൂട്ടുമൊത്തം ആൺകുട്ടികളാ എത്ര വേണ്ടന്ന് പറഞ്ഞാലും കേൾക്കില്ല ഇതാകുമ്പോൾ ഇവൻ്റെ നോട്ടം കിട്ടുമല്ലോ” രാധിക നെടുവീർപ്പിട്ടു കൊണ്ട് മുടി വാരികെട്ടി.

” ചേച്ചി സമാധാനമായി കിടക്ക് അവളെ ഇനി ഇപ്പൊ നോക്കണ്ട ,ഇതിൻ്റെ ചൂടാറാതെ വരില്ലല്ലോ “ലത രാധികയെ സമാധാനിപ്പിച്ച് വിട്ടു.

ഇതേ സമയം അച്ചു അജിയുടെ വീട്ടിൽ എത്തിയിരുന്നു.

“ടീ പ്രശ്നമാകുമെന്നാ തോന്നുന്നത് , എന്നേയും അമ്മായികണ്ടു കാണും..ഇനിയിപ്പോ എന്തു ചെയ്യും വീട്ടിലറിഞ്ഞാ തീർന്നു ”

“എന്തു ചെയ്യാൻ വീട്ടിൽ ചെല്ലുമ്പോൾ രണ്ട് കിട്ടും ,ഇപ്പൊ പിടി കൊടുത്താൽ എണ്ണവും പവറും കൂടും ,അതാ ഓടിയത് ” അച്ചു ഒരു കൂസലുമില്ലാതെ പറഞ്ഞു.

“ഞാനപ്പഴേ പറഞ്ഞതാ ഇതു വേണ്ടന്ന് അല്ലേലും നിനക്ക് പറഞ്ഞാൽ കേൾക്കാൻ കഴിയില്ലല്ലോ ” അജി ദേഷ്യപ്പെട്ടു.

“ടാ നാളെ ആ കഷണ്ടിയുടെ റെക്കോർഡ് വെക്കണം ,ഞാൻ ഒന്നു പോലും എഴുതിയില്ല ,ചാടി കൈയ്യൊടിക്കാന്നാ കരുതിയെ എട്ടു നിലയിൽ പൊട്ടുമെന്ന് കരുതിയില്ല ” അവൾ നിരാശയോടെ അവനെ നോക്കി