Cappuccino☕ [Aadhi] 2740

” എടാ മരയൂളേ.. ഒരു പെണ്ണ്, അതും നിമ്മിയെ പോലെ കാണാൻ കൊള്ളാവുന്ന, എല്ലാവരും ഗേൾഫ്രണ്ടാക്കണമെന്നു വിചാരിക്കുന്നൊരു പെണ്ണ്, കോഫി കുടിക്കാൻ വരാമോ എന്ന് ചോദിക്കുമ്പോൾ തുണിയലക്കാനുണ്ടെന്നു അവളോട് മറുപടി പറഞ്ഞെന്നു കേട്ടാൽ ആൾക്കാർ നിന്നെ കല്ലെടുത്തെറിയും.. നീയാ ഫോണെടുത്തു അവളെ വിളിക്ക്, എന്നിട്ട് പറ, പതിനൊന്നിനല്ല, പത്തുമണി മുതലേ നീ ഫ്രീയാണെന്നു. വേണേൽ നിന്റെ തുണിയൊക്കെ ഞാനലക്കിത്തരാം.. “, എന്റെ നേർക്ക് മൊബൈലെടുത്തു നീട്ടിക്കൊണ്ടു അവൻ പറഞ്ഞു.

” ശരിക്കും? ”

” എന്ത് ശരിക്കും? ”

” നീ തുണിയലക്കി തരുമോ? ”

” തുണി.. ഞാനൊന്നും പറയുന്നില്ല. അടുത്ത ഫ്ലിപ്കാർട്ടിന്റെ ഓഫർ വരട്ടെ, നമുക്കൊരു വാഷിംഗ് മെഷീൻ വാങ്ങണം. ഇനിയാരെങ്കിലും ഇങ്ങനെ പറഞ്ഞാൽ ഇങ്ങനെ മണ്ടത്തരം പറയാൻ പാടില്ലല്ലോ..”

എന്റെ ചിരികണ്ടു അവൻ വീണ്ടും കൽപ്പിച്ചു.

” ഇളിച്ചോണ്ടിരിക്കാതെ അവളെ വിളിക്കെടാ..”

” അതിനെന്റെ കയ്യിൽ നമ്പർ ഇല്ലെടാ.. അവളുടെ കയ്യിലെ എന്റെ നമ്പറുള്ളൂ ”

” അടിപൊളി.. ഇനിയവൾ വിളിച്ചില്ലെങ്കിലോ? നാളത്തെ കാപ്പിയും പോയി, എല്ലാം പോയി.. നീയിവിടിരുന്നു തുണിയലക്കിക്കോ “, ദേഷ്യത്തോടെ പറഞ്ഞുകൊണ്ട് അവൻ എണീറ്റുപോയി.

കുറച്ചുനേരം അവൻ പറഞ്ഞത് ആലോചിച്ചുകൊണ്ടു കിടന്നപ്പോഴാണ് ഫോണിലേക്കൊരു കാൾ വന്നത്.

” ഹലോ.. ഞാൻ നിമ്മിയാണ് ”

” ഹായ്.. ഞാൻ അങ്ങോട്ട് വിളിച്ചാലോ എന്ന് വിചാരിച്ചതാ. ബട്ട് നമ്പറില്ലായിരുന്നു ”

” ഇതാണെന്റെ നമ്പർ. സേവ് ചെയ്‌തുവെച്ചോ.. നാളെ ബുദ്ധിമുട്ടില്ലല്ലോ? പുറത്തുപോവാമല്ലോ? ” അവൾ ചോദിച്ചു.

” ആ കുഴപ്പമില്ല. ഫ്രീയാണ്. ”

” അപ്പൊ വാഷ് ചെയ്യാനുണ്ടെന്നു പറഞ്ഞത് ? ”

” അത് കുഴപ്പമില്ല, ഡേവിസ് അലക്കിത്തരാമെന്നു പറഞ്ഞു “, ഞാനൊരു ചിരിയോടെ പറഞ്ഞു.

” പാവം.. അപ്പൊ ശരി, നാളെ കാണാം. ഗുഡ് നൈറ്റ് ”

” ഗുഡ് നൈറ്റ് ”

ഫോൺ കിട്ടാവുന്ന ശബ്ദം കേട്ടു.

” നീയെന്നെ എല്ലായിടത്തും നാണം കെടുത്തുമല്ലേ?” കുപ്പിയിൽ വെള്ളവുമായി റൂമിലേക്ക് വന്ന ഡേവിസ് ചോദിച്ചു.

**********

ജീൻസും ഷർട്ടുമിട്ടു ഫോറം മാളിന് മുന്നിലെത്തിയപ്പോൾ നേരം പന്ത്രണ്ട് കഴിഞ്ഞിരുന്നു. നാശം പിടിച്ച ട്രാഫിക്. ഫ്‌ളൈഓവർ വഴിയുള്ള ബസെന്നും വിചാരിച്ചു കയറിയത് ഫ്ലൈ ഓവറിനു താഴെക്കൂടിയുള്ള ബസിലായിരുന്നു. നിമ്മിയെ ഫോണിൽ വിളിച്ചു പറഞ്ഞതുകൊണ്ട് പ്രശ്നമുണ്ടായില്ല. അവളും ഏകദേശം അതിനനുസരിച്ചു സമയം കണക്കാക്കി ഇറങ്ങി.

ധൃതിയോടെ മാളിലേക്ക് കേറാൻ തുടങ്ങുമ്പോൾ തലയും മുഖവുമെല്ലാം മൂടിക്കെട്ടിയ ഒരു സ്ത്രീരൂപം, കയ്യിലൊരു ഷോപ്പിംഗ് കവറുമായി അടുത്തേക്ക് വന്നു.

” ഹായ്.. ”