?കരിനാഗം 13? [ചാണക്യൻ] 311

രുദ്രരൂപ ആ പെൺകുട്ടിയുടെ ദേഹത്തിന് നേരെ അടുക്കവേ ചുറ്റും ഒന്നു ഫണമുയർത്തി നോക്കി..

കത്തിജ്വലിച്ചുനിൽക്കുകയായിരുന്ന സൂര്യൻ ഞൊടിയിടയിൽ കാർമേഘങ്ങൾക്കു പിന്നിൽ പോയോളിച്ചു..

ഭയം മൂലം.

പകൽ പോലെ നിന്നിരുന്ന അന്തരീക്ഷം ഇപ്പൊ ത്രിസന്ധ്യ പോലെ നിറം മങ്ങി.

മൂടിക്കെട്ടിയ മാനത്ത് ഇടിവെട്ടും കൊള്ളിയാനും കാണപ്പെട്ടു.

പ്രകൃതി പോലും ഒന്നനങ്ങാൻ പോലുമാകാതെ സ്തംഭിച്ചു നിൽക്കുകയാണ്.

തന്റെ ഗുരു ഓതിത്തന്ന സൂചനകൾ ശരിയാംവണ്ണമാണെന്ന്  തിരിച്ചറിഞ്ഞ  രുദ്രരൂപ സമയം ഒട്ടും പാഴാക്കാതെ ആ ശരീരത്തിനു സമീപം ഇഴഞ്ഞെത്തി.

ദീർഘമായി ഒന്നു നിശ്വസിച്ച ശേഷം രുദ്രരൂപ തന്നിൽ അവശേഷിക്കുന്ന അല്പമാത്രമായ ഊർജം ഉപയോഗിച്ച് തന്റെ ഉടൽ അൽപം കൂടി വലുതാക്കി.

ശേഷം രുദ്രരൂപ തന്റെ ഉടൽ കൊണ്ട് ആ പെൺകുട്ടിയുടെ ഉടലിനെയാകെ ചുറ്റി വരിഞ്ഞു.

അതിനു ശേഷം ഫണം ആ പെണ്ണിന്റെ മാറോട് ചേർത്തു വച്ചു.

ഇപ്പോഴും ആ മനുഷ്യ ശരീരത്തിൽ കേവലം ജീവകണികകൾ മാത്രമേ ഉണ്ടായിരുന്നുള്ളു.

അതു മനസിലാക്കിയ രുദ്രരൂപ സമയം പഴക്കാതെ തന്റെ ഗുരു പറഞ്ഞ വാക്കുകൾ ഒരിക്കൽ കൂടി ഓർത്തെടുത്തു.

തുടർന്നു ഫണം ഉയർത്തി നാവ് വെളിയിലിട്ട് ആ പെണ്ണിന്റെ തിരുനെറ്റിയോട് ചേർത്തു വച്ചു.

തുടർന്നു ആ പെൺകുട്ടിയുടെ ചുണ്ടിൽ പറ്റിയ നിണം പയ്യെ നാവുകൊണ്ട് ഒപ്പിയെടുത്തു.

ശേഷം പരകായ മന്ത്രം മൂന്നുതവണ ജപിച്ചു…

മന്ത്രോച്ചാരണം കഴിഞ്ഞതും രുദ്രരൂപക്ക് തന്റെ ശരീരത്തിന് എന്തൊക്കെയോ മാറ്റങ്ങൾ വരുന്നതായി അനുഭവപ്പെട്ടു.

അധികം വൈകാതെ തന്നെ രുദ്രരൂപയുടെ വാൽഭാഗം ആ പെൺകുട്ടിയുടെ ഉള്ളിലേക്ക് സന്നിവേശിക്കുവാൻ തുടങ്ങി.

രുദ്രരൂപയുടെ ഉടലിനെ ആ പെണുകുട്ടിയുടെ ദേഹം ആവാഹിച്ചു തുടങ്ങി.

രുദ്ര രൂപയെ പൂർണമായി ആവാഹിച്ചു കഴിഞ്ഞ ശേഷം ആ പെണ്ണിന്റെ ദേഹം പയ്യെ ഒന്നനങ്ങി.

പൊടുന്നനെ ശക്തിയിൽ ആ പെൺകുട്ടിയുടെ മിഴികൾ തുറക്കപ്പെട്ടു.

ആ മിഴികൾ സാധരണ മനുഷ്യന്മാരെപോലെ ആയിരുന്നില്ല…. മറിച് സർപ്പങ്ങളെപ്പോലെ നേർത്തതായിരുന്നു…

ആ പെൺകുട്ടി ചാടിയെഴുന്നേറ്റത്തും മാനത്തു നിന്നും കണ്ണഞ്ചിപ്പിക്കുന്ന കൊള്ളിയാൻ ഗർജ്ജനത്തോടെ ഭൂമിയിൽ വന്നു പതിച്ചു.

മരിച്ചുവെന്ന് കരുതിയ തന്റെ സഹപാഠി കണ്മുന്നിൽ ജീവനോടെ നിൽക്കുന്നത് കണ്ടു ആ ചെറുപ്പക്കാരന് ഇപ്പൊ ബോധം പോകുമെന്ന അവസ്ഥയായിരുന്നു.

രുദ്രരൂപ പയ്യെ തന്റെ കൈകൾ ഒന്നനക്കി നോക്കി.

പിന്നെ കാലുകളും.

പിന്നെ സ്വന്തം ശരീരമാകമാനം അനക്കുകയും പയ്യെ ഒന്നു തഴുകുകയും ചെയ്തു നോക്കി.