?കരിനാഗം 13?

Author : ചാണക്യൻ

[ Previous Part ]

 

(കഥ ഇതുവരെ)

അത്‌ SK ഗ്രൂപ്സ് എന്ന കമ്പനിയുടെ ഐഡി കാർഡ് ആയിരുന്നു.

അപ്പൊ ആ പെൺകുട്ടി ഈ കമ്പനിയിൽ ജോലി ചെയ്യുന്നതാണെന്ന് മഹിക്ക് മനസിലായി.

ആ ഐഡി കാർഡ് തിരികെ പേഴ്സിലേക്ക് വക്കാൻ നേരം മഹി ഒന്നൂടേ ആ ഫോട്ടോയിലേക്ക് നോക്കി.

ആ നക്ഷത്രകണ്ണുകളിലേക്ക്.

തന്റെ ട്രേഡ് മാർക്ക്‌ മറ്റൊരാളിലും കണ്ടതിന്റെ സന്തോഷത്തിൽ ആയിരുന്നു അവൻ.

പേഴ്സ്മായി അവൻ ഹോസ്പിറ്റലിലെ കൗണ്ടറിലേക്ക് പോയി.

അവിടെയുള്ള ടെലിഫോണിൽ നിന്നും മഹി SK ഗ്രൂപ്സ് കമ്പനിയിലേക്ക് വിളിച്ചു.

മറുവശത്ത് കാൾ എടുത്ത ആളോട് നിജ സ്ഥിതീകൾ പറഞ്ഞു ഏൽപ്പിച്ച ശേഷം പേഴ്സും ഫോണും കൗണ്ടറിൽ കൊടുത്ത് മഹി അവിടെ നിന്നും പിൻവലിഞ്ഞു.

—————————————————-

(തുടരുന്നു)

ജീപ്പും കൊണ്ട് ദ്രുത ഗതിയിൽ മഹി വീട്ടിൽ തിരിച്ചെത്തി.

മുറ്റത്ത് ജീപ്പ് നിർത്തിയതും മഹി ഒരു മൂളിപ്പാട്ടോടെ ഡോർ തുറന്ന് പുറത്തേക്കിറങ്ങി.

അപ്പൊ തന്നെ കണ്ടു സിറ്റ് ഔട്ടിൽ കലി തുള്ളി നിൽക്കുന്ന റോസ്മേരിയെയും അവളെ സമാധാനിപ്പിക്കുന്ന മറിയത്തെയും.

അപ്പോഴാണ് ഇന്റർവ്യൂന്റെ കാര്യം മഹി ഓർത്തത് തന്നെ.

അൽപം മുന്നേ നടന്ന സംഭവങ്ങൾ അവൻ ഒന്നു ഓർത്തു നോക്കി.

ഇന്റർവ്യൂവിന് പോകാൻ ബസ്റ്റോപ്പിൽ കാത്തു നിന്നതും അവിടെ പെട്ടെന്ന് ഒരു ആക്‌സിഡന്റ് നടന്നതും കുറെ ഗുണ്ടകൾ ഒരു പെൺകുട്ടിയെ പിടിച്ചു കൊണ്ടു പോകാൻ നോക്കിയതും അവളെ രക്ഷിച്ചു ആശുപത്രിയിൽ ആക്കിയതും മഹിയൊന്ന് ആലോചിച്ചു പോയി.

നീ എന്താടാ ഇന്റർവ്യൂ അറ്റൻഡ് ചെയ്യാതിരുന്നത്

കലി പൂണ്ടിരിക്കുന്ന റോസ്മേരി എളിയിൽ കൈ കുത്തികൊണ്ട് മുഖം ചുളിച്ചുകൊണ്ട് ചോദിച്ചു.

റോസ്മേരിയുടെ ചോദ്യം കേട്ട് മഹിയൊന്നും മിണ്ടിയതേയില്ല.

എന്താടാ ചോദിച്ചത് കേട്ടില്ലേ……. നിന്റെ നാവ് ഇറങ്ങി പോയോ?

മുഷ്ടി ചുരുട്ടി റോസ്മേരി മുറ്റത്തേക്ക് ചാടിയതും മഹി ഭയത്തോടെ ഒരടി പിന്നിലേക്ക് മാറി.

അതു പിന്നെ അറിയാതെ പറ്റിയതാ ചേച്ചി പെണ്ണെ…… നീ ക്ഷമിക്ക്.

എങ്ങനെ ക്ഷമിക്കാനാടാ കള്ള തിരുമാലി….. എത്ര കഷ്ടപ്പെട്ടാ ആ ജോലി ഞാൻ നിനക്ക് വേണ്ടി ഒപ്പിച്ചതെന്ന് അറിയാമോ?

റോസ്മേരി പല്ലിറുമ്മികൊണ്ട് വീണ്ടും ചോദ്യമെയ്തു.

എനിക്ക് അത്‌ അറിയാഞ്ഞിട്ടല്ല റോസു….. പോകുന്ന വഴിക്ക് ഒരു പെൺകുട്ടിക്ക് അപകടം സംഭവിച്ചു…… അപ്പൊ പിന്നെ അവരെ ആശുപത്രിയിൽ കൊണ്ടു പോയി വന്നപ്പോഴേക്കും ഇച്ചിരി വൈകിപ്പോയി….
നീ ക്ഷമിക്ക്.

നിഷ്കു മുഖഭാവത്തോടെ മഹി പയ്യെ പറഞ്ഞു.

റോസ്മേരി ദേവിയുടെ കടാക്ഷം ലഭിക്കുവാനായി.

അതു കേട്ടതും റോസ്മേരിപിന്നെ ഒന്നും മിണ്ടിയില്ല.

ഒരു നല്ല കാര്യത്തിനല്ലേ മോളെ മഹി മോൻ അങ്ങനെ ചെയ്തേ….. മോള് ക്ഷമിക്ക്.

മറിയവും മഹിയെ പിന്താങ്ങി.