𝗣𝗜𝗣𝗘𝗥 : 𝗡𝗜𝗚𝗛𝗧 𝗢𝗙 𝗗𝗢𝗖𝗧𝗢𝗥 𝗡𝗢𝗦𝗙𝗘𝗥𝗔𝗧𝗨 (𝐀 𝐒𝐚𝐦𝐩𝐥𝐞) – 𝗔𝘀𝗵𝘄𝗶𝗻𝗶 𝗞𝘂𝗺𝗮𝗮𝗿𝗮𝗻 9

പ്രൊഫസറുടെ പൊടുന്നനെയുണ്ടായ ഭാവമാറ്റം കണ്ട് ആബേൽ ഞെട്ടലോടെ കസേരയിൽ നിന്നെഴുനേറ്റു.

“ഇല്ല.. സാധ്യമല്ല. നീയി പറഞ്ഞ ഒരേയൊരു കാരണം കൊണ്ടാണ്, നിന്നോട് ഇതിൽനിന്നൊഴിഞ്ഞു നിൽക്കാൻ ഞാനാവശ്യപ്പെടുന്നത്.” പ്രൊഫസർ നിഷേധഭാവത്തിൽ മറുപടി നൽകി.

“ഒരിക്കലുമില്ല സർ… ഒരർത്ഥത്തിൽ പറഞ്ഞാൽ ഇതെന്റെ ഫാമിലിയുമായി ബന്ധപ്പെട്ടുകിടക്കുന്ന പേർസണൽ മാറ്ററാണ്. So I want to investigate about It” ആബേൽ വിട്ടുകൊടുത്തില്ല.

“നോ…ഈയൊരു കാര്യത്തിനാണ് നിനക്കെന്നെ കാണേണ്ടതെന്ന് നേരെത്തെയറിഞ്ഞിരുന്നെങ്കിൽ ഈ കൂടിക്കാഴ്ചയ്ക്ക് ഞാൻ സമ്മതിക്കില്ലായിരുന്നു…” ആബേലിനെ തീക്ഷണതയോടെ നോക്കികൊണ്ട് പ്രൊഫസർ തുടർന്നു…

“…ഒരിക്കൽ നിന്നെപ്പോലെ യുവത്വത്തിന്റെ തിളപ്പിൽ ഇതിനുപിന്നാലെ പോയവനാണ് ഞാൻ. എന്നാൽ ഈശ്വരന്റെ രക്ഷകൊണ്ട് പ്രാണൻ നഷ്ടമായില്ലെങ്കിലും എനിക്കതിന് പകരമായി  ജീവിതത്തിലെ പലതും കനത്ത വിലയായി നൽകേണ്ടിവന്നു.

ആ അൽപ്പകാലംകൊണ്ട് ഞാനനുഭവിച്ച നരകാവസ്ഥ നീയനുഭവിക്കാൻ ഇടവരുതരുതെന്ന പ്രാർഥന മാത്രമാണ് എനിക്കുള്ളത്. അങ്ങനെയൊരു അവസ്ഥ നിനക്കൊരിക്കലും താങ്ങാനാവില്ല. നിനക്ക് പോകാം ആബേൽ.”

രണജിത് കസേരയിൽ നിന്നെഴുനേറ്റ് ആ മുറിവിട്ട് പോകാനൊരുങ്ങിയതും ആബേൽ രണജിത്തിനോടായി തന്റെ സമചിത്തത വെടിയാതെ ഉറച്ച സ്വരത്തിൽ ചോദിച്ചു :

“അങ്ങനെയെങ്കിൽ സാറെന്തിനായിരുന്നു പണ്ട് എന്റെ പൂർവികരെക്കുറിച്ചും പതിനഞ്ചാം നൂറ്റാണ്ടിൽ കേരളത്തിലെ ഡച്ച് കോളനികളിലെ ജൂതവംശജരായ ജനങ്ങളെകുറിച്ചുള്ള ഗവേഷണവും ഇതിനോടൊപ്പം നടത്തിയത്.”

“എന്ത്…!” ആബേലിന്റെ വാക്കുകൾ കേട്ട് പ്രൊഫസർ ഞെട്ടലോടെ അവനെ തിരിഞ്ഞുനോക്കി. ഇനിയൊന്നും മറച്ചുവെച്ചിട്ട് കാര്യമില്ലെന്നും ആബേലിനെ തനിക്കുപോലും ഈ ഉദ്യമത്തിൽ നിന്ന് പിന്തിരിപ്പിക്കാനാവില്ലെന്നും രണജിത്തിന് മനസ്സിലായി.

ഒരു ദീർഘനിശ്വാസം വിട്ടുകൊണ്ട് പ്രൊഫസർ അവനോടായി തിരികെ ചോദിച്ചു…

“നിനക്കറിയണോ ഞാനാ ഗവേഷണം എന്തുകൊണ്ടാണ് പൂർത്തിയാക്കാതിരുന്നതെന്ന്…?”

ആബേൽ അതറിയണമെന്ന ഭാവത്തിൽ തലയാട്ടി.

“എന്നാൽ എന്റെ കൂടെ വരൂ..” ആബേലിനോട്‌ തന്റെ പിന്നാലെ വരാൻ പറഞ്ഞുകൊണ്ട് പ്രൊഫസർ തന്റെ ഓഫീസ് റൂമിൽ നിന്നും ഹാളിലേക്കുള്ള ഇടനാഴിയിലേക്ക് നടന്നു.

പ്രൊഫസർ ആ ഇടനാഴിയിലൂടെ നടന്നു വീടിന്റെ മുകൾനിലയിലേക്കുള്ള സ്റ്റെയർകേസിനടുത്തുള്ള ചെറിയ ഡോറിനടുത്തെത്തി ഡോർ തുറന്ന് അകത്തേക്ക് കേറി ലൈറ്റിന്റെ സ്വിച്ചിട്ടു.

‘ഇതെന്താണ്  അണ്ടർഗ്രൗണ്ട് സെക്ഷനോ..?’ ഭൂമിക്കടിയിലേക്കുള്ള ഒരു ഗോവണിയിൽ നിന്നാരംഭിച്ച ആ മുറി ചെന്നവസാനിക്കുന്നത് താഴെ മറ്റൊരു  ഡോറിന് മുന്നിലാണെന്ന് കണ്ട്  ആബേൽ അത്ഭുതം കൂറി.