𝗣𝗜𝗣𝗘𝗥 : 𝗡𝗜𝗚𝗛𝗧 𝗢𝗙 𝗗𝗢𝗖𝗧𝗢𝗥 𝗡𝗢𝗦𝗙𝗘𝗥𝗔𝗧𝗨 (𝐀 𝐒𝐚𝐦𝐩𝐥𝐞) – 𝗔𝘀𝗵𝘄𝗶𝗻𝗶 𝗞𝘂𝗺𝗮𝗮𝗿𝗮𝗻 9

അവൻ കോട്ടിന്റെ പോക്കറ്റിൽ നിന്നൊരു പ്ലാസ്റ്റിക് കവർ പുറത്തെടുത്ത് അതിലുണ്ടായിരുന്ന വക്കുകൾ പൊടിഞ്ഞുതുടങ്ങിയ  മഞ്ഞ നിറം കലർന്ന കടലാസെടുത്ത് അയാൾക്ക് നൽകി.

രണജിത് അത്‌ വാങ്ങി അതിലെഴുതിയിരുന്ന മങ്ങിയ വാക്കുകൾ  വായിക്കാൻ തുടങ്ങിയെങ്കിലും മുന്നോട്ടു വായിച്ചുപോകവേ അകാരണമായൊരു ഭീതി തന്നെ ഗ്രസിക്കുന്നതായി  അയാളറിഞ്ഞു…

‘കെയ്‌നിന്റെ കുഴലൂത്തുകാർ…’ രണജിത്തിന്റെ മനസ്സ്‌ ഭീതിയോടെ മന്ത്രിച്ചു.

“പൗരാണിക ഭാരതം കണ്ട മഹത്തായ രാജവംശമായ വിഭൂതിദേവ വംശസ്ഥാപകനായ ശ്രീ വിക്രമശാക്യ അഗസ്ത്യ ചക്രവർത്തി അദ്ദേഹത്തിന്റെ ഭരണകാലത്ത്, അന്നേവരെയുള്ള കാലഘട്ടം വരെ ലോകം ആർജിച്ചെടുത്ത എല്ലാ അറിവുകളോടൊപ്പം വർത്തമാന- ഭാവികാലത്തെ  ആഗോള മാനവകുലത്തിന്റെ പുരോഗതിയ്ക്കും  ഉപകരിക്കുന്ന പുതിയ അറിവുകൾ കണ്ടുപിടിക്കാനും പ്രയോഗിക്കാനും വേണ്ടി നിയോഗിച്ച  Defensive Order of Navaratnas ന്റെ അമൂല്യമായ അറിവുകൾ വീണ്ടെടുക്കുകയോ,

അതുമല്ലെങ്കിൽ  അനേക കാലങ്ങൾക്ക് മുൻപ് ആ അറിവുകൾ വീണ്ടെടുക്കുന്നതിനുള്ള കഠിനപ്രയത്നങ്ങൾക്കിടെ, കെയ്നിന്റെ കുഴലൂത്തുകാരെന്ന അജ്ഞാത സംഘടനയുടെ കറുത്ത കരങ്ങളാൽ രക്തസാക്ഷിയാകേണ്ടി എന്റെ പൂർവികൻ ആന്റണി ഷാഫറുടെ നിഗൂഢ ജീവിതത്തെകുറിച്ചറിയാനുമായി ;

ഹിറ്റ്ലറുടെ നാസി ഗവണ്മെന്റിലെ Defense of Reich കൗൺസിലിലെ മെമ്പറായിരിക്കെ  രഹസ്യമായി നടത്തിയ പരിശ്രമങ്ങൾ വിധിയുടെ ക്രൂരമായ ഒറ്റുകൊടുക്കലിലൂടെ ചതിക്കപ്പെട്ട്  ഹിറ്റ്ലറുടെ ഗെസ്റ്റെപ്പോകളാൽ  പിടിക്കപ്പെടും മുൻപ് ഉപേക്ഷിച്ചു പോകേണ്ടായി വന്നിട്ടുണ്ടെനിക്ക്.

എന്നാൽ എന്റെ പൂർവികരുടെ ആത്യന്തിക ലക്ഷ്യമൊരിക്കലും എനിലൊടുങ്ങുകയില്ല.  എന്റെ ഭാവി തലമുറകൾ അതിനിയും  തുടരും…അന്തിമ ലക്ഷ്യം കൈവരിക്കും വരെ.”

  –     ആൽബർട്ട് ഷാബർ

ഇതായിരുന്നു ആ കടലാസ്സിലെ ഉള്ളടക്കം.

“ആബേൽ ഫിലിപ്പ്സൺ…! ഇത് നിന്റെയോ എന്റെയോ പരിധികളിൽ ഒതുങ്ങുന്ന അന്വേഷണമല്ല. ഈ എഴുതിയിരിക്കുന്നത് സത്യമാണെങ്കിൽ നിന്റെ അന്വേഷണം ഇപ്പോൾ ഇവിടെവെച്ച് നിർത്തിക്കൊളുക. ഇതേപ്പറ്റി കൂടുതലന്വേഷിക്കുന്നത് നിന്റെ ജീവന് ആപത്താണ്.”

തന്റെയുള്ളിലെ ഭീതി പുറത്തുകാട്ടാതെ രണജിത് സിംഗ് തന്റെ മുന്നിലെ പുസ്തകവും കടലാസും  ആബേലിനു നൽകികൊണ്ട് അവനോട് പുറത്തുപോകാൻ ആത്ജാപിച്ചു.

“പ്രൊഫസർ… അങ്ങെന്താണ് ഈ പറയുന്നത്..! പലപ്പോഴും കോളേജിൽ  മറ്റു അധ്യാപകരുടെയും വിദ്യാർത്ഥികളുടെയും മുന്നിൽവെച്ച് ഞാനാണ് സാറിന്റെ പ്രിയപ്പെട്ട വിദ്യാർത്ഥിയെന്ന് ഉറക്കെ പറഞ്ഞിട്ടുള്ള സാറിന് ഇക്കാര്യത്തിൽ എന്നെ സഹായിക്കാനാവില്ലെന്നാണോ…?”