❤️✨️ശാലിനിസിദ്ധാർത്ഥം10✨️❤️ [??????? ????????] 349

അദ്ദേഹത്തിന്റെ ആ വാക്കുകൾ അക്ഷരാർത്ഥത്തിൽ അർജുനെ ഞെട്ടിച്ചിരുന്നു… അവനത് കേട്ട് ചാടിയെഴുനേറ്റു.

: “അങ്ങേയ്ക്കിത് നേരെത്തെ അറിയാമായിരുന്നോ ഗുരുജി… അറിയാമായിരുന്നുവെങ്കിൽ എന്തു കൊണ്ടെന്നോട് അങ്ങിത് പറഞ്ഞില്ല. അങ്ങൊരു ചെറുവിരൽ ചലിപ്പിച്ചിരുന്നെങ്കിൽ ഞാൻ ആ വിഷസർപ്പങ്ങളെ തേടിച്ചെന്നു കൊന്നേനെ… ” അവൻ ഏതൊക്കെയോ പുലമ്പി.

അർജുൻ വികാരഷോഭത്താൽ വിറയ്ക്കുകയായിരുന്നു. താനിന്നോളം വളരെയധികം സ്നേഹബഹുമാനങ്ങൾ നല്കി പോന്ന ഗുരുജിയോട് അവനാദ്യമായി നീരസം തോന്നി.

തമ്പുരാൻ ഒരു ദീർഘശ്വാസം വിട്ടുകൊണ്ട് അവിടെന്നെഴുനേറ്റു. എന്നിട്ട് അർജുന്റെ തോളിൽ കൈവെച്ചു…

:” ഉണ്ണീ അർജുനാ, ദയവായി ശാന്തനാകൂ… ഞാനൊന്നു പറയട്ടെ… ഞാനി പറഞ്ഞതൊന്നും എനിക്കാ സമയത്ത് അറിയില്ലായിരുന്നു… ഈ സംഭവങ്ങൾക്ക് മൂന്നു മാസത്തിനു ശേഷം ഞാനൊരു മഹാസിദ്ധനെ പോയി കണ്ടിരുന്നു…”

തമ്പുരാൻ അർജുനെ ശാന്തനാക്കാൻ ശ്രമിച്ചുകൊണ്ട് തുടർന്നു. : “കഴിഞ്ഞ കാലത്തിലെയും, വരാനിരിക്കുന്ന കാലത്തിലെയും സംഭവങ്ങൾ കാണുവാൻ കഴിയുന്ന ത്രികാലഞ്ജാനിയയൊരു സിദ്ധനാണ് ഇതെല്ലാം എന്നോട് പറഞ്ഞത്…”

“അദ്ദേഹം ആരാണ് ഗുരുജീ…???” തന്റെ ഗുരു പറയുന്നത് കേട്ട് ശാന്തനായ അർജുൻ ചോദിച്ചു.

” സർവവിജ്ജാനിയായ അദ്ദേഹം, ഒരു ഉപദേശകൻ മാത്രമല്ല… നമ്മുടെയൊരു കുടുംബസുഹൃത്ത് കൂടെയാണ്…

അന്ന് സിദ്ധാർഥിനു സംഭവിച്ച ദുരന്തത്തെക്കുറിച്ചും, വർഷയുടെ മരണത്തിന്റെ പൂർണമായ വിവരങ്ങളുമെല്ലാം അദ്ദേഹമാണ് എനിക്ക് പറഞ്ഞു തന്നത്.”

അർജുൻ : “അപ്പോൾ അദ്ദേഹത്തോട് എന്നെ കുറിച്ചെന്തെങ്കിലും അങ്ങ് അന്വേഷിച്ചിരുന്നോ ഗുരുജീ…”

” അതേപറ്റി ഞാൻ നാളെ രാവിലെ നിനക്ക് വിശദമായി പറഞ്ഞു തരാം. നാളെ രാവിലെ നീ, എന്നോടൊപ്പം അദ്ദേഹത്തെ സന്ദർശിക്കേണ്ടതുണ്ട് ഉണ്ണീ… ഞാൻ അദ്ദേഹത്തെ കുറച്ച് മുന്നെ വിളിച്ചിരുന്നു…”

അർജുൻ: “പക്ഷേ ഗുരുജീ…ഒരു കാര്യം.. നമ്മളോട് ഇത്തരമൊരു ഹീന കൃത്യം ചെയ്ത രുദ്രനോടും വീരഭദ്രനോടും പ്രതികാരം ചെയ്യുവാൻ എന്റെ രക്തം തിളയ്ക്കുകയാണ്…”