❤️✨️ശാലിനിസിദ്ധാർത്ഥം14✨️❤️ [𝓐𝓼𝓱𝔀𝓲𝓷𝓲 𝓚𝓾𝓶𝓪𝓪𝓻𝓪𝓷] 415

ഗുണനായകിന്റെ തീക്ഷണമായ കണ്ണുകളോടെയുള്ള നോട്ടത്തിൽ, അർജുൻ വല്ലാതെ പതറി. അവൻ നിന്ന നിൽപ്പിൽ വിയർത്തു കുളിച്ചു. ആ സമയം സിദ്ധാർഥ് തന്നോടൊപ്പം ഉണ്ടായിരുന്നുവെങ്കിലെന്നു അവൻ ആഗ്രഹിക്കാതിരുന്നില്ല.

“എന്താടാ മറുപടിയില്ലാത്തത്.. എന്താ നിന്റെ വായിൽ അമ്പഴങ്ങയാണോ. സാബ് ചോദിച്ചതിന് മറുപടി പറയടാ…” അർജുൻ ഒന്നും മിണ്ടാതെ തലയും താഴ്ത്തി നിൽക്കുന്നത് കണ്ട് ആസിഫ് ഗർജിച്ചു.

“അ…അതെ.. ” അർജുൻ തലയുയർത്താതെ താഴ്ന്ന സ്വരത്തിൽ അത് സമ്മതിച്ചു. അർജുന്റെ ആ മറുപടി കേട്ട ഗുണനായക് ആദ്യമൊന്നു ചിരിച്ചു…

എന്നിട്ട് അവനോടായി : “നിനക്ക് ഞാനൊരു ഗിഫ്റ്റ് തരട്ടെ അർജുൻ. നിനക്കേറ്റവും വിലമതിക്കുന്നൊരു ഗിഫ്റ്റ്…”

അത് പറയുമ്പോൾ ഗുണനായകിന്റെ കണ്ണുകളിൽ എന്തോ കൗശലം മിന്നി മറഞ്ഞു. അടുത്ത നിമിഷം ഗുണനായക് തന്റെ ഇരട്ടകുഴൽ തോക്ക് ആസിഫിന് കൈമാറിയത് കണ്ടതോടെ അർജുൻ അതിലൊരു അപകടം മണത്തു കഴിഞ്ഞിരുന്നു.

തൊടിയിടയിലാണ് ആസിഫ് ആ തോക്കിന്റെ പാത്തി കൊണ്ട് അർജുന്റെ മുഖം ലക്ഷ്യമാക്കി വീശിയതും അർജുൻ അതിൽ നിന്നൊഴിഞ്ഞ് പുറകിലേക്ക് മാറിയതും.

“എടാ…” അത് കണ്ട് കലി കേറിയ ആസിഫ് അർജുനെ വീണ്ടുമൊരിക്കൽ കൂടി തോക്കിന്റെ പാത്തി വെച്ച് അടിക്കാൻ ശ്രമിച്ചുവെങ്കിലും അപ്പോഴേക്കും ഒരു ബലിഷ്ഠമായ കൈ വന്ന് ആ തോക്ക് അയാളുടെ കൈയിൽ നിന്നാ തോക്ക് തട്ടിയെടുത്തു..!

തന്റെ സ്വകാര്യ അഹങ്കാരവും, അലങ്കാരവും ആയുധവുമൊക്കെയായ ആ ഇരട്ടകുഴൽ തോക്ക് ആസിഫിന്റെ കൈയിൽ നിന്ന് തട്ടിയെടുക്കാൻ ധൈര്യം കാണിച്ച ആ തെമ്മാടി ആരാണെന്നറിയാനായി ഗുണനായക് നോക്കിയപ്പോൾ കണ്ടത്, തോക്കും പിടിച്ച് അതിലേക്ക് കൗതുകത്തോടെ നോക്കി നിൽക്കുന്ന സിദ്ധാർഥിനെയാണ്.