❤️✨️ശാലിനിസിദ്ധാർത്ഥം13✨️❤️ [??????? ????????] 437

ശിവ :”സിദ്ധാർഥ്.. എടാ നിന്നോടത് പറഞ്ഞാൽ നീയത് എങ്ങനെ കാണുമെന്നു ഞങ്ങൾക്ക് സംശയം ഉണ്ടായിരുന്നത് കൊണ്ടാ രാവിലെയത് നിന്നോട് പറയാതിരുന്നത്.”

ഐസക് :”ഇനിയിപ്പോൾ മറച്ചുവെച്ചിട്ടൊന്നും ഒരു കാര്യവുമില്ല. നീയായിട്ട് ഗുണനായകിന്റെ ആൾക്കാരുമായി കൊമ്പു കോർത്ത സ്ഥിതിക്ക് എല്ലാം തുറന്നു പറയണം”

“വളച്ചു നീട്ടികൊണ്ട് പോകാതെ പറയാനുള്ളത് പറയിന്നെടാ ആരെങ്കിലും.” സിദ്ധാർഥ് വീണ്ടുമൊരിക്കൽ കൂടി ചൂടായി.

“ശെരി.. എന്നാൽ ഞാൻ നിനക്കൊരു കാര്യം കാണിച്ചു തരാം എന്നിട്ട് പറയാം…”

എന്നും പറഞ്ഞുകൊണ്ട് ആദം അവിടെനിന്നെഴുനേറ്റു, അവിടെ വേറാരും തന്നെയില്ലെന്നു ഉറപ്പ് വരുത്തിയിട്ട് തന്റെ

ഷർട്ടിന്റെ ആദ്യ മൂന്നു ബട്ടനുകൾ അഴിച്ച് അവന്റെ നെഞ്ച് സിദ്ധാർഥിന് മുന്നിൽ പ്രദർശിപ്പിച്ചു.

“എടാ ഇത്…???” സിദ്ധാർഥ്, ആദമിന്റെ നെഞ്ചിൽ അവിടെവിടെയായി എന്തോ വസ്തു കൊണ്ട് ഇടിച്ചത് പോലെ കറുത്ത് കരിനീലിച്ചു കിടക്കുന്നത് കണ്ട് വല്ലാതെ ഞെട്ടി.

“ഹ്മ്മ്… കഴിഞ്ഞ തിങ്കളാഴ്ച നിന്നെ പോലെ പ്രതികരിച്ചതിനു, നീയിന്ന് തല്ലി കയ്യും കാലുമൊടിച്ച അവന്മാരുടെ നേതാവ്, ആസിഫ്… ഗുണനായകിന്റെ മൗനാനുവാദത്തോടുകൂടി എനിക്ക് തന്ന സമ്മാനമാണ് ഇത്…!

“അവർ നിന്നെ മർദിച്ചോ…??? എന്താടാ അന്ന് സംഭവിച്ചത്…???” അത് കണ്ടതും സിദ്ധാർഥ് ചാടിയെഴുനേറ്റു. ആദമിന്റെ ശരീരം കണ്ട് സിദ്ധാർഥിന്റെ കണ്ണുകളിൽ നിന്ന് കണ്ണുനീർ പൊടിഞ്ഞു.

“നീ ഇരിക്കടാ.. ഞാൻ പറയാം…” ആദം തന്റെ ഷർട്ട്‌ ശെരിയാക്കിയിട്ട്, സിദ്ധാർഥിനെ സമാധാനിപ്പിച്ചു അവനെ വീണ്ടും മരച്ചുവട്ടിൽ ഇരുത്തികൊണ്ട് ആദം പറഞ്ഞു തുടങ്ങി…

ആദം :”അന്ന് തിങ്കളാഴ്ച, ശാലിനിയെ സംരക്ഷിക്കാൻ ശ്രമിക്കുന്നതിനിടെ ആൽബിയുടെ ആൾക്കാർ മൂലം നിനക്ക് പരിക്കേൽക്കുകയും നിന്നെയും ശാലിനിയെയും മറ്റെല്ലാ പരിക്കേറ്റവരെയുമെല്ലാം ഹോസ്പിറ്റലിൽ കൊണ്ടുപോയത് ഞാനായിരുന്നു…”