❤️✨️ശാലിനിസിദ്ധാർത്ഥം13✨️❤️ [??????? ????????] 437

“സിദ്ധുവും അജുവും കൂടെ അവന്മാരെ ചവിട്ടി കൂട്ടിയെന്നു ഗുണനായക്, കോളേജിന് പുറത്ത് നിൽക്കുന്ന അയാളുടെ ആൾക്കാർ വഴി അറിഞ്ഞതോടെ ഗോപലേട്ടന്റെ ലൈസൻസ് അയാൾ ക്യാൻസൽ ചെയ്തു. ഫലത്തിൽ ഇപ്പോൾ നമ്മുടെ കോളേജ് കാന്റീൻ ഗോപലേട്ടന്റെയല്ല… ഗുണനായക് അത്, തൃശൂരൂള്ള ഏതോ പ്രൈവറ്റ് ഫുഡ്‌ കോൺട്രാക്ട് കമ്പനിയെ ഏൽപ്പിക്കാൻ പോകുകയാണ്.”

ആദി, ബാലു അവനോട് പറഞ്ഞ കാര്യങ്ങളെല്ലാം തന്റെ കൂട്ടുകാരോട് പറഞ്ഞു. ആദികേശവ് പറഞ്ഞത് കേട്ട് അവന്റെ കൂട്ടുകാർ സിദ്ധാർഥിനെ വീണ്ടും കുറ്റപ്പെടുത്താൻ തുടങ്ങി.

“എന്നാ ഞാനൊരു കാര്യം ചോദിക്കട്ടെ… ആരാ ഈ ഗുണനായക്…??? ആരാ ഈ ഡാർക്ക്‌ ബ്രിഗ്രേഡിയേഴ്‌സ്. ഗോപലേട്ടനെ ഉപദ്രവിച്ച അവന്മാരെ ഞാൻ തടഞ്ഞത് തെറ്റായെന്നാണോ നിങ്ങൾ പറയുന്നത്…??? എനിക്കൊരുത്തനെയും പേടിയില്ല… അത് എതവനായാലും എനിക്കൊരു ചുക്കുമില്ല.”

സിദ്ധാർഥ് പറഞ്ഞുവന്നതൊന്നു നിർത്തിയിട്ട് അർജുന് നേരെ നീങ്ങി.

“അർജുനാ, നീയെന്നെ തടഞ്ഞില്ലായിരുന്നെങ്കിൽ അവന്മാരുടെ ശവം ഈ മണ്ണിൽ വീണേനെ…!”

ഇവിടെ വന്നിരുന്നേ സിദ്ധു… കൂൾ ഡൗൺ സിദ്ധാർഥ്.. നീയിങ്ങനെ ദേഷ്യപ്പെടല്ലേ, നീ ഇത്രയും ദേഷ്യം പ്രകടിപ്പിക്കുന്നത് ഞാൻ ഇപ്പോഴല്ലാതെ വേറെ ഒരു സമയത്തും കണ്ടിട്ടില്ല…” അർജുൻ സിദ്ധാർഥിനെ മരത്തിന്റെ ചുവട്ടിൽ തന്റെ കൂടെയിരുത്തി.

അർജുൻ തന്നോട് പറഞ്ഞത് കേട്ട് സിദ്ധാർഥ്, കുറച്ച് സമയം നിശബ്ദനായി, ശ്വാസം ഉള്ളിലേക്കെടുത്ത് പുറത്തു വിട്ടുകൊണ്ടിരുന്നപ്പോഴേക്കും ശാന്തനായി കഴിഞ്ഞിരുന്നു. അവന്റെ കണ്ണുകളിൽ തിളങ്ങികൊണ്ടിരുന്ന അഗ്നിജ്വാല പതിയെ മറഞ്ഞുപോയിരുന്നു.

“ഇനി പറ. ആരാ ഈ ഗുണനായക്…??? പിന്നെ അയാളുടെ ലക്ഷ്യമെന്താണെന്നു കൂടെ പറ. നിങ്ങൾ എന്തൊക്കെയോ എന്നിൽ നിന്ന് മറച്ചു വെയ്ക്കുന്നുണ്ട്.” സിദ്ധാർഥ്, അവരോടായി ചോദിച്ചു.