✨️❤️ശാലിനിസിദ്ധാർത്ഥം17❤️✨️ (ഭാഗം II) [???????  ????????] 205

പക്ഷേ എന്നിരുന്നാലും എന്റെ പ്രിയപ്പെട്ട ഗുരുജിയെയും, എന്നെ രക്ഷിക്കാനായി വന്ന ആ ധീരനായ പോലീസ് ഓഫീസറെയും ചതിപ്രയോഗത്തിലൂടെ നീ ആക്രമിച്ചു. അതിനുള്ള ശിക്ഷ ഞാനിതാ നടപ്പിലാക്കാൻ പോകുന്നു…”

അത്രയും പറഞ്ഞ് അവൻ ജെറോമിന്റെ കഴുത്തിൽ പിടിച്ചു തനിക്ക് നേരെ ഉയർത്തി. അതോടെ വല്ലാത്തൊരു ഞെട്ടലിലും, ഭയത്തിലുമായ ജെറോം തന്നെ, ഒറ്റകയ്യിൽ പിടിച്ചു വെച്ചിരിക്കുന്നയാളെ ഭീതിയോടെ തലയുയർത്തി നോക്കി.

“അരുത്… അരുത് ധനുഷ്… എന്നെയൊന്നും ചെയ്യരുത്…” അതാരാണെന്ന് മനസ്സിലായതോടെ അയാളുടെ ശരീരമാകെ വിറച്ചു.

“ഹ്മ്മ്… ഹാ ഹാ… ധനുഷോ… ഞാൻ ധനുഷ് അല്ലടാ… അവനെയാണ് നിങ്ങൾ അൽപ്പസമയത്തിന് മുൻപ് കൊന്നത്… എന്റെ പേര്… അല്ലേൽ വേണ്ടാ ചാകാൻ പോകുന്ന താനെന്തിനാ അതറിയുന്നത്… താൻ ചാകാൻ തയ്യാറായിക്കോ…”

ഒരു രാക്ഷസീയമായ ഭാവത്തോടെയും ദിഗന്തം നടുങ്ങുന്ന ചിരിയോടെയും ആ അപേക്ഷകൾ കുതിരപ്പുറത്തിരുന്ന അവൻ തിരസ്കരിച്ചതിനു ശേഷം ജെറോമിന്റെ കഴുത്തിൻമേലുള്ള പിടിവിട്ടതോടെ ജെറോം ഒരു ആർത്തനാദത്തോടെ ആകാശത്ത് നിന്ന് താഴേക്ക് പതിച്ചു…!

ആ കാഴ്ചയൊരു പുഞ്ചിരിയോടെ കണ്ടുനിന്നതിനു ശേഷം, ധനുഷ് തന്റെ കുതിരയോടായി : “വരൂ… ശിഖാ, ഇനി നമ്മൾക്ക് താഴേക്ക് പോകാം… അവനെ അങ്ങനെയങ്ങു കൊല്ലാൻ പാടില്ല.”

ധനുഷ് മയൂരശിഖയോട് താഴേക്ക് പറക്കാനാവശ്യപ്പെട്ടതോടെ, അത് മിന്നൽ വേഗത്തിൽ അവനെയും കൊണ്ട് താഴേക്ക് വീണുകൊണ്ടിരുന്ന ജെറോമിന്റെ നേർക്ക് താഴേക്ക് പാഞ്ഞു.

തന്റെ കുതിര തന്നെയും കൊണ്ട് ചിറകുകൾ വീശി താഴേക്ക് പറക്കുന്ന വേളയിൽ തന്നെ ധനുഷ് മനസ്സിൽ ധ്യാനിച്ചുകൊണ്ട് വലത് കൈയിലൊരു ചുവന്ന് തിളങ്ങുന്ന മാന്ത്രിക ഉറുമി പ്രതക്ഷപ്പെടുത്തിയിട്ട്, അത് താഴെക്ക് വീണുകൊണ്ടിരുന്ന ജെറോമിന്റെ നേർക്ക് പ്രയോഗിച്ചു…