✨️❤️ശാലിനിസിദ്ധാർത്ഥം17❤️✨️ (ഭാഗം II) [???????  ????????] 205

അത് കേട്ട് പിന്തിരിഞ്ഞുനോക്കിയ പരമേശ്വരൻ കണ്ടത്, തങ്ങളുടെ നേർക്ക് കത്തിയുമായി പാഞ്ഞു വരുന്ന ജെറോമിനെയാണ്…

ഇമ്രാൻ, ഉടൻ തന്നെ കത്തിയും കൊണ്ട് ഗുരുവിനെ കുത്താനുള്ള ജെറോമിന്റെ ശ്രമം, തന്റെ വലത് ചുമലിലെ അതികഠിനമായ വേദന സഹിച്ചുകൊണ്ടാണെങ്കിലും അയാൾ ഇരുകൈകളാലും തടുത്തുവെങ്കിലും ജെറോമിനെ അധികനേരം തടഞ്ഞു നിർത്താൻ അവന് സാധിച്ചില്ല.

ക്രോധവും പകയും കൊണ്ട് അന്ധനായി കഴിഞ്ഞിരുന്ന അയാൾ, ഇമ്രാനെ നിഷ്പ്രയാസം വീഴ്ത്തിയിട്ട് അവന്റെ നെഞ്ചിൽ കത്തിക്കൊണ്ട് കുത്താൻ ശ്രമിച്ചു… എന്നാൽ അപ്പോഴേക്കും തന്റെ വാളുപയോഗിച്ച് പരമേശ്വരഗുരുക്കൾ അത് തടഞ്ഞു,

തന്റെ ഇടത് കൈകൊണ്ട് ജെറോമിനെ പിന്നിലേക്ക് തള്ളിയിട്ട് അവന്റെ കൈയിലിരുന്ന കത്തി, വാളുകൊണ്ട് വളരെ വേഗം തട്ടിതെറിപ്പിച്ചു. അതോടെ ജെറോം നിസഹായനായെങ്കിലും വർധിച്ച ക്രോധത്തോടെ പരമേശ്വരഗുരുക്കളെയും ഇമ്രാനെയും ആക്രമിച്ചു.

അതേസമയം മലയുടെ മുകളിൽ സംഭവിച്ചുകൊണ്ടിരിക്കുന്ന രംഗങ്ങൾ, തന്റെ അകകണ്ണിൽ ദർശിച്ചു കൊണ്ടിരിക്കുകയായിരുന്ന ധനുഷ്, തന്റെ കഴുത്തിലഞ്ഞിരുന്ന രുദ്രാക്ഷമാല ഇളക്കിയെടുത്തിട്ട്, കൈകുമ്പിളിൽ വെച്ചുകൊണ്ട് സുബ്രമണ്യസ്തുതി ജപിച്ചു തുടങ്ങി…

“ഷഡാനനം ചന്ദനലേപിതാംഗം

മഹാദ്ഭുതം ദിവ്യ മയൂരവാഹനം

രുദ്രസ്യ സൂനും സുരലോക നാഥം

ബ്രഹ്മണ്യ ദേവം ശരണം പ്രപദ്യേ

ആശ്ചര്യവീരം സുകുമാരരൂപം  

തേജസ്വിനം ദേവഗണാഭിവന്ദ്യം

ഏണാങ്കഗൗരീതനയം കുമാരം

സ്കന്ദം വിശാഖം സതതം നമാമി

സ്കന്ദായ കാർത്തികേയായ

പാർവതീനന്ദനായ ച

മഹാദേവ കുമാരായ

സുബ്രഹ്മണ്യായ തേ നമ:”

“ഹേ മയൂരശിഖാ… സുബ്രമണ്യസ്വാമി തൻ മയൂരവാഹനത്തിൻ അംശമേ… എന്റെ പ്രിയ അശ്വമേ… നിന്റെ പ്രഭുവിന്റെ അടുത്തേക്ക് മടങ്ങിവന്നാലും… വന്ന് എന്റെ ഗുരുവിനെ സംരക്ഷിക്കാൻ സഹായിച്ചാലും…”

ധനുഷ് തന്റെ സ്തുതി ജപിച്ചു കഴിഞ്ഞതോടെ സ്വർണ്ണ നിറത്തിൽ തിളങ്ങാൻ തുടങ്ങിയ ആ രുദ്രാക്ഷം ഏതാനും നിമിഷങ്ങൾക്കകം തനിയെ വായുവിലുയർന്നു മുകളിലേക്ക് വെടിയുണ്ട കണക്കെ പായാനാരംഭിച്ചു…