✨️❤️ശാലിനിസിദ്ധാർത്ഥം17❤️✨️ (ഭാഗം II) [???????  ????????] 206

കുറച്ച് നിമിഷങ്ങൾക്കുളിൽ അദ്ദേഹം, ദൂരെ നിൽക്കുന്നവർ എന്തിനെയോ വിചിത്ര രൂപങ്ങളെ നോക്കി വെടിവെയ്ക്കുന്നതും, ആ രൂപങ്ങൾ നിമിഷങ്ങൾക്കകം കനൽശിലകളായി പൊടിഞ്ഞു വീഴുന്നതും കണ്ടു എന്നാൽ നിമിഷങ്ങൾക്കുള്ളിൽ ആ കനൽശിലകൾ,

അന്തരീക്ഷത്തിൽ കറങ്ങിയുയർന്നു കനൽ നിറമുള്ള ഒരു ചുഴലികൊടുംകാറ്റായി രൂപാന്തപ്പെട്ടു വരുന്നതും,തന്റെ ശിഷ്യനെ വലയം ചെയ്തിരുന്ന ആ തേജോഗോളം, അത്യുഗ്രമായ സ്ഫോടന ശബ്ദത്തോടുകൂടി പൊട്ടിതകരുന്നതും,

ധ്യാനാവസ്ഥയിലായിരുന്ന ധനുഷ് അതേയവസ്ഥയിൽ തന്നെ അന്തരീക്ഷത്തിലുയരുകയും ആ കൊടുംകാറ്റിൽ മറയുകയും ചെയ്യുന്നതാണ് അദ്ദേഹം കണ്ടത്.

തൊട്ടടുത്ത നിമിഷം ആകാശത്തൊരു ഇടിമിന്നലും അതോടൊപ്പം താനും ഇമ്രാനും നിൽക്കുന്ന സ്ഥലമുൾപ്പടെ ആ വനപ്രദേശം മുഴുവനും ഒരു ഭൂമികുലുക്കമുണ്ടാകുന്നതായും അയാൾക്കനുഭവപ്പെട്ടു.

എന്തോ വലുത് സംഭവിക്കാൻ പോകുകയാണെന്നു തോന്നിയ പരമേശ്വരഗുരുക്കൾ വീണ്ടുമവിടേക്ക് ഉറ്റുനോക്കി.താൻ മുൻപ് കണ്ട ചുഴലികാറ്റ്, മറ്റെന്തോ രൂപത്തിലേക്ക് മാറുന്നതാണ് അദ്ദേഹം കണ്ടത്.

നിമിഷങ്ങൾക്കകം തന്റെ മുന്നിൽ രൂപപ്പെട്ടു വന്ന രൂപം കണ്ട് അദ്ദേഹം ഞെട്ടി… ധനുഷിന്റെ രൂപത്തിൽ സാക്ഷാൽ സുബ്രഹ്മണ്യസ്വാമിയുടെ അറുമുഖരൂപം, പന്ത്രണ്ടുകരങ്ങളിൽ ദിവ്യായുധങ്ങളുമായി ദർശനമരുളി നിൽക്കുന്നത് കണ്ടതും പരമേശ്വരഗുരുക്കൾ സ്വയം കൈകൂപ്പിപോയി…

“മഹാദേവപുത്രാ… വേൽമുരുകാ.. സ്വാമിനാഥാ… അടിയനെ അനുഗ്രഹിക്കണമേ…” അദ്ദേഹം താഴെ മണ്ണിൽ മുട്ടുകുത്തി തന്റെ കൈകൾ കൂപ്പി കണ്ണുകളടച്ചു പ്രാർത്ഥിച്ചു. കുറച്ചു നേരമങ്ങനെ ആ നിലയിൽ നിന്ന അദ്ദേഹം പെട്ടന്നെന്തോ ഓർത്ത് എഴുന്നേറ്റു…

‘അതെ… അവൻ ഉണർന്നു കഴിഞ്ഞിരിക്കുന്നു…. പക്ഷേ ഓരോ നിമിഷങ്ങൾ കഴിയുംതോറും തങ്ങൾക്ക് ചുറ്റുമുള്ള പ്രകൃതിയുടെ ഭാവം കൂടുതൽ തീക്ഷണമായി വരുകയാണല്ലോ… എന്തെകിലും ഉടനെ ചെയ്തില്ലെങ്കിൽ അത് അപകടമാണ്…’

അദ്ദേഹം തല തിരിച്ച് ഇമ്രാനെ ഇരുത്തിയിരുന്ന മരച്ചുവട്ടിലേക്ക് നോക്കി.

അവിടെയിരുന്ന ഇമ്രാന്റെ കണ്ണുകളിൽ ആ കാഴ്ചകൾ കണ്ടതിന്റെ ഭയവും അതിശയവും നിറഞ്ഞു നിൽക്കുന്നത് പരമേശ്വരഗുരുക്കൾക്ക് കാണാൻ സാധിക്കുന്നുണ്ടായിരുന്നു.