✝️The NUN 3✝️ (അപ്പു) 240

വായിക്കാനും പഠിക്കാനും ഇഷ്ടപ്പെട്ടിരുന്ന സിസ്റ്റർക്ക് ദൈവശാസ്ത്രത്തിലും തത്വശാസ്ത്രത്തിലും ഡോക്ടറേറ്റ് ഉണ്ടായിരുന്നു.. അതുകൊണ്ടുതന്നെ വീണ്ടും വീണ്ടും പഠിക്കാൻ സഭയിൽ നിന്നുപോലും നല്ല പിന്തുണ കിട്ടിയിരുന്നു…

സംസാരിക്കാനും പ്രസംഗിക്കാനും വലിയ കഴിവായിരുന്നു സിസ്റ്റർക്ക്… പറയുന്നതെല്ലാം മുന്നിലുള്ളതുപോലെ കാട്ടിത്തരും അത്രക്ക് കൃത്യവും ആധികാരികവുമായ അറിവുകളായിരുന്നു സിസ്റ്ററുടെത്

പക്ഷെ മറ്റാരും അറിയാത്തൊരു കാര്യം കൂടിയുണ്ടായിരുന്നു…

ഇതിനിടയിൽ എപ്പോഴോ സിസ്റ്ററുടെ ചിന്തകളും വായനയും സാത്താനിലേക്ക് തിരിഞ്ഞു… സിസ്റ്റർക്ക് അതിൽ ഭയമല്ല തോന്നിയത് ഒരുതരം ആകാംഷയായിരുന്നു… സാത്താനെപ്പറ്റി എഴുതപ്പെട്ടിട്ടുള്ള കുറെയധികം പുസ്തകങ്ങൾ സിസ്റ്റർ ശേഖരിച്ചു… പിന്നീട് അതൊരു ആരാധനയായി വളരുകയായിരുന്നു…

ഒരു തവണ സിസ്റ്റർ ചെകുത്താനെ ഞങ്ങൾക്ക് മുന്നിൽ അവതരിപ്പിച്ച രീതികണ്ട് ഞങ്ങൾക്കുപോലും ആരാധന തോന്നിപ്പോയി എന്നുള്ളതാണ് സത്യം….!!”

“അതെങ്ങനെ….??” ഫാ. സ്റ്റീഫൻ ചോദിച്ചു…

“സിസ്റ്ററുടെ കാഴ്ചപ്പാടിൽ ലൂസിഫർ മനുഷ്യനെപ്പോലെ ചിന്തിക്കുന്നവനാണ് അല്ലെങ്കിൽ ചിന്തിക്കാൻ ധൈര്യപ്പെട്ടവനാണ്…. സ്വർഗത്തിലെ മറ്റുള്ള മാലാഖമാർ ദൈവത്തിന് സ്തുതിപാടുക മാത്രമാണ് തങ്ങളുടെ കർത്തവ്യമെന്ന് വിചാരിച്ചപ്പോൾ അതിനെ ചോദ്യം ചെയ്തവനാണ്… തുല്യശക്തിയായ, അവരുടെ പിതാവായ ദൈവത്തിന്റെ അടിമകൾ അല്ല മക്കളാണെന്ന് വിളിച്ചുപറഞ്ഞവനാണ്…

അച്ചന് പഴയനിയമത്തിലെ ഏദൻതോട്ടത്തിന്റെ കഥയറിയില്ലേ…??”

“വിലക്കപ്പെട്ട കനി തിന്നുന്നത് വരെ മനുഷ്യന് മറ്റ് ചിന്തകളില്ലായിരുന്നു… അവനും മറ്റുള്ള മൃഗങ്ങളെപ്പോലെ തിന്നും കുടിച്ചും പെറ്റുപെരുകിയേനെ… പക്ഷെ അത് കഴിച്ചപ്പോൾ അവർ ദൈവത്തെപ്പോലെ നന്മതിന്മകളെകുറിച്ച് ബോധവാന്മാരായി… ചിന്തിക്കാൻ കഴിവുള്ളവരായി…. അത് തന്നെയല്ലേ സാത്താൻ അവർക്ക് വാഗ്ദാനം ചെയ്തതും…??”