ശ്രീ നാഗരുദ്ര ? ???? പന്ത്രണ്ടാം ഭാഗം – [Santhosh Nair] 1086

“ശരി മാമാ ഞാൻ ശ്രദ്ധിയ്ക്കാം. അവൾക്കും മോക്ഷമുണ്ടാകണം. പിരിയുന്നതിൽ എനിക്കും സങ്കടമുണ്ട്, പക്ഷെ ചില കാര്യങ്ങൾ നമുക്ക് വേദജ്ഞ മൊഴികൾ കേട്ടേ മതിയാകൂ.” ശ്രീകുമാർ പറഞ്ഞു.

കുറച്ചു നേരം അവിടെ നിന്നശേഷം അവൻ പറമ്പാകെ ഒന്നു ചുറ്റിക്കറങ്ങി. കളകളും കാടുകളും തെളിഞ്ഞപ്പോൾ പറമ്പിനൊരു ഐശ്വര്യം വന്നിട്ടുണ്ട്. രുദ്ര തീർച്ചയായും മിടുക്കി തന്നെ. അവനോർത്തു.

കിണറ്റിൽ നിറയെ വെള്ളം. അടുത്തിരുന്ന ബക്കറ്റ് കിണറ്റിലേക്കിട്ടു അവൻ വെള്ളം കോരിയെടുത്തു മുഖവും കൈകളും കാലുകളും കഴുകി. അല്പം ജലം കുടിച്ചു. തണുത്ത ജലം വീണപ്പോൾ തന്നെ ശരീരത്തിനു നല്ല സുഖം.

വീടിനുള്ളിൽ കയറിവന്ന അവൻ അടുത്തുള്ള കിടപ്പുമുറിയിലേക്ക് കയറി. വസ്ത്രങ്ങൾ മാറി ഒരു വേഷ്ടിയും ടി ഷർട്ടും ധരിച്ചു. ഇനി രാത്രി പോകാനും ഇതു മതി. നല്ല ക്ഷീണം തോന്നുന്നു. അല്പം കിടക്കാമെന്നു ഒരു തോന്നൽ. അവൻ മുറിയിൽ കണ്ട തടിക്കട്ടിലിൽ കിടന്നു. ക്ഷീണം ഉണ്ടായിരുന്നതുകൊണ്ടു തന്നെ പെട്ടെന്ന് ഉറങ്ങിപ്പോയി.

ഇടയ്ക്കു നെഞ്ചിൽ ഒരു ഭാരം അനുഭവപ്പെട്ടപ്പോൾ ശ്രീകുമാർ കണ്ണു തുറന്നു. കണ്ണിൽ നിറഞ്ഞു തുളുമ്പുന്ന സ്നേഹവുമായി രുദ്ര അവന്റെ നെഞ്ചിൽ തലവെച്ചു കിടക്കുന്നു. അവളുടെ മനോഹരമായ കണ്ണുകൾ ഇമചിമ്മാതെ അവനെ നോക്കിക്കൊണ്ടു – അവന്റെ കണ്ണുകളിൽ കോർത്തുവലിയ്ക്കുന്നതുപോലെ അവനു തോന്നി. അവളുടെ ചുണ്ടുകൾ അവന്റെ ചുണ്ടുകളെ കവർന്നെടുത്തു, പിന്നീടു ആ ചുണ്ടുകൾ താഴേയ്‌ക്കെത്തി അവന്റെ കഴുത്തിൽ ഉമ്മ വെച്ചശേഷം ആ ചെഞ്ചോരിവായ തുറന്നു അവൾ അവന്റെ കഴുത്തിൽ ചെറുതായി കടിച്ചു.

പെട്ടെന്നു അവളുടെ ശക്തി വർദ്ധിയ്ക്കുന്നതുപോലെ അവനു തോന്നി. അവളെ തള്ളി മാറ്റാൻ നോക്കിയിട്ടു പറ്റുന്നില്ല. അവൾ കൈകൾ കൊണ്ട് അവന്റെ രണ്ടു കൈകളെയും പൂട്ടി. കാലുകൾ അവനു ചുറ്റുമായി ഇട്ടു ശരീരം അനങ്ങാൻ കഴിയാത്തതുപോലെയാക്കി. ഇതുവരെ അറിയാത്ത ഒരു കരുത്താണ് അവളുടേത്‌.

അവനെ കമഴ്ത്തി അവൾ കിടത്തി വീണ്ടും ശരീരം പൂട്ടി. നിസ്സഹായനായ ശ്രീകുമാറിന്റെ കഴുത്തിലേയ്ക്ക് അവളുടെ പല്ലുകൾ പിന്നിലൂടെ ആഴ്ന്നിറങ്ങി. ഒരു പിടച്ചിലോടെ അവൻ ഉറക്കെ വിളിച്ചു “നാരായണാ നാരായണാ”