ശ്രീ നാഗരുദ്ര ? ???? പന്ത്രണ്ടാം ഭാഗം – [Santhosh Nair] 1086

പിന്നീട് ലളിത സഹസ്രനാമം പാരായണം തുടങ്ങി. ഭക്തിപൂർവ്വം വായിച്ചു തുടങ്ങിയ അവൻ മുക്കാൽ മണിക്കൂറുകൾ കൊണ്ട് ആയിരം നാമങ്ങളും ചൊല്ലി അവസാന ഭാഗത്തെത്തി (991 -1000 താഴെക്കൊടുത്തിരിയ്ക്കുന്നു)
ഓം ഷഡദ്ധ്വാതീത രൂപിണ്യൈ നമഃ
ഓം അവ്യാജ കരൂണാ മൂര്ത്തയേ നമഃ
ഓം അജ്ഞാനദ്ധ്വാന്ത ദീപികായൈ നമഃ
ഓം ആബാല ഗോപ വിദിതായൈ നമഃ
ഓം സര്വ്വാനുല്ലംഘ്യ ശാസനായൈ നമഃ
ഓം ശ്രീചക്രരാജ നിലയായൈ നമഃ
ഓം ശ്രീമത് ത്രിപുരസുന്ദര്യൈ നമഃ
ഓം ശ്രീശിവായൈ നമഃ
ഓം ശിവ ശക്ത്യൈക്യ രൂപിണ്യൈ നമഃ
ഓം ലളിതാംബികായൈ നമഃ

സഹസ്രനാമപാരായണം പൂർത്തിയാക്കി അവൻ താഴെവീണു തൊഴുതു. പിന്നീട് വിഷ്ണുസഹസ്രനാമ പാരായണം ഭക്തിപൂർവ്വം ചൊല്ലിത്തീർത്തശേഷം എഴുനേറ്റു കർപ്പൂരാരതിയും നടത്തി അവൻ സാഷ്ടാംഗ നമസ്കാരം ചെയ്തു വെളിയിൽ വന്നു.

അപ്പോഴേയ്ക്കും സമയം അഞ്ചരയോളം ആയി. അക്കാ വന്നു ജോലികൾ തുടങ്ങിയിരുന്നു. തമ്പി വന്നയുടനെ അങ്ങനെയേ കുംഭകർണ്ണസേവ തുടങ്ങിയെന്നു ഒരു പൊട്ടിച്ചിരിയുടെ അവർ പറഞ്ഞു. നാട്ടിൽ നിന്നു കൊണ്ടുവന്ന പലഹാരങ്ങൾ എല്ലാം അക്കാ എടുത്തുവെച്ചു – ഓഫീസിൽ കൊണ്ടുപോകാൻ ഉള്ളതും, അവർക്കുള്ളതും എല്ലാം പ്രത്യേകം എടുത്തുവെച്ചു.

ഒതുക്കൽ ജോലികൾ എല്ലാം കഴിഞ്ഞപ്പോൾ മണി ആറായി. കുറച്ചു സമയത്തിനുള്ളിൽ അണ്ണനും താഴെ വന്നു. അപ്പോഴേയ്ക്കും അക്ക ചായ ഉണ്ടാക്കിയിരുന്നു. ചായ കുടിച്ചുകൊണ്ട് കുറച്ചുനേരം മൂന്നു പേരും കൊച്ചുവർത്തമാനം പറഞ്ഞുകൊണ്ടിരുന്നു.

തമ്പിയ്ക്കു കല്യാണം ആലോചിയ്ക്കണമെന്നും മോൾക്ക് അണ്ണന്റെ പെങ്ങളുടെ മകന്റെ ആലോചന വന്നിട്ടുണ്ടെന്നും ഒക്കെ അണ്ണൻ പറഞ്ഞു. “മാപ്പിള തമിഴ്നാട്ടിൽ സേലത്തിൽ സർക്കാർ ക്ലാർക് ആറുക്കാങ്ക, സർ. അടുത്ത വാരം അവങ്ക പാക്ക വരെന്നു നേതു രാത്രി കൂപ്പിട്ടു സോന്നാങ്ക. ഡിമാൻഡ് ഏതുമേ ഇല്ല. നക്ഷത്രം എല്ലാം മാച്ച് ഉണ്ട്. റൊമ്പ യോസിയ്ക്കവേണ്ടാന്നു നിനൈക്കിറേൻ. നീങ്ക എന്ന സോൾരീങ്ക സർ?”

“നല്ല കാര്യം അണ്ണേ, നമ്മ പൊണ്ണും കല്യാണ വയസ്സാകുതെ, നല്ല പയ്യൻന്നാ കല്യാണം മംഗളം – എല്ലാം നല്ലാ വരും. രണ്ടു ലക്ഷം രൂപ നാൻ അവ കല്യാണത്തുക്കാകെ മാത്തി വെച്ചിരിക്കേൻ. ഇന്നും വേറെ ഏതാവത് ഇരുന്താ പാത്തുക്കറെ, നോ വറിസ് ഹ ഹ.”

അവൻ അതു പറഞ്ഞപ്പോൾ അണ്ണന്റെയും അക്കാവുടെയും കണ്ണു നിറഞ്ഞു. ഇതൊക്കെ തന്റെ കടമയാണെന്ന് പറഞ്ഞുകൊണ്ട് അവൻ മുറിയിലേയ്ക്കു പോയി. മെയിൽ ചെക്ക് ചെയ്തശേഷം അവൻ വായ കഴുകി ഒന്നു കൂടി ഫ്രഷ് ആയി. ഇന്നല്പം നേരത്തെ ഓഫീസിൽ പോകണം. ഡ്രസ്സ് എല്ലാം മാറ്റി വന്നപ്പോഴേയ്ക്കും അക്ക അവനായി ദോശയും സാമ്പാറും തേങ്ങാ ചമ്മന്തിയും റെഡി ആക്കിയിരുന്നു. സമയം ഏഴര കഴിഞ്ഞു – കുതിരയെപ്പോലെ കുതിയ്ക്കുന്ന സമയം.

നല്ല വിശപ്പ് തോന്നിയതിനാൽ അവൻ നാലു ദോശകൾ കഴിച്ചു. അല്പം പാലും കുടിച്ച ശേഷം പാത്രങ്ങൾ സിങ്കിൽ ഇട്ടു. പലഹാരങ്ങൾ എല്ലാം ഒരു പത്തുമണിക്ക് കൊണ്ടുവന്നു ഓഫീസിൽ തരാൻ അണ്ണനോട് ഏർപ്പാടാക്കി അവൻ ഇറങ്ങി.

അല്പം കുളിരുള്ള പ്രഭാതം. സൂര്യകിരണങ്ങൾ അവിടെയും ഇവിടെയുമേ എത്തി നോക്കുന്നതായി കാണാനുള്ളൂ. വഴിവിളക്കുകൾ അണഞ്ഞുകൊണ്ടിരിയ്കുന്നു. ഇങ്ങനുള്ള പ്രഭാതവേളകളിൽ നടക്കാൻ നല്ല സുഖമാണ്. ജോലി ചെയ്യാനും. കാലുകൾ നീട്ടിവിളിച്ചു അവൻ നടന്നു അഞ്ചു മിനിട്ടിനുള്ളിൽത്തന്നെ ഓഫീസിലെത്തി.

അവൻ വരുന്നതുകണ്ട സെക്യൂരിറ്റി കാബിനിൽ നിന്നും വെളിയിൽ വന്നു വാതിൽ തുറന്നുകൊടുത്തു, ലൈറ്റുകൾ ഇട്ടു. അവന്റെ കാബിൻ തുറന്നു അവിടുത്തെയും ലൈറ്റുകൾ ഇട്ടശേഷം വെള്ളവും എടുത്തു വെച്ചിട്ടു അയാൾ പോയി.