ശ്രീ നാഗരുദ്ര ? ???? പന്ത്രണ്ടാം ഭാഗം – [Santhosh Nair] 1086

ഇടയിൽ എവിടെയോ വണ്ടി നിന്നതു ശ്രീകുമാർ അറിഞ്ഞു. സമയം നോക്കിയപ്പോൾ രണ്ടര. ഈറോഡ് സേലം കൃഷ്ണഗിരി എല്ലാം കടന്നത് അറിഞ്ഞില്ല. ഹൊസൂറിന് മുൻപിലുള്ള സ്ഥലമായ ഷൂളഗിരിയാണെന്നു അടുത്തുള്ള മക്‌ഡൊണാൾഡ് ബോർഡ് കണ്ടപ്പോൾ മനസ്സിലായി.

തമ്പിയോട് എന്തെ എന്ന് ചോദ്യഭാവത്തിൽ നോക്കി.
അവൻ ഒരു ചിരിയോടെ കയ്യിലെ ചെറുവിരൽ പൊക്കി കാണിച്ചു, “ഇപ്പൊ വരാം സാർ” എന്നു പറഞ്ഞു ഡോർ തുറന്നു പുറത്തേയ്ക്കിറങ്ങി, ശ്രീകുമാറും വാതിൽ തുറന്നു പുറത്തേയ്ക്കിറങ്ങി. മൂത്രവിസർജനം നിർവഹിച്ചു ശുദ്ധി വരുത്തി കൈകാൽ മുഖം കഴുകി വന്നപ്പോഴേയ്ക്കും അവൻ തമ്പിയ്ക്കു നല്ല കടുപ്പത്തിലുള്ള ചായ വാങ്ങിവെച്ചിരുന്നു. ശ്രീകുമാറും ഒരു ഹണി ലെമൺ ബ്ലാക്ക് ടി വാങ്ങിച്ചു കുടിച്ചു.

“തമ്പി പസിയിറുന്താ ഏതാവത് സ്നാക്ക്സ് ശാപ്പിടുങ്ക.” അവൻ പറഞ്ഞു. തമ്പി ഒരു പനീർ റോൾ വാങ്ങി ചൂടോടെ കഴിച്ചു. അവനു ബേക്കറി പലഹാരങ്ങളും ഒക്കെ ഭയങ്കര ഇഷ്ടമാണ്. ഹോട്ടലിൽ പോയാൽ സൗത്ത് ഇന്ത്യൻ പൊറോട്ടയാണ് പഥ്യം.

ചായയുടെയും സ്നാക്സിന്റെയും പണം കൊടുത്ത ശേഷം അവർ വീണ്ടും പുറപ്പെട്ടു. ട്രാഫിക് തെല്ലുമില്ലാത്ത റോഡ് ഒരു അഹങ്കാരിയായ പെരുമ്പാമ്പിനെപ്പോലെ വളഞ്ഞു പുളഞ്ഞു കിടക്കുന്നു. ആ കറുത്ത പ്രതലത്തിലൂടെ അവന്റെ അവന്റെ കാറിന്റെ കറുത്ത ടയറുകൾ ലക്ഷ്യസ്ഥാനം നോക്കി പാഞ്ഞു തുടങ്ങി. അരമണിക്കൂർകൊണ്ട് ഹൊസൂർ താണ്ടിയ വണ്ടി തമിഴ്‌നാട് കർണാടക അതിർത്തി കടന്നു ടോൾ ഗെറ്റത്തി. ഇനി ഒരുമണിക്കൂർ കൊണ്ട് ഇന്ദിരാനഗർ എത്താവുന്നതേയുള്ളൂ.

ശ്രീകുമാർ വീണ്ടും കണ്ണുകൾ പൂട്ടി പിന്നിലേക്കു ചാഞ്ഞു അടുത്ത മയക്കത്തിലേക്കു കടന്നു.

“ഏട്ടാ, സുഖമായി ഉറങ്ങൂ, എന്നെയോർത്തു വിഷമിയ്ക്കേണ്ടാ” എന്നൊരു ശബ്ദം കേട്ടതു പോലെ തോന്നി. വണ്ടിയിൽ കളഭവും ചന്ദനവും ജവാദും മുല്ലപ്പൂവും ഒക്കെ കലർന്ന സുഗന്ധം ഉണ്ടോ? അവൻ ഞെട്ടിയുണർന്നു. വണ്ടി അപ്പോഴേയ്ക്കും സിൽക്ക് ബോർഡ് ആയിരുന്നു. നോക്കിയപ്പോൾ സമയം സമയം മൂന്നരയാകുന്നു.

വഴിയിൽ അത്ര ട്രാഫിക് ഒന്നുമില്ല. ചില BPO വണ്ടികൾ ഓടുന്നുണ്ട്, പിന്നെ KSRTC SETC APSRTC TNSTC പിന്നെ Private അന്തർ സംസ്ഥാന ബസുകളും കാണാം.

ഉറക്കം വരുന്നില്ല, എങ്കിലും കണ്ണു പൂട്ടി ചാരിക്കിടന്നു, മനസ്സ് വീണ്ടും പലപല വിചാരങ്ങളിലേയ്ക്ക് കടന്നു.

കുറച്ചു സമയത്തിനുള്ളിൽ വണ്ടി കോറമംഗല RR എത്തി, അവിടെനിന്നും അരമണിക്കൂറിനുള്ളിൽ തന്നെ ഇന്ദിരാനഗർ എത്തിച്ചേർന്നു. ജിജി ഹോസ്പിറ്റലിൽ നിന്നും നേരെ പോയി സിഗ്നൽ തിരിഞ്ഞപ്പോഴേയ്ക്കാണ് ശ്രീകുമാർ കണ്ണു തുറന്നു നോക്കിയത്. വീടെത്താറാകുന്നു. വണ്ടിയുടെ ഗ്ലാസ് അല്പം താഴ്ത്തിവെച്ചപ്പോൾ തണുത്ത കാറ്റ് കാറിനുള്ളിലേയ്ക്ക് തള്ളിവന്നു ഒരു പുത്തൻ ഉന്മേഷമേകി.

കാർ ഗേറ്റ് കടന്നു ഉള്ളിലെത്തി പാർക്കിങ്ങിൽ എത്തിയ ഉടനെ ശ്രീകുമാർ തമ്പിയോട് ഇന്നു ഉച്ചകഴിഞ്ഞു കുറച്ചു നേരത്തേയ്ക്ക് ഓഫീസിൽ വരേണ്ടിവരും എന്നു പറഞ്ഞു. അതുകേട്ടയുടൻ അവന്റെ മുഖം മങ്ങി. ഒരു പൊട്ടിച്ചിരിയോടെ ശ്രീകുമാർ അവന്റെ കവിളിൽ തട്ടി “ഞാൻ തമാശു പറഞ്ഞതാടാ തമ്പി – ഉനക്ക് ഗുഡ് നൈറ്റ് ഹ ഹ” എന്നു പറഞ്ഞപ്പോളാണ് അവനു ആശ്വാസമായത്. ശേഷം ശ്രീകുമാർ തന്റെ ലഗ്ഗേജ് എല്ലാം എടുത്തുകൊണ്ടു ഫ്ലാറ്റിലേക്ക് പോയി. തമ്പി വണ്ടിയെല്ലാം ചെക് ചെയ്തു പാർക്കിങ്ങിൽ ഒതുക്കിയിട്ടിട്ടേ പോകൂ.