വൈഷ്ണവം 3[മാലാഖയുടെ കാമുകൻ] 1271

അത് കേട്ടപ്പോൾ അവന് വീണ്ടും ചിരി വന്നു..

“അനങ്ങാൻ പോലും ആകാതെ കിടക്കുമ്പോൾ ആണ് അവളുടെ ഒരു ഫക്ക് യു… നിനക്ക് അതെ അറിയുള്ളോ കൊച്ചെ?”

അവന്റെ ചോദ്യം കേട്ടപ്പോൾ അവളുടെ മുഖത്ത് ഒരു പുഞ്ചിരി വിടർന്നു..

എന്നാൽ “ഏഹ്ഹ്..”

എന്നൊരു ശബ്ദത്തോടെ അവളുടെ മുഖം വേദന കൊണ്ട് വലിഞ്ഞു..

അവൻ അവളുടെ നീട്ടിവച്ച കൈത്തലം തലോടി..

“ഉറങ്ങിക്കോ.. അപ്പൊ വേദന പോകും…”

അവൻ പറഞ്ഞപ്പോൾ അവൾ കൈ വലിച്ചില്ല..

അങ്ങനെ വച്ച് അവൾ മെല്ലെ കണ്ണടച്ചു…

കുറച്ചു നേരം അങ്ങനെ അവളെ നോക്കി ഇരുന്നു അവനും ഒന്ന് മയങ്ങി..

“മോളെ..”

എന്ന് അലർച്ച കേട്ട് വിഷ്ണു ഞെട്ടി എഴുന്നേറ്റു ചുറ്റിനും നോക്കി..

കരഞ്ഞു കൊണ്ട് സാരി ഉടുത്ത ഒരു സ്ത്രീ റൂമിലേക്ക് തള്ളി കയറി വന്നു…

പുറകെ രണ്ടു സെക്യൂരിറ്റികളും..

ഈ ബഹളം ഒക്കെ കേട്ട് ഉറങ്ങി കിടന്ന വൈഷ്ണവി ഞെട്ടി…

അവർ മോളെ എന്ന് വിളിച്ചു കരഞ്ഞുകൊണ്ട് അവളെ കെട്ടി പിടിച്ചു..

ഈ കോലാഹലം എല്ലാം ഒക്കെ കേട്ടിട്ട് ആയിരിക്കണം നേഴ്സ് ഓടി വന്നു ദേഷ്യത്തോടെ അവരെ അവളുടെ ദേഹത്ത് നിന്നും പിടിച്ചു മാറ്റി..

“തലയിൽ സ്റ്റിച് ഇട്ടു കിടക്കുന്ന പെണ്ണിന്റെ മുകളിൽ കയറുന്നോ? എന്താ നിങ്ങൾക്ക് ബോധം ഇല്ലേ?”

നേഴ്സ് ദേഷ്യപ്പെട്ടു..

അവർ അപ്പോഴും കരഞ്ഞു..

“ഇവർ എന്തിനാണ് ഇത്ര ബഹളം ഉണ്ടാക്കുന്നത്? മകൾ അവിടെ ജീവനോടെ കിടക്കുന്നുണ്ടല്ലോ..

അതും പോരാത്തതിന് അവിടെ കിടന്ന ഒരു കാറും ഇടിച്ചു പൊളിച്ചു…”