വൈഷ്ണവം 3[മാലാഖയുടെ കാമുകൻ] 1271

വണ്ടി ഗേറ്റിനു വെളിയിൽ ഇട്ടു..

ഗേറ്റ് തുറന്നു കിടന്നിരുന്നു. അതിൽ വൈഷ്ണു നിലയം എന്ന സ്വർണലിപികൾ കാണാം..

“വൈഷ്ണു.. കൊള്ളാമല്ലോ..”

അവൻ ചിരിയോടെ അകത്തേക്ക് നടന്നു..

വലിയ ബംഗ്ലാവ് പ്രതീക്ഷിച്ചു ചെന്ന അവൻ കണ്ടത് ഒരു കൊച്ചു ഓടിട്ട വീട് ആണ്..

വളരെ വൃത്തി ആയി സൂക്ഷിച്ച ഇളം നീല പെയിന്റ് അടിച്ച ഒരു വീട്..

ചെടിച്ചട്ടികൾ തൂങ്ങി കിടക്കുന്നു. ഓർക്കിഡ്, റോസാ, മണിപ്ലാന്റ് ഒക്കെ നന്നായി വളർത്തിയിരുന്നു..

വീടിനു ചുറ്റും മരങ്ങൾ. പുളിയും, മഹാഗണിയും, നിറഞ്ഞു നിൽക്കുന്നു.. റംബുട്ടാൻ ചാമ്പക്ക എല്ലാം കായിച്ചു നിൽക്കുന്നു..

മിറ്റം പച്ചപുല്ലിൽ അലങ്കരിച്ച വല്ലാത്ത ഒരു വീട്…

അവൻ ഒരു നിമിഷം ആ വീടിന്റെ ഭംഗി നോക്കി നിന്നു.. ഇത്ര മനോഹരമായ ഒരു വീട്ടിൽ താമസിക്കാൻ ഭാഗ്യം വേണം..

അല്ല.. കൊച്ചു കൂര ആണെങ്കിലും അത് വൃത്തിക്ക് ഇടുന്നത് അതിൽ ജീവിക്കുന്നവരുടെ കഴിവ് ആണ്…

അവൻ വരാന്തയിൽ എത്തി..

ഡോർ ബെൽ ഇല്ല.. പകരം ഒരു മണി. അതിൽ അവൻ ഒന്ന് തട്ടി..

അവളുടെ അമ്മ വന്നു ഡോർ തുറന്നു..

“ആഹാ മോൻ… അകത്തു വരൂ… “

അവർ ചെറിയ ഒരു പുഞ്ചിരിയോടെ അവനെ അകത്തേക്ക് വിളിച്ചു.. അന്ന് കണ്ടതിൽ നിന്നും വളരെ വെത്യസ്തമായ ഒരു ഭാവം അവൻ അവരിൽ കണ്ടു..

ആരെയും ആകർഷിക്കുന്ന എന്തോ ഒന്ന്..

അവൻ അകത്തു കയറി. കുറെ മെഡലുകളും ട്രോഫികളും ഒക്കെ ഉണ്ട് ഷോകേസിൽ..

അകവും വളരെ വൃത്തിക്ക് ഇട്ടിരിക്കുന്നു.

നല്ല വീട്… അവൻ മനസ്സിൽ ചിന്തിച്ചു.

“ഇരിക്ക് മോനെ.. അവൾ ഉറക്കം ആണ്… അതെ.. എന്നോട് ക്ഷമിക്കണം.. അന്ന് അറിയാതെ പറ്റിയതാണ്.. ”

അത് പറഞ്ഞ ഉടനെ അവിടെ ഇരുന്ന ഫോൺ അടിച്ചു..