വസന്തം പോയതറിയാതെ -15 [ദാസൻ] 479

അവിടെ നിന്നും ഇറങ്ങി വണ്ടിയിൽ കയറാൻ നേരത്താണ് എന്റെ ഫോൺ ബെൽ അടിക്കുന്നത് അതെടുത്തു നോക്കിയപ്പോൾ കളക്ടറുടെ അമ്മ

” മോനെ…….. ”

നല്ല വേദനയോടെ ഉള്ള കരച്ചിൽ, എന്താണാവോ സംഭവിച്ചത് എന്ന് ചോദിക്കാൻ മുതിർന്നപ്പോൾ മറുതലക്കൽ നിന്നും

” ഞാനൊന്ന് ബാത്റൂമിൽ വീണു മോനെ. ഇവിടെ മോളില്ല, ഒരു കോൺഫറൻസിന് ഡൽഹിയിൽ പോയിരിക്കുകയാണ്. മോൻ എവിടെയാണ് ഒന്ന് ഇവിടെ വരെ വരുമോ? ”

” അതിനെന്താണമ്മെ ഞാനിവിടെ ടൗണിൽ തന്നെ ഉണ്ട്, ഉടനെ എത്താം ”

ഞാൻ പണിക്കാരോട് യാത്ര പറഞ്ഞു വണ്ടി എടുത്ത് സ്പീഡിൽ ഓടിച്ച് കളക്ടറുടെ ബംഗ്ലാവിൽ ചെന്നു, അമ്മ നേരത്തെ വിളിച്ചു സെക്യൂരിറ്റിയോട് പറഞ്ഞതുകൊണ്ട് തടസ്സങ്ങൾ ഒന്നുമില്ലാതെ വണ്ടി അകത്തേക്ക് കയറി. ബംഗ്ലാവിന് അകത്തേക്ക് കയറിയപ്പോൾ ഹാളിൽ കസേരയിൽ ഒരു കാല് കയറ്റിവെച്ച്, സെറ്റിയിൽ അമ്മ ഇരിക്കുന്നു. മുഖം കണ്ടാൽ അറിയാം നല്ല വേദനയുണ്ട്, അടുത്ത് അവിടത്തെ ജോലിക്കാരികൾ നിൽപ്പുണ്ട്. അമ്മ വേദനയോടെ പറഞ്ഞു

” മോള് പോയതുകൊണ്ട് ഡ്രൈവറോട് വരണ്ട എന്ന് പറഞ്ഞിരുന്നു. മോന് ബുദ്ധിമുട്ടായോ ”

” ഇല്ലമ്മെ, എന്താണ് അമ്മക്ക് പറ്റിയത്? ”

“ഞാൻ ബാത്‌റൂമിൽ ഒന്ന് തെന്നി വീണു, കാലിന് നല്ല വേദനയുണ്ട് ”

ഞാൻ അമ്മയുടെ കാല് പരിശോധിച്ചു, കാലിന് ചെറിയ നീര് ഉണ്ട്. ഞാൻ പറഞ്ഞു

” നമ്മുക്ക് ഹോസ്പിറ്റലിൽ പോകാം ”

” അതിന്റെ ആവശ്യമുണ്ടോ? ”

” കാലിന് ചെറിയ നീര് ഉണ്ട്. ഡോക്ടറെ ഒന്ന് കണ്ടുകളയാം ”

അങ്ങിനെ അമ്മ സമ്മതിച്ചു, ഞാൻ കൈകളിൽ കോരിയെടുത്തു വണ്ടിയുടെ ബാക്കിസീറ്റിൽ കിടത്തി. നേരെ അടുത്തുള്ള ഓർത്തോ സ്പെഷലിസ്റ്റിന്റെ അടുത്ത് കൊണ്ടുപോയി, അയാൾ പരിശോധിച്ച്, x ray എടുക്കാൻ പറഞ്ഞു. അതുകഴിഞ്ഞു വന്നു റിസൾട്ട്‌ കാണിച്ചപ്പോൾ കല്പാദത്തിൽ ചെറിയൊരു പൊട്ടൽ ഉണ്ടെന്ന് പറഞ്ഞു. അദ്ദേഹം തന്നെ പ്ലാസ്റ്റർ ഇട്ടുതന്നു, രണ്ടാഴ്ചത്തെ റെസ്റ്റും പറഞ്ഞു..