വസന്തം പോയതറിയാതെ -10 [ദാസൻ] 698

ഞാൻ വീടിനകത്ത് കയറി, ഹാളിൽ അമ്മയുടെ പ്രായമുള്ള ഒരു സ്ത്രീയും ഏകദേശം 35 – 40 വയസ്സ് തോന്നിക്കുന്ന മറ്റൊരു സ്ത്രീയും ഇരിക്കുന്നു. ഞാനും വല്യച്ഛനും അച്ചുവും ഒഴിച്ച് ബാക്കി എല്ലാവരും ഹാളിലുണ്ട്. ഞാൻ ചെല്ലുമ്പോൾ പ്രായം കുറഞ്ഞ സ്ത്രീ അമ്മയോട് പറയുന്നു.

” അച്ഛനും അമ്മയും ഒന്നും പറഞ്ഞില്ല. ഞാൻ പറഞ്ഞില്ലേ എന്റെ, പ്രായത്തിന്റെ അവിവേകമാണ് അന്ന് നടന്നത്. ”

അമ്മ എന്നെ കണ്ടപ്പോൾ അവരോട് പറഞ്ഞു.

” ഇത് വിനുവിന്റെ മകളാണ്. പേര് ഗൗരി ”

അത് കേട്ടപ്പോൾ ആ രണ്ടു സ്ത്രീകളുടെയും മുഖത്ത് ഒരത്ഭുതം. പ്രായം കൂടിയ സ്ത്രീ എന്റെ അടുത്തേക്ക് നടന്നുവന്ന കയ്യിൽ പിടിച്ചു കൊണ്ടു പോയി അവരുടെ അടുത്ത് ഇരുത്തി. പ്രായം കുറഞ്ഞ സ്ത്രീ എന്റെ കൈപിടിച്ച് തലോടിക്കൊണ്ട്.

” മോളുടെ പേര് തന്നെയാണ് എനിക്കും.ഡിഗ്രിക്ക് പഠിക്കുകയാണല്ലേ, അമ്മ പറഞ്ഞായിരുന്നു. സെക്കൻഡ് ഇയർ ആണല്ലേ. ഇത് കഴിഞ്ഞ് എന്താണ് മോളുടെ പ്ലാൻ? ”

അപ്പോൾ ഇതാണ് ആ പയ്യൻ പറഞ്ഞ കളക്ടർ ഗൗരിയമ്മായി. എന്തിനാണാവോ ഇവർ ഇവിടെ വന്നത്? അച്ഛൻ ആ പയ്യനെ തല്ലിയതിന് ചോദിക്കാൻ വന്നതായിരിക്കും അപ്പോൾ പുറകെ പോലീസും ഉണ്ടാകും. ഇങ്ങനെ ഓരോന്ന് ആലോചിക്കുന്നതിനിടയിൽ അമ്മ പറയുന്നത് കേട്ടു

” മോൾക്ക് മോളെ പോലെ കളക്ടർ ആകാനാണ് താല്പര്യം. ”

അപ്പോൾ കളക്ടർ അമ്മ എന്നോട് ചോദിച്ചു.

” ലക്ഷ്യബോധം ഉള്ളത് നല്ലതാണ്. അതിന് കോച്ചിങ്ങിനൊക്കെ പോകുന്നുണ്ടോ “