മിന്നും താരകം( മനൂസ്) 3201

ചേട്ടനും അച്ഛനെ പോലെ തന്നെ ഗൗരവക്കാരൻ ആയിരുന്നതിനാൽ കുട്ടിക്കാലം ഏറെക്കുറെ ഏകാന്തതയുടെ തടവറയിൽ ആയിരുന്നു…

 

ആകെയുള്ളൊരു ആശ്വാസം അമ്മ മാത്രമായിരുന്നു…

 

പൊതുവെ അധികമാരോടും മിണ്ടാത്ത പ്രാകൃതമായതിനാൽ അടുത്ത കൂട്ടുകാരികളും ഇല്ലായിരുന്നു..

 

അങ്ങനെ എല്ലാത്തിൽ നിന്നും ഉൾവലിഞ്ഞു നിന്ന എന്റെ മനസ്സിലേക്കാണ് അപ്രതീക്ഷിതമായ ചേട്ടായിയുടെ കടന്ന് വരവ്..

 

നാട്ടിലെ എല്ലാ വിശേഷങ്ങൾക്കും പുഞ്ചിരിയോടെ ഓടി നടന്ന് പ്രവർത്തിക്കുന്ന ഒരു ചെറുപ്പക്കാരനോട് ആദ്യം തോന്നിയ കൗതുകം..

 

മിണ്ടാൻ കഴിയാത്ത അമ്മയോടൊപ്പം വഴിനീളെ വിശേഷങ്ങൾ പറഞ്ഞു അമ്മയെ ചേർത്ത് പിടിച്ചു പോകുന്നത് കണ്ടപ്പോൾ കൗതുകം ചെറിയ ഇഷ്ടത്തിന് വഴി മാറി..

 

ഞങ്ങളുടെ വീടിന്റെ പെയിന്റ് പണിക്ക് വന്നപ്പോൾ ആളെ വളരെ അടുത്തറിഞ്ഞപ്പോൾ ആ ഇഷ്ടത്തിന് മറ്റൊരു മാനം അറിയാതെ കൈവന്നു.

 

ആർക്കും ഇഷ്ടം തോന്നുന്ന പെരുമാറ്റം..

 

സ്വന്തം വീട്ടുകാരിൽ നിന്നും ഇത്രയും നാളും കിട്ടാത്ത പരിഗണനയും സന്തോഷവും ചേട്ടായിയുടെ പുഞ്ചിരിയിലും കുശാലാന്വേഷണങ്ങളിൽ നിന്നും എനിക്ക് കിട്ടി..

 

ആ ദിവസങ്ങളിൽ പരസ്പരം കാണുമ്പോൾ എനിക്ക് നൽകുന്ന ഓരോ പുഞ്ചിരി എനിക്ക് വിലമതിക്കാൻ ആകാത്തതായിരുന്നു..

 

ആരെയും പെട്ടെന്ന് കൂട്ടിലാക്കുന്ന പ്രകൃതം.. കുട്ടികളുടെ കുറുമ്പും നിഷ്കളങ്കമായ മനസ്സും എന്നെ ആ മനസ്സിലേക്ക് അടുപ്പിച്ചു..

 

അറിയാതെ മനസ്സ്  പലതും മോഹിച്ചു…

 

തൊലിയുടെ നിറമോ ജാതിയോ സമ്പത്തോ ഒന്നും ആ ഇഷ്ടത്തിനെ അളക്കാനുള്ള അളവുകോൽ ആയിരുന്നില്ല… മനസ്സ് കൊണ്ടുള്ള നിസ്സ്വാർത്ഥമായ സ്നേഹം..