മാന്ത്രികലോകം 6 [Cyril] 2512

“അമ്മക്ക് ഒരുപാട്‌ ഉത്തരവാദിത്വങ്ങള്‍ ഉണ്ട്, ഫ്രെൻ…. പെട്ടന്നൊരു ദിവസം അമ്മക്ക് കാരണമില്ലാതെ നിന്റെ ജീവിതത്തിൽ നിന്നും അപ്രത്യക്ഷമാവാൻ കഴിയില്ലായിരുന്നു. പിന്നെ അമ്മ ആരാണെന്ന സത്യം മറ്റുള്ളവർ അറിഞ്ഞാല്‍ ഒരുപക്ഷേ മലാഹിയും ഒഷേദ്രസും അക്കാര്യം അറിയാൻ സാധ്യതയുള്ളത് കൊണ്ട്, അമ്മ എല്ലാം നിന്നില്‍ നിന്നു പോലും മറച്ചു വെച്ചു.”

“പക്ഷേ എന്നോട് പറഞ്ഞിരുന്നെങ്കില്‍ ആ രഹസ്യത്തെ ഞാൻ എന്റെ മനസില്‍ തന്നെ സൂക്ഷിക്കുമായിരുന്നു….” നിരസത്തോടെ ഞാൻ പറഞ്ഞു.

“പക്ഷേ നി ശിബിരത്ത് പോകുന്ന അന്നു തന്നെ റാലേൻ നിന്റെ ശക്തി എന്താണെന്ന് പരീക്ഷിച്ച് നോക്കും… ആ സാഹചര്യത്തിൽ നിന്റെ മനസ്സിനെ അയാള്‍ക്ക് വായിക്കാന്‍ കഴിയുമായിരുന്നു എന്നത് നി മറക്കുന്നു, ഫ്രെൻ.”

“പക്ഷേ ഞാനും അമ്മയും ആരാണെന്ന് അറിഞ്ഞാല്‍ എന്താണ് കുഴപ്പം…? എത്രയോ കുട്ടികൾ ദൈവങ്ങളിൽ നിന്നും ജനിച്ചിട്ടുണ്ട്.”

ഹഷിസ്ത്ര കുറച്ച് നേരം എന്നെ വെറുതെ നോക്കി നിന്നിട്ട് പറഞ്ഞു —,

“നി മറ്റുള്ളവരെ പോലെയല്ല, ഫ്രെൻ. നിന്റെ സുഹൃത്ത് ദനീരിന്റെ വംശത്തിൽ പെട്ട പ്രതിമ-സ്ത്രീ ഒരുപാട്‌ പ്രവചനങ്ങള്‍ പറഞ്ഞിട്ടുണ്ട്. അക്കൂട്ടത്തില്‍ നിന്നെ കുറിച്ചും അവർ പറഞ്ഞിട്ടുണ്ട്, ഫ്രെൻ…. അതുകൊണ്ടാണ് നിന്റെയും അമ്മയുടെയും അനന്യതയെ അമ്മ രഹസ്യമായി സൂക്ഷിച്ചിരുന്നത്.”

ഞാൻ വായും പൊളിച്ച് അവളെ നോക്കി.

“പ്രതിമ-സ്ത്രീ….? എന്നെ കുറിച്ച് പ്രവചനം…?” സംശയത്തോടെ ഞാൻ ചോദിച്ചു. “പിന്നേ മറ്റുള്ളവരുടെ കാര്യത്തില്‍ മനസ്സിനെ വായിക്കാൻ റാലേന് കഴിയുമെന്ന കാര്യം ശരിയായിരിക്കാം…. പക്ഷേ എന്റെ മനസ്സിനെയും എന്റെ ശക്തിയും ഒന്നും തന്നെ അയാള്‍ക്ക് കാണാനും മനസ്സിലാക്കാനും കഴിയുന്നില്ല എന്ന് എപ്പോഴും അയാൾ പറയുന്നത് ഞാൻ കേട്ടിട്ടുണ്ട്.

ഒരു വര്‍ഷത്തിനു മുൻപ് മാത്രമാണ് എനിക്ക് മാന്ത്രിക ശക്തി പ്രയോഗിക്കാൻ കഴിയുമെന്ന് അയാള്‍ക്ക് മനസ്സിലായത്…. അപ്പോൾ പോലും അയാള്‍ക്ക് എന്റെ ശക്തിയെ കാണാനും മനസ്സിലാക്കാനും കഴിയുന്നില്ല എന്നാണ്‌ പറഞ്ഞത്— എനിക്ക് പോലും ഒരു വര്‍ഷത്തിനു മുന്‍പാണ് മാന്ത്രിക ശക്തി ഉണ്ടെന്ന് മനസ്സിലായത് തന്നെ….”

“നിന്റെ ശക്തിയെ അമ്മയ്ക്കും ശില്‍പ്പിക്കും കാണാന്‍ കഴിഞ്ഞിരുന്നു, ഫ്രെൻ. പക്ഷേ അവർക്ക് പോലും നിന്റെ ശക്തി എന്താണെന്ന് പൂര്‍ണമായി മനസ്സിലാക്കാൻ കഴിഞ്ഞിട്ടില്ല….,

എനിക്കും റാലേനെ പോലെ നിന്റെ ശക്തിയെ കാണാന്‍ കഴിയില്ല. അതുകൊണ്ടാണ് നി എന്നെക്കാളും ശക്തനെന്നു ഞാൻ പറയാൻ കാരണം.

പിന്നേ നി ആരെന്ന് റലേൻ അറിഞ്ഞാല്‍, ഏതെങ്കിലും സാഹചര്യത്തിൽ ശില്‍പ്പി അറിയാൻ ഇടയാകും… ചില സാഹചര്യത്തിൽ ശില്‍പ്പിയുടെ മനസ്സ് തുറന്ന പുസ്തകം പോലെയാണ് — അപ്പോൾ മലാഹി നിന്നെയും അമ്മയെയും കുറിച്ച് അറിയാൻ ഇടയാകും.

അങ്ങനെ വരുമ്പോൾ, നി ആരാണെന്ന് മലാഹിക്ക് മനസ്സിലാക്കും… അതോടെ മലാഹി നിന്നെ സ്വാധീനിച്ച് അതിന്റെ പക്ഷത്ത് ചേര്‍ക്കാനുള്ള ശ്രമം തുടങ്ങുമെന്ന് അമ്മ ഭയന്നു. അതുകൊണ്ടാണ് അമ്മ, അമ്മയുടെയും നിന്റെയും അനന്യതയെ അമ്മ രഹസ്യമായി സൂക്ഷിച്ചത്.”

“എന്നെ കുറിച്ച് എന്ത് പ്രവചനം ആണ് ആ പ്രതിമ-സ്ത്രീ പറഞ്ഞത്…..” ഞാൻ ചോദിച്ചു.