മാന്ത്രികലോകം 6 [Cyril] 2512

പെട്ടന്ന് സിദ്ധാര്‍ത്ഥിന്റെ കഠാര രണ്ടും ചുവന്ന പ്രകാശം പരത്തി ജ്വലിക്കാൻ തുടങ്ങി — സിദ്ധാര്‍ത്ഥ് അവന്റെ മാന്ത്രിക ശക്തി ഉപയോഗിച്ച് അവന്റെ കഠാര രണ്ടിനെയും ശക്തി പെടുത്തുകയും…. കഠാര അവന്റെ കൈയിൽ നിന്നും വഴുതി പോകാതിരിക്കാന്‍ വേണ്ടിയുള്ള വിദ്യയയുമാണ് പ്രയോഗിച്ചത്.

ഫ്രെൻ പുഞ്ചിരിക്കുക മാത്രമാണ് ചെയ്തത്. എന്നിട്ട് സമയം കളയാതെ അവന്‍ സിദ്ധാര്‍ത്ഥ്നെ ആക്രമിച്ചു…,

പിന്നെ അവിടെ നടന്നത് കണ്ടു എല്ലാവരും ശ്വാസം അടക്കി പിടിക്കുകയാണ് ചെയ്തത്…

ഫ്രെന്നിന്റെ ചലനവേഗം കണ്ട് സിദ്ധാര്‍ത്ഥ് പതറി. അവന്റെ കൈയുടെ ചലനത്തെ കാണാന്‍ പോലും വളരെ പ്രയാസം ഉണ്ടായിരുന്നു.

ഒരു നിമിഷം ഫ്രെൻ സിദ്ധാര്‍ത്ഥിന്റെ മുന്നില്‍ നിന്നും ആക്രമിച്ചു…. അവന്റെ കൈകളെ മിന്നായം പോലെ മാത്രമാണ് എനിക്ക് കാണാന്‍ കഴിഞ്ഞത്… അവന്റെ ഏതു കൈയാണ് സിദ്ധാര്‍ത്ഥിനെ ആക്രമിക്കുന്നത് എന്ന് പോലും ആര്‍ക്കും മനസിലാക്കാന്‍ കഴിഞ്ഞില്ല…

എല്ലാവരും അന്തംവിട്ടു നോക്കി നിന്നു.

ആദ്യമാണ് ഫ്രെൻ ഇത്രയും വേഗത്തിൽ പൊരുതുന്നത്…. ചില സമയം അവനെ കാണാന്‍ തന്നെ ബുദ്ധിമുട്ടി. അത്ര വേഗത്തിലാണ് അവന്‍ നീങ്ങുന്നത്.

സിദ്ധാര്‍ത്ഥിന്റെ തലയ്ക്ക് നേരെ ഫ്രെന്നിന്റെ കഠാര പാഞ്ഞ പോയതും സിദ്ധാര്‍ത്ഥ് അതിനെ തടയാൻ അവന്റെ കഠാര ഉയർത്തി – പക്ഷേ ഒരു മിന്നായം പോലെ ഫ്രെന്നിന്റെ കഠാര പിടി സിദ്ധാര്‍ത്ഥിന്റെ നെഞ്ചിലാണ് പതിച്ചത്.

വേദനയില്‍ കരഞ്ഞ് കൊണ്ട്‌ സിദ്ധാര്‍ത്ഥ് പിന്നോട്ട് ചാടി.

പക്ഷേ അവനെക്കാൾ വേഗത്തിൽ ഫ്രെൻ സിദ്ധാര്‍ത്ഥിന്റെ പിന്നില്‍ എത്തി കഴിഞ്ഞിരുന്നു….,

ഇത്തവണ ഫ്രെന്നിന്റെ കഠാര പിടി സിദ്ധാര്‍ത്ഥിന്റെ തോളില്‍ ശക്തിയായി പതിച്ചു…

സിദ്ധാര്‍ത്ഥ് പിന്നെയും കരഞ്ഞുകൊണ്ട് ഒരു വശത്തേക്ക് ചാടി.

പക്ഷേ പിന്നെയും ഫ്രെൻ സിദ്ധാര്‍ത്ഥിന്റെ അടുത്തെത്തി കഴിഞ്ഞിരുന്നു — കഠാര സിദ്ധാര്‍ത്ഥിന്റെ നെഞ്ച് ലക്ഷ്യമാക്കി പാഞ്ഞു….

സിദ്ധാര്‍ത്ഥ് അവന്റെ രണ്ട് കഠാരയും ഉപയോഗിച്ച് ഫ്രെന്നിന്റെ കഠാര തടയാൻ നോക്കുമ്പോൾ — ഫ്രെന്നിന്റെ അടുത്ത കഠാര പിടി സിദ്ധാര്‍ത്ഥിന്റെ തുടയിൽ പതിച്ചു.

“ഫ്രെൻ ഏതു കൈ ഉപയോഗിക്കുന്നു എന്നുപോലും എനിക്ക് കാണാന്‍ കഴിയുന്നില്ല…” കൂട്ടത്തില്‍ നിന്നും ആരോ അമ്പരപ്പോടെ പറഞ്ഞു.

വിദ്യാര്‍ത്ഥികള്‍ പലരും എന്തെല്ലാമോ പറഞ്ഞ്‌ അത്ഭുതപ്പെട്ടു കൊണ്ടിരുന്നു.

സിദ്ധാര്‍ത്ഥിന് പ്രതിരോധിക്കാൻ പോലും കഴിയാത്ത വളരെ ബുദ്ധിമുട്ടുള്ള ആക്രമണങ്ങളാണ് ഫ്രെന്നിൽ നിന്നും വന്നുകൊണ്ടിരുന്നത്.

ചിലപ്പോൾ പമ്പരം പോലെ… ചിലപ്പോൾ ചുഴലിക്കാറ്റ് പോലെ — അങ്ങനെ ചുറ്റി കറങ്ങി ഫ്രെൻ എല്ലാ വശത്ത് നിന്നും ആക്രമിച്ചു.

അങ്ങനെ മൂന്ന് നിമിഷനേരം ഫ്രെന്നിനെ ഞങ്ങൾ എല്ലാവരും ഒരു മിന്നായം പോലെ മാത്രമാണ് കണ്ടത്.

അതിന്റെ ഇടക്ക് ഫ്രെന്നിന്റെ കഠാര പിടി നൂറ്റി ഇരുപത് പ്രാവശ്യമെങ്കിലും സിദ്ധാര്‍ത്ഥിന്റെ ദേഹത്ത് പല ഭാഗത്ത് പതിച്ച് കഴിഞ്ഞിരുന്നു.

ശ്വാസം പോലും എടുക്കാന്‍ മറന്നു ഞങ്ങൾ എല്ലാം നോക്കി നിന്നു.