മാന്ത്രികലോകം 6 [Cyril] 2512

പക്ഷേ യക്ഷ ലോകത്തും പാതാള ലോകത്തും ഉള്ള അഗ്നിപര്‍വ്വതങ്ങൾ മാന്ത്രിക ശക്തിയുള്ളവയാണെന്ന് നിനക്ക് മനസ്സിലായിട്ടുണ്ടാകും. അത് രണ്ടിനെയും പാതാള ദൈവവും പ്രകൃതിയും ചേര്‍ന്ന് സൃഷ്ടിച്ചതാണ്.

നിനക്ക് പാതാള ലോകത്തെ ഒരു പരിധി വരെ നിയന്ത്രിക്കാൻ കഴിഞ്ഞെന്ന് വരും, പക്ഷേ നിന്നെക്കാൾ ശക്തിയുള്ള ആ ദ്രാവക അഗ്നിക്ക് വേണമെങ്കിൽ നിന്നെ നശിപ്പിച്ചു കളയാന്‍ കഴിയുമെന്ന് മറക്കരുത്…..

എന്നാല്‍ യക്ഷ ലോകത്തുള്ള ദ്രാവക അഗ്നി പുഴ നിന്നെ അംഗീകരിച്ചു കഴിഞ്ഞിരിക്കുന്നു…. അതുകാരണം, അത് അതിന്റെ സത്തയുടെ അംശം നിന്റെ ആത്മാവില്‍ പകര്‍ന്നു തരികയും ചെയ്തു — പക്ഷേ പാതാള ലോകത്തുള്ള അഗ്നിപര്‍വ്വതം വളരെ അപായകരമായ ഒന്നാണ്. അത് അത്ര പെട്ടന്ന് ആരെയും അംഗീകരിച്ചു അതിന്റെ സത്ത പകര്‍ന്നു തന്ന്‌ അനുഗ്രഹിക്കില്ല എന്നും മനസ്സിലാക്കുക.

അതുകൊണ്ടാണ് നി അവിടെ വെച്ച് എന്തെങ്കിലും വിഡ്ഢിത്തം കാണിക്കും മുന്നേ, എനിക്ക് നിന്നെയും കൊണ്ട് അതിന്റെ പിടിയില്‍ അകപ്പെടാതെ അവിടെനിന്നും രക്ഷപ്പെടേണ്ടി വന്നത്….”

“ആ പച്ച ദ്രാവക അഗ്നിയുടെ ശക്തിയെ നിനക്ക് എതിരേൽക്കാൻ കഴിയുമോ….?” ഞാൻ ചോദിച്ചു.

അഗ്നി എന്നെ തുറിച്ച് നോക്കി.

“പണ്ട്‌ വെറും ഇരുപത് മാന്ത്രികർക്ക് മാത്രമേ യക്ഷ ലോകത്ത് നിന്നും പാതാള ലോകത്തേക്ക് അഗ്നി പുഴ മുഖേനെ എത്തിപ്പെടാന്‍ കഴിഞ്ഞിട്ടുള്ളു. അതിൽ റാലേനും ഒരാളാണ്.

അവരെ അഗ്നി പുഴ അംഗീകരിച്ചുകൊണ്ട് ചാരമാക്കാതെ പാതാള ലോകത്ത് എത്തിച്ചു എങ്കിലും അവര്‍ക്ക് അഗ്നി പുഴ അതിന്റെ സത്ത പകര്‍ന്നു കൊടുത്തിരുന്നില്ല, ഫ്രെൻ.

ഇന്നുവരെ നോക്കിയാല്‍, ആദ്യമായും അവസാനമായും അഗ്നി പുഴ അതിന്റെ സത്ത നല്‍കി നിന്നെ മാത്രമാണ് അനുഗ്രഹിച്ചിട്ടുള്ളത് — അതിന്റെ കാരണം എനിക്കറിയില്ല.

പിന്നേ ആ അഗ്നി പുഴ മുഖേനെ എനിക്ക് പോലും യക്ഷ ലോകത്ത് യാത്ര ചെയ്യാൻ കഴിയില്ല, അങ്ങനെയുള്ള എനിക്ക് എങ്ങനെയാണ് പാതാള ലോകത്തുള്ള ആ പച്ച ദ്രാവക അഗ്നിയുടെ ശക്തിയെ എതിരേൽക്കാൻ കഴിയുക…?”

“പക്ഷേ യക്ഷ ലോകത്തുള്ള അഗ്നി പുഴയെ എനിക്കിവിടെ കാണാന്‍ കഴിഞ്ഞില്ലല്ലോ… പിന്നെങ്ങനെ റാലേനും കൂട്ടരെയും തിരിച്ചു പോയി…?” എന്റെ സംശയം ഞാൻ ചോദിച്ചു.

“ആ പച്ച അഗ്നി ദ്രാവകം വര്‍ഷിക്കുന്ന അഗ്നിപര്‍വ്വത്തിന് മുകളിലായി, ആകാശത്ത് നി കണ്ട ആ മേഘങ്ങളിലാണ് യക്ഷ ലോകത്തുള്ള അഗ്നി പുഴ, പാതാള ലോകത്തെയും യക്ഷ ലോകത്തെയും കൂട്ടിയിണക്കുന്നത്…. നിന്റെ മാന്ത്രിക ശക്തി ഉപയോഗിച്ച് ആ മേഘങ്ങളിൽ പോയാൽ നിനക്ക് അവിടെനിന്നും തിരികെ യക്ഷ ലോകത്ത് പോകാൻ കഴിയും…”

“ദ്രാവക അഗ്നി പുഴയെ നിനക്ക് എതിരേൽക്കാൻ കഴിയില്ലെങ്കിലും, അപ്പോ പിന്നെ എങ്ങനെയാണ് നി മാന്ത്രിക ലോകത്ത് എന്റെ മുന്നില്‍ എത്തി പെട്ടത്….?” സംശയത്തോടെ ഞാൻ ചോദിച്ചു.

“നിന്നെ പോലെ ഞാൻ ശക്തന്‍ അല്ലെങ്കിലും എനിക്കും ഒരു പരിധി വരെ എല്ലാ അഗ്നിയെയും സ്വാധീനിച്ചു ‘അഗ്നി-യാത്ര’ ചെയ്യാൻ കഴിയും.

അതായത് : അഗ്നി ചെന്നായ ആയ എനിക്കും എന്റെ വര്‍ഗ്ഗത്തിനും – അതുപോലെ റീനസിന്റെ പുത്രനായ നിനക്കും – അഗ്നിയോ ദ്രാവക അഗ്നിയേയോ സൃഷ്ടിക്കാന്‍ കഴിയും, ഫ്രെൻ. അങ്ങനെ അഗ്നിയെ സൃഷ്ടിച്ച് എനിക്ക് ഏതു ലോകത്ത് വേണമെങ്കിലും, ആ ലോകത്തുള്ള ഏതെങ്കിലും അഗ്നിയില്‍ അദൃശ്യനായി എത്തിപ്പെടാന്‍ കഴിയും.

പക്ഷേ സുപരിചിതമായ സ്ഥലത്ത് മാത്രമേ – അതായത് എത്തേണ്ട സ്ഥലം നിന്റെ മനസില്‍ വ്യക്തമായി തെളിഞ്ഞാല്‍ മാത്രമേ ആ സ്ഥലത്ത് എത്താന്‍ കഴിയുകയുള്ളു…. അല്ലെങ്കിൽ ഏതു ലോകത്ത് ഞാൻ പ്രത്യക്ഷപ്പെടും എന്നൊന്നും എനിക്ക് നിശ്ചയമില്ല.

അതായത് : ഇതിനു മുമ്പ്‌ നി കണ്ടിട്ട് പോലുമില്ലാത്ത സ്ഥലത്തെ കുറിച്ച് നി ചിന്തിച്ചാൽ…. ആ സ്ഥലത്തെ കുറിച്ച് വ്യക്തമല്ലാത്ത രൂപത്തെയാണ് നിന്റെ മനസ്സിൽ നി സങ്കല്‍പ്പിക്കുക എന്നിരിക്കട്ടെ – പാതാള ലോകത്ത് എത്തേണ്ടതിന് പകരം നി യക്ഷ ലോകത്ത് ആയിരിക്കും എത്തി പെടുക.

അതുകൊണ്ട്‌ നിനക്ക് അറിയാൻ പാടില്ലാത്ത സ്ഥലത്ത് പോകാൻ നി ശ്രമിക്കരുത്, ഫ്രെൻ…!