ഭ്രാന്ത് {അപ്പൂസ്} 1916

കുയിലും വിട്ട് കൊടുക്കാൻ ഒരുക്കമായിരുന്നില്ല…അവളെക്കാൾ ഏറെ വാശിയോടെ അത് ഏറ്റുപാടി….

ആ കുയിലിനോട് ഏറ്റ് പാടുന്നതിനിടെ തനിക്ക് പോവേണ്ട ഭാഗത്ത് നിന്ന് വഴി മാറി പോയത് അവൾക്ക് മനസിലാവുന്നുണ്ടായിരുന്നില്ല….

താൻ ഇതുവരെയും വരാത്ത ഭാഗങ്ങളിൽ ചെന്നെത്തിയതോ ചുറ്റുപാടും വീശുന്ന കാറ്റിനു ഒരു വല്ലാത്ത വശ്യത കൈ വന്നതോ ശാന്തമെങ്കിലും രൗദ്രഭാവത്തെ പുണർന്ന പ്രകൃതി വെയിൽ പോലും കീഴെ മണ്ണിലേക്ക് അടുപ്പിക്കാതെ തടയുന്നതും ….. ഒന്നും അമ്മൂട്ടിക്ക് മനസിലായതേ ഇല്ല…

കുയിലിനെ അന്വേഷിച്ചു കണ്ടെത്താനായില്ലെങ്കിലും അപ്പോളേക്കും അവളുടെ മുൻപിലേക്ക് ഒരു അപ്പൂപ്പൻതാടി പറന്നു വന്നു….

അതോടെ അവൾ കുയിലിനെ വിട്ട് ആ അപ്പൂപ്പൻ താടിക്ക് പുറകെ ആയി നടത്തം…..

കാറ്റിൽ പറന്ന് പോവുന്ന അതിന് പുറകിൽ നടന്നും ഓടിയും അവളൊരു വലിയ ആല്മരത്തിന്റെ ചുവട്ടിൽ എത്തി…

അവൾക്കെത്തുന്നതിലും അല്പം ഉയരത്തിൽ കുടുങ്ങി കിടക്കുന്ന ആ അപ്പൂപ്പൻ താടി ചാടി പിടിക്കാൻ അവളേറെ ശ്രമിച്ചു….

ഏറെ പരിശ്രമിച്ചിട്ടും അവൾക്ക് പിടികൊടുക്കാതെ പറ്റിച്ച അപ്പൂപ്പൻ താടിയെ നോക്കി നിരാശയോടെ കൊഞ്ഞനം കുത്തി അമ്മൂട്ടി….

പക്ഷേ പ്രകൃതിയുടെ കൗതുകം അതിലും അവസാനിച്ചില്ലായിരുന്നു…. അപ്പൂപ്പൻ താടി സ്വന്തമാക്കാനുള്ള ശ്രമം ഉപേക്ഷിച്ചു തിരിഞ്ഞ അവൾ കാണുന്നത് ഏതാനും മയിൽ‌പീലികൾ ചിതറി കിടക്കുന്നതാണ്…

ആലിന്റെ മറുവശത്ത് പാതി സ്ഥലം എനിക്കും അവകാശമുണ്ട് എന്നവണ്ണം ആലിനൊപ്പം വളർന്നു നിൽക്കുന്ന നാട്ട്മാവിന്റെ ചുവട്ടിലാണ് അവ കിടക്കുന്നത്…

കുയിലിനെ കാണാനോ അപ്പൂപ്പൻതാടി സ്വന്തമാക്കാനോ കഴിഞ്ഞില്ലെങ്കിലും നിലത്തു ചിതറി കിടക്കുന്ന മയിൽ‌പീലികൾ എളുപ്പം സ്വന്തമാക്കാൻ കഴിയുമെന്ന് ഉറപ്പിച്ചു അവൾ അങ്ങോട്ട് ഓടി….

ഏറ്റവും നീളമുള്ള മയിൽ പീലിയിലേക്ക് തന്നെ അവൾ കൈനീട്ടി….

ആ മയിൽ‌പീലി സ്വന്തമാക്കും മുമ്പ് മാവിലെ പഴുത്ത ഇലകളും മാങ്ങകളും നിലത്തേക്ക് വീഴ്ത്തി മാവിനെ അപ്പാടെ കുലുക്കി കൊണ്ടൊരു ഭീകരരൂപം അവൾക്ക് മുന്നിലോട്ട് ചാടി….

മയിൽ‌പീലി എടുക്കാനോ എന്താണ് ആ ഭീകരരൂപം എന്ന് നോക്കാനോ പോലും ശ്രമിക്കാതെ അമ്മൂട്ടി സർവ്വശക്തിയും സംഭരിച്ചു മുന്പോട്ട് ഓടി….

ഏതാനും നിമിഷങ്ങൾ കഴിയുമ്പോളേക്ക് ആ ഭീകരജീവിയുടെ കാലടി ശബ്ദം അവളെ തേടിയെത്തി….

അമ്മൂസ് കൂടുതൽ വേഗത്തിൽ ഓടാൻ ശ്രമിച്ചെങ്കിലും ആ ശബ്ദം കൂടുതൽ അടുത്ത് വന്നു കൊണ്ടിരുന്നു…