നിയോഗം 3 The Fate Of Angels [മാലാഖയുടെ കാമുകൻ] 3769

പ്രിയപ്പെട്ട മാലാഖയുടെ കാമുകാ, ലിനൂ..

താങ്കളുടെ മറുപടി കണ്ടപ്പോള്‍ ഒരുപാട് സന്തോഷം തോന്നി, എന്റെ അഭിപ്രായം വായിച്ചല്ലോ, അതിനെ പോസിറ്റീവായെടുത്ത് തിരിച്ച് മറുപടി തന്നല്ലോ, സന്തോഷം..സന്തോഷം മാത്രം..?

ഞാന്‍ ആദ്യം പറഞ്ഞതുപോലെ തീരുമാനം താങ്കളുടെ ഇഷ്ടമാണ്, ഞാനത് സർവതാ മാനിക്കുന്നു. താങ്കളുടെ കഥകൾ കാണാതായതായിന്റെ ആധിയിലും, സങ്കടത്തിലും, പലയിടത്തെയും കമന്റുകള്‍ തപ്പി നടന്നപ്പോൾ താങ്കളുടെയും, ഒപ്പം താങ്കൾ സൂചിപ്പിച്ച ആ പ്രിയപ്പെട്ട സുഹൃത്ത് “വേദിക” യുടെയും കമന്റുകള്‍ ഈ പറഞ്ഞ വിഷയത്തെ മുന്‍നിര്‍ത്തി കണ്ടിരുന്നു. താങ്കളെ കുറിച്ചും, കുടുംബത്തെക്കുറിച്ചും, വേദികയെ കുറിച്ചും അനാവശ്യം പറഞ്ഞ അവർ ആരാണെന്നോ, എന്താണ്‌ പറഞ്ഞത് എന്നോ എനിക്കറിയില്ല. അത് എന്ത് തന്നെ ആണെങ്കിലും താങ്കള്‍ക്ക് വേദനിച്ചിട്ടുണ്ടെങ്കിൽ അത് പൂര്‍ണമായും തെറ്റു തന്നെയാണ്. അതുപോലെ കുറേ വെട്ടുക്കിളി കൂട്ടങ്ങൾ എല്ലാ ഓൺലൈൻ പ്ലാറ്റ്ഫോമുകളിലും ഉണ്ട്, അണോണിമിറ്റിയുടെ മറയിലിരുന്നുകൊണ്ട് എന്ത് തരവഴിത്തരവും പറഞ്ഞ്, അനാശാസ്യവും, ആഭാസവുമായ കമന്റുകള്‍ കാണുന്ന ഇടത്തൊക്കെ ഇട്ട് എന്തോ കേമത്തം ചെയ്ത പോലെ സ്വയം ആത്മനിര്‍വൃതി അടയുന്ന കുറേ പാഴ്ജന്മങ്ങൾ.

എങ്കിലും താങ്കളോടുള്ള ഇഷ്ടക്കൂടുതൽ കൊണ്ടും, ആ എഴുത്തിന്റെ ആസ്വാദകൻ എന്ന സ്വാതന്ത്ര്യത്തിലും ഒന്നു രണ്ടു കാര്യങ്ങൾ പറഞ്ഞോട്ടെ, തെറ്റാണെന്ന് തോന്നുവാണെങ്കിൽ പൊറുക്കണം, ഒരു ചെറു പുഞ്ചിരിയോടെ ഞാന്‍ ചോദിച്ചത് തള്ളി കളഞ്ഞേക്കണം. കലാകാരായവർക്കെല്ലാം, അവർ സിനിമാക്കാരകട്ടെ, നാടകപ്രവര്‍ത്തകര്‍ ആകട്ടെ, സംവിധായകരാകട്ടെ, എഴുത്തുകാരാകട്ടെ, സംഗീതഞ്ജരാകട്ടെ, കഥകളി വിദ്വാനാകട്ടെ, നർത്തകരാകട്ടെ, അങ്ങനെ സർഗാത്മകമായ കഴിവുകൾ കിട്ടിയ ഏതാളുമാകട്ടെ, അവർക്കെല്ലാം ആസ്വാദകരുടേയും, ആരാധകരുടേയും അത്രയും തന്നെ വിമര്‍ശകരും, വെറുക്കുന്നവരും ഉണ്ടാകും. നമുക്ക് പല കഴിവുകളും പരിശീലനത്തിലൂടെ നേടിയെടുക്കാനും, പ്രയോഗത്തില്‍ വരുത്തുവാനും സാധിക്കും, പക്ഷേ സര്‍ഗാത്മകമായി നമുക്ക് ലഭിക്കുന്ന കഴിവും, അതിലൂടെ ആ കലാരംഗത്ത് മുന്നേറുന്നതും ഈ അനാശാസ്യ കമന്റുകള്‍ വിസര്‍ജ്ജിക്കുന്ന വെട്ടുക്കിളി കൂട്ടത്തിനൊന്നും തലകുത്തി നിന്നാൽ പോലും സാധിക്കില്ല. ഞാന്‍ മുന്നേ പറഞ്ഞതിലെ പല കലകളും നമുക്ക് കഠിനമായ പരിശീലനത്തിലൂടെയും, ആത്മാര്‍ത്ഥമായ അർപ്പണ ബോധത്തിലൂടെയും സ്വായത്തമാക്കാനും, കഴിവു തെളിയിക്കാനും സാധിക്കും. പക്ഷേ, “എഴുത്ത്”..അത് അങ്ങനെ ആർക്കും ചുമ്മാ കയറി മേയാൻ പറ്റുന്ന മേഖലയല്ല..അതിന് തികച്ചും സര്‍ഗാത്മകമായ കഴിവ് വേണം, അനുഭവങ്ങള്‍ വേണം, ചിന്താശേഷി വേണം, ഭാവനാസമ്പന്നത വേണം, തങ്ങളുടെ എഴുത്തിനാൽ വായനക്കാരെ സന്തോഷിപ്പിക്കാനും, സങ്കടപ്പെടുത്താനും, ചിന്തിപ്പിക്കാനും, ത്രസിപ്പിക്കാനും, മനസ്സു നിറയ്ക്കാനും കഴിയണം, അതെല്ലാവർക്കും കഴിയില്ല. ആ സര്‍ഗാത്മകത ധാരാളമായി ലഭിച്ചിട്ടുള്ള ഒരാളാണ് “മാലാഖയുടെ കാമുകാ”..നീ, എഴുത്ത് നിന്റെ ടോപ് 10 ഹോബികളിൽ ഇല്ലെങ്കില്‍ പോലും.

ഞാനൊന്ന് ചോദിക്കട്ടെ, മോഹന്‍ലാലിനേയും, മമ്മൂട്ടിയേയും ഇഷ്ടപ്പെടുന്ന ധാരാളം ആളുകളുണ്ട്..ആ കൂട്ടത്തിൽ തന്നെ തമ്മിൽ കടിച്ചു കീറാൻ നില്‍ക്കുന്ന, തന്റെ ആരാധനാപാത്രമല്ലാത്ത ആളെ കാണുന്നിടത്തൊക്കെ ചീത്ത പറയുന്ന, വളരെ മോശമായ കമന്റുകള്‍ പടച്ചു വിടുന്ന മറ്റൊരു കൂട്ടം ഉണ്ട്, അവര്‍ക്കു ഇഷ്ടപ്പെട്ട നടന്റെ നല്ല കഥാപാത്രങ്ങള്‍ കാണാനും, ആസ്വദിക്കാനും, മനസ്സിലാക്കാനും ഉള്ളതിനേക്കാൾ താല്‍പ്പര്യം മറ്റേ ആളെ അപകീര്‍ത്തിപ്പെടുത്താനും, അയാളെ ചീത്ത പറയാനും, അയാളെ കുറിച്ചുള്ള മോശം ചിത്രങ്ങളും, വീഡിയോകളും വികൃതമായി ഉണ്ടാക്കാനുമാണ്. ഇത് ഇവർക്കു മാത്രമല്ല, മറ്റെല്ലാ കലാകാരൻമാരുടെ കാര്യത്തിലും അതെ. അവരുടെ സോഷ്യൽ മീഡിയ പേജുകളിൽ നമ്മളതെല്ലാം കാണാറുള്ളതല്ലെ, അത് കണ്ട് അവർ അഭിനയവും, സിനിമയും മതിയാക്കി പേജും പൂട്ടി പോകുന്നുണ്ടോ, ഇല്ല..കാരണം അവർ നില നില്‍ക്കുന്നത് ആ വെട്ടുക്കിളി കൂട്ടത്തിനു വേണ്ടിയല്ല, മറിച്ച്, അവരെ ഇഷ്ടപ്പെടുന്നതിനൊപ്പം, മറ്റുള്ളവരേയും സ്നേഹിക്കുകയും, ബഹുമാനിക്കുകയും, പ്രോത്സാഹിപ്പിക്കുകയും, സര്‍വോപരി അവര്‍ പ്രതിനിധാനം ചെയ്യുന്ന സിനിമ, അല്ലെങ്കില്‍ മറ്റെന്തെങ്കിലും ആകട്ടെ, ആ മാധ്യമത്തെ ആത്മാര്‍ത്ഥമായി ഇഷ്ടപ്പെടുന്ന ആ ആസ്വാദകര്‍ക്ക്, ആ ആരാധകര്‍ക്ക് വേണ്ടിയാണ്.

എം ടി യുടെ എഴുത്തിനെ ഇഷ്ടപ്പെടുന്നവരുടെ അത്രയും തന്നെ വിമര്‍ശിക്കുന്നവരുമുണ്ട്, “രണ്ടാമൂഴം” വളരെ ബോറായ ഒരു ആഖ്യാനമാണെന്ന് പറഞ്ഞവരുണ്ട്, “വടക്കൻ വീരഗാഥ” ചരിത്രത്തെ മനപ്പൂര്‍വ്വം വളച്ചൊടിക്കാൻ ശ്രമിക്കുന്നു എന്ന് പറഞ്ഞവരുണ്ട്, “പാട്രിയാർക്കി” യിൽ ഊന്നി നിന്ന് കഥ പറയുന്ന ആളാണെന്ന് വിമര്‍ശിക്കുന്നവരുമുണ്ട്. നമ്മൾ ഇന്നു ഏറെ പ്രകീര്‍ത്തിക്കുന്ന “ഭരതൻ” എന്ന സംവിധായകന്റെ പല സിനിമകളും ഇറങ്ങിയ കാലത്ത്‌ നിശിതമായ വിമര്‍ശനം ഏറ്റുവാങ്ങിയവ ആയിരുന്നു, “സെക്സ് പടം” എന്ന് അധിക്ഷേപിച്ചവർ പോലുമുണ്ട്. ആത്മാര്‍ത്ഥമായ, ആരോഗ്യപരമായ, സൃഷ്ടിപരമായ വിമര്‍ശനങ്ങൾ നമുക്ക് മുഖവിലക്കെടുക്കാം, തികഞ്ഞ ബഹുമാനത്തോടെ പ്രതികരിക്കാം, തിരിച്ച് സംവാദിക്കാം, അല്ലാത്തവ തള്ളിക്കളയുക തന്നെ വേണം. അങ്ങനെ ധാരാളം പേര്‍ വിമര്‍ശനം ഏറ്റുവാങ്ങിയപ്പോൾ തന്നെ, ഓടാന്‍ മനസ്സില്ലാതെ, ഇഷ്ടപ്പെടുന്നവരെ കരുതി, അതൊരു ചെറിയ സമൂഹം ആണെങ്കിൽ പോലും, അവര്‍ക്കു വേണ്ടി കലാസൃഷ്ടികൾ വീണ്ടും, വീണ്ടും ആവേശത്തോടെ ചെയ്തവർ ആണ്. ഞാനൊന്ന് ചോദിക്കട്ടെ, ഈ സൈറ്റിലും നേരത്തെ പറഞ്ഞ പോലത്തെ വെട്ടുക്കിളി കൂട്ടങ്ങള്‍ ഉയർന്നു വരുന്നുണ്ട്, പലയിടത്തും കാണാനുമുണ്ട്, അപ്പോൾ നാളെ ചിലപ്പോൾ നമ്മുടെ നേര്‍ക്കു ആ വെട്ടുക്കിളി കൂട്ടങ്ങള്‍ ആര്‍ത്ത് വരുമ്പോള്‍ “പ്രിയപ്പെട്ട മാലാഖയുടെ കാമുകാ”, നീ നിന്നെ ഇഷ്ടപ്പെടുന്ന ഞങ്ങളെ പോലുള്ള സാധാരണ വായനക്കാരെ വിട്ട് വേറൊരിടത്തേക്ക് പോകുമോ? നമ്മൾ എങ്ങോട്ട് ഓടാന്‍ ആണ്, ഈ ഭൂമിയുടെ അറ്റം വരെ?..അതിനു ശേഷം? നമ്മളെ കാരണമില്ലാതെ വെറുക്കുന്ന, ആത്മാര്‍ത്ഥതയില്ലാതെ വിമര്‍ശിക്കുന്ന, ആ കൂട്ടർ ഓടട്ടെ, അതല്ലെ ഹീറോയിസം..!!

ഇത്രയും പറഞ്ഞതിൽ എന്തെങ്കിലും അവിവേകമായി തോന്നിയെങ്കിൽ ക്ഷമിക്കണം, നേരത്തെ പറഞ്ഞ തീരുമാനത്തെ പൂര്‍ണമായും ബഹുമാനിക്കുന്നു, എങ്കിലും ഇത് താങ്കളോട് പറയണമെന്ന് തോന്നി, താങ്കളോട് മാത്രമല്ല, സമാനമായ കാരണങ്ങള്‍ കൊണ്ട് ഈ  സൈറ്റിലും, ആ സൈറ്റിലും മാറി നില്‍ക്കുന്ന പലരോടുമായിട്ടും കൂടെ പറഞ്ഞതാണ്, പ്രത്യേകിച്ച് എന്റെ പ്രിയപ്പെട്ട “മാലാഖയുടെ കാമുകനോട്”. എന്നിരുന്നാലും, താങ്കളുടെ ഏത് തീരുമാനത്തേയും സന്തോഷത്തോടെ സ്വീകരിക്കും, ആ കൂട്ടുകാരി, പ്രിയപ്പെട്ട “വേദിക” യുടെ കൂടെ അഭിപ്രായം നോക്കി തന്നെ ചെയ്താല്‍ മതി, അതാണ് അതിന്റെ ശെരി, ഞാൻ എന്റെ വിഷമവും, ആഗ്രഹവും രേഖപ്പെടുത്തി എന്ന് മാത്രം.

ഒരുപാട് സ്നേഹത്തോടെ,

അപരിചിതൻ..!!