ദൗത്യം 7 [ശിവശങ്കരൻ] 183

ശബ്ദമൊന്നും കേൾക്കാതായപ്പോൾ ദേവ കണ്ണ് തുറന്ന് നോക്കി, എല്ലാവരും അമ്പരന്നു നിൽക്കുകയാണ്…

നീരജ് നിൽക്കുന്ന ഭാഗത്തേക്ക്‌ നോക്കിയ അവളും അമ്പരന്നു പോയി…

ഇടത്തെ കാൽ മുന്നോട്ട് വച്ചു, മുഷ്ടി രണ്ടും ചുരുട്ടി ബോക്സിങ് പൊസിഷനിൽ നിൽക്കുകയാണ് നീരജ്.

ആന്റണി അടക്കം മൂന്നുപേർ താഴെ വീണു കിടക്കുകയാണ്…

ഒരാളുടെ ബോധം പോയിട്ടുണ്ട്, ഒരാളുടെ വായിൽ നിന്നും രക്തം വരുന്നു, ആന്റണിയാണെങ്കിൽ വയറു പൊത്തിപ്പിടിച്ചു ഇരിക്കുകയാണ്…

എല്ലാവരും കണ്ടത് വിശ്വസിക്കാനാവാത്തതുപോലെ മിഴിച്ചു നോക്കി നിൽക്കുകയാണ് നീരജിനെ, ഓർമ വന്നപ്പോൾ ചിലർ എന്താണ് നടന്നതെന്നു ഓർത്തെടുക്കാൻ ശ്രമിച്ചു…

ആന്റണി അടിക്കാനായി വലതുകൈ ഓങ്ങിയതും ഇടംകൈത്തണ്ട കൊണ്ട് നീരജ് അടി ബ്ലോക്ക്‌ ചെയ്തു തന്റെ വലത്തേ കൈയുടെ ചൂണ്ടുവിരലും നടുവിരലും പിണച്ച് ആന്റണിയുടെ വലം കൈയ്യിലെ ഞരമ്പുകൾക്ക് മേലെ ഇന്ദ്രവസ്തി മർമത്തിൽ പതുക്കെ ഒന്ന് കുത്തി. അതോടൊപ്പം തന്നെ മുട്ടുകൈ പുറകോട്ട് ശക്തിയായി വലിച്ചു അയാളുടെ വയറ്റിലായി ഒരു കുത്തും കൊടുത്തു, വേഗതയേറിയ ഈ നീക്കത്തിൽ ആന്റണി അടിതെറ്റി പുറകോട്ട് മറിഞ്ഞു വീണു… അതെനിമിഷം അയാളിൽ നിന്നും ഒരലർച്ച പൊന്തി. അയാൾക്ക് വലതുകൈയുടെ ചലനശേഷി കുറച്ചു സമയത്തേക്ക് നഷ്ടപ്പെട്ടു. ഒപ്പം വയറ്റിൽ ശക്തിയായ വേദനയും…

“അടിയെടാ അവനെ…” വേദനകൊണ്ട് പുളയുന്നതിനിടയിലും അയാൾ കൂട്ടാളികളോട് വിളിച്ചു പറഞ്ഞു. അതുകേട്ടു കൈയ്യിൽ കിട്ടിയ വടികളുമായി രണ്ടുപേർ ഓടി വന്നു…