ദൗത്യം 7 [ശിവശങ്കരൻ] 183

“അതല്ലെങ്കിലും നീ തന്നെയാ പണ്ടുമുതലേ അവളെ  എടുത്തോണ്ട് നടന്നു കൊഞ്ചിച്ച് വഷളാക്കിയത്… അതോണ്ട് അത് വിട്ടിട്ട് മോൻ കാര്യം പറയ്…”

അമ്മ പറയുന്നത് കേട്ട്, തിരിഞ്ഞു നടന്ന അച്ചു തിരിച്ചു വന്നു ഏട്ടന്റെ തോളിൽ തൂങ്ങി.

“അതമ്മേ… ഒന്നും പറയാറായിട്ടില്ല…”

“എന്തുവാട, ഹോസ്പിറ്റലിൽ കിടക്കുന്ന രോഗിയോ ഇമ്മാതിരി ഡയലോഗ്…”

“അയ്യോ, അമ്മ ചളിയടിക്കാതെ മുഴുവൻ കേൾക്ക്…”

“മ്മ്… പറയ്…” ചപ്പാത്തി പരത്താനുള്ള ഗോതമ്പുമാവ് കുഴച്ചുകൊണ്ട് ടീച്ചർ പറഞ്ഞു.

“അമ്മേ, അവളെ കണ്ടപ്പോൾ തന്നെ എനിക്കിഷ്ടമായി… അവളോട് ഇഷ്ടം പറയണം എന്നൊക്കെ കരുതിയതാ പക്ഷേ, നമ്മുടെ വിഷ്ണുവിനും അവളെ ഇഷ്ടമാണ് അമ്മേ…”

“ഹാ, കഥയുടെ പോക്ക് മനസ്സിലായി… കൂട്ടുകാരനുവേണ്ടി ഒഴിഞ്ഞു മാറൽ…”