ഡെറിക് എബ്രഹാം 9 [അഹമ്മദ് ശഫീഖ് ചെറുകുന്ന്] 254

അങ്ങനെ അവർ വീട്ടിലെത്തി…ആദിയും അനുപമയുമുണ്ടായ ആ പഴയ തറവാടിന്റെ സ്ഥാനത്ത് അത്യാവശ്യം വലിയൊരു വീടാണ് അവൾക്ക് കാണാൻ കഴിഞ്ഞത്…പുതിയ വീട് പണിതത് ചാന്ദ്നി അറിഞ്ഞിരുന്നെങ്കിലും, അത് വരെ അവൾ അവിടെ പോയില്ലായിരുന്നു…. ആദിയും കുട്ടികളും വരാറില്ല എന്നായിരുന്നു അവളറിഞ്ഞത്…പിന്നെ, എറണാകുളത്തിൽ നിന്ന് നാട്ടിലേക്ക് വരുന്നതും പതിവല്ല….വന്നാലും ആ ഭാഗത്തേക്ക്‌ പോകാറില്ല… അനുവിന്റെ പഴയ ഓർമകൾ അവളെ വേട്ടയാടപ്പെടുമെന്ന ഭയം അവളെ അവരുടെ വീടുമായി അകറ്റി..

ഉറങ്ങുന്ന ജൂഹിയെയും ഉണർത്തി , അവർ വാനിൽ നിന്നിറങ്ങി വീട്ടിലേക്ക് കയറി…. അവർ വരുന്നതറിഞ്ഞത് കൊണ്ട്, മധുവങ്കിളും സീതാന്റിയും അവരുടെ വീട്ടിലുണ്ടായിരുന്നു….അവർ സന്തോഷത്തോടെ എല്ലാവരെയും സ്വീകരിച്ചു..

“ആഹാ…ചാന്ദ്നീ… നീയും ഉണ്ടായിരുന്നോ മോളേ അവരുടെ പിടിയിൽ….? ”

“ചേച്ചി മാത്രമല്ല അങ്കിൾ…. ഒരു കല്യാണത്തിന് പോയത് പോലെയുണ്ടായിരുന്നു…. എല്ലാം നമ്മുടെ ബന്ധുക്കളും നാട്ടുകാരും തന്നെയാണ് ”

കുസൃതി നിറഞ്ഞ ജൂഹിയുടെ സംസാരം കേട്ടിട്ട് എല്ലാവരും പൊട്ടിച്ചിരിച്ചു…. ആദി അവളുടെ തലക്കൊരു കൊട്ടും കൊടുത്തു…

“അങ്കിൾ…പാതിരാത്രിയായത് കൊണ്ട് ചാന്ദ്നിയെ ഇങ്ങോട്ട് കൂട്ടി….”

“അതിനെന്താ… മോനെ… അവളും നമ്മുടെ വീട്ടിലെ കുട്ടിയല്ലേ ”

“അതൊന്നുമല്ല….രണ്ടാളും പ്ലാൻ ചെയ്തതാണ്….ഇങ്ങോട്ട് വരുമ്പോൾ മുഴുവൻ ഇണക്കുരുവികളെ പോലെയായിരുന്നു അങ്കിൾ…ഇപ്പോൾ കാണിക്കുന്നതൊക്കെ അഭിനയമാണ് ”

കീർത്തിയുടെ ഡയലോഗ് കേട്ടപ്പോൾ ആദിയും ചാന്ദ്നിയും കണ്ണ് മിഴിച്ചിരുന്നു പോയി….അവരുടെ ചമ്മൽ കണ്ടപ്പോൾ സീതാന്റി ഇടപെട്ടു…

“ടീ…ചെറിയ വായിൽ വല്യ വർത്താനം പറയല്ലേ….ഇണക്കുരുവികൾ..ഈ വാക്കുകളൊക്കെ നിനക്ക് എവിടുന്നു കിട്ടി…? ”

“ആന്റീ…..ഇവൾ ടിവിയിൽ വരുന്ന എല്ലാ പൈങ്കിളി സീരിയലുകളും കാണും…. അപ്പോൾ പിന്നെ ഇങ്ങനെയുള്ള വാക്കുകളൊക്കെ വരാതിരിക്കോ….”